ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި، މަޖިލިސް ނައިބް ރައީސް އީވާ މަޤާމުން ވަކިކުރުމަށްޓަކައި، މަޖިލީހަށް މައްސަލަ ވެއްދުމަށްޓަކައި ބޭނުންވާ އަދަދަށް ސޮއި ހޯދުމުގެ މަސައްކަތް އެމްޑީޕީ ޕާލިމަންޓްރީ ގްރޫޕްގެ ތެރެއިން ފަށައިފިއެވެ.
މަޖިލީހުގެ މިއަހަރުގެ ފަހު ދައުރުގެ ޖަލްސާތައް ފެށުމަށް ހަމަޖެހިފައިވަނީ މަމަހުގެ 18 ވަނަ ދުވަހުއެވެ. ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމަށް ސިމްޕަލް މެޖޯރިޓީން ފާސްވާނެއެވެ. އެއީ މިހާރު 87 މެމްބަރުން ތިއްބަވާ މަޖިލީހުގެ 43 މެމްބަރުންގެ ވޯޓެވެ.
މަޖިލީހުގެ ރައީސްގެ މަގާމުގައި ހުންނަވާ ބޭފުޅަކު މަގާމުން ވަކިކުރަން ހުށަހެޅޭނީ މަޖިލީހުގެ ގަވައިދުގައިވާ ގޮތުން މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ 22 މެމްބަރުންގެ ސޮޔެވެ.
ރައީސް ނަޝީދާއި، އީވާގެ އިތުބާރު ނެތްކަމަށް މަޖިލީހުން ފާސްކުރަން މަސައްކަތް ކުރަމުންދަނީ، ރައީސް ނަޝީދުގެ ކޮއްކޮ ނާޒިމް ސައްތާރު އެއްޖިއްސުން ގުޅުންހިންގި މައްސަލާގެ ދިފާއުގައި ނިކުންނެވުމުންނާއި، ރައީސް ޞާލިހަށް ތުހުމަތުކޮށް ނަޝީދު ދެއްކެވި ވާހަތަކާއި ގުޅިގެންނެވެ. ރައީސް ނަޝީދާއި، އީވާގެ އިތުބާރު ނެތްކަމުގެ މައްސަލައެއް ނެގުމަށް، މަޖިލީހަށް ވައްދަންޖެހޭ މައްސަލަ ވެއްދުމަށްޓަކައި މިހާތަނަށް 7 މެމްބަރަކު ވަނީ ސޮއިކޮށްފައެވެ.
މިދުވަސް ވަރަކީ މަޖިލީހުގެ ޗުއްޓީ ދުވަސް ވަރަކަށް ވުމާއިއެކު ގިނަ މެމްބަރުން މާލޭގައި ނެތުމުން މެމްބަރުންގެ ސޮއި ހޯދުމަށް ދަތިތަކެއް ހުރިކަމަށް މިކަމުގައި އިސްކޮށް ހަރަކާތްތެރިވަ މެމްބަރަކު ވިދާޅުވިއެވެ. ދެފެކްޝަނަށް ބައިވެފައިވާ އެމްޑީޕީގެ އެތެރޭގެ ބައިބައިވުން ބޮޑުވެފައިވާ މިދަނޑިވަޅުގައި، ރައީސް ނަޝީދާއި، އީވާ މަޤާމުން ވަކި ކުރުމަކީ ކައިރި ކަމެއްކަމަށް ގިނަ ބަޔަކު ދެކެއެވެ.
ނަމަވެސް ރައީސް ނަޝީދަށް ތާއީދުކުރާ އެމްޑީޕީގެ މަޖިލިސް މެމްބަރުން ވިދާޅުވަމުންދަނީ، ރައީސް ނަޝީދުގެ އިތުބާރު ނެތްކަމުގެ މައްސަލައެއް ވައްދާނަމަ، ރައީސް ޞާލިހުގެ އިތުބާރު ނެތްކަމުގެ މައްސަލައެއްވެސް މަޖިލީހަށް ވައްދާނެކަމަށެވެ.
އަންނަ އަހަރުގެ ރިޔާސީ އިންތިޚާބާއި ގާތްވެފައިވާއިރު، އެމްޑީޕީ ތެރޭގައި މިހާރު އުފެދިފައިވާ ބައިބައިވުންތަކާއި، ޚިޔާލުތަފާތު ވެފައިވާ މައްސަލަތަކުގައި ދެން އެއްބައިވުމަކީ ވުމަށްވުރެއް ނުވުން ގާތްކަމެއްކަމަށް ގިނަ ބަޔަކު ދެކެއެވެ. ޚާއްސަކޮށް، ރައީސް ނަޝީދާއި، ރައީށް ޞާލިހުގެ ދެމެދުގައި އުފެދިގައިވަ ޚިޔާލްތަފާތުވުން ބޮޑުވެ، ރައީސް ނަޝީދު ވަނީ ރައީސް ޞާލިހަށް ތާއީދު ނުކުރައްވާނެކަމަށްވެސް ވިދާޅުވެފައެވެ.