އެމްޑީޕީގެ ކޮންގްރެސްއިން ރައީސް އިބްރާހިމް މުހައްމަދު ސޯލިހުއަށް ޕާޓީގެ ރިޔާސީ ޓިކެޓް ދޭން ނިންމައިފި ނަމަ، އެނިންމުމާއި ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ހިތްހަމަޖެހި ވަޑައި ނުގަތަސް ހުންނަވަން ޖެހޭނީ މަޑުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
މީިޑީޔާއަށް ދެއްވި އިންޓަވިއުއެއްގައި ރައީސް ސޯލިހު ވިދާޅުވީ އެމްޑީޕީގެ ކޮންގްރެސްއަކީ ޕާޓީގެ އެންމެ ބޮޑު އެއްވުން ކަމަށާއި ޕާޓީގެ މެންބަރުން އެމަނިކުފާނަށް ރިޔޔާސީ ޓިކެޓް ދިނުމަށް ނިންމައިފިނަމަ އެނިންމުންތަކާ މެދު ނަޝީދު ކިތަންމެ ނުގަބޫލު ވިޔަސް އެކީގައި ކުރިޔަށް ދާން ޖެހޭނެ ކަމަށެވެ. އަދި އެނިންމުމާއި ހިތްހަމަނުޖެހިގެން އެހެން ޕާޓީއެއްގެ ރިޔާސީ ކެންޑިޑޭޓަކަށް ތާއީދު ކުރުމަކީވެސް ރަނގަޅު ކަމެއް ނޫން ކަމަށް ރައީސް ސޯލިހު ވަނީ ވިދާޅުވެފައެވެ.
ރައީސް ސޯލިހު މިހެން ވިދާޅުވީީ ރައީސް ނަޝީދު ރާއްޖޭގެ ވެރިކަން ބަދަލުކޮށް ބަރުލަމާނީ ނިޒާމެއް ގެންނަން މަސައްކަތް ކުރަމުންދަނިކޮށެވެ. އަދި އަންނަ އަހަރު ބާއްވާ ރިޔާސީ އިންތތިޚާބަށް ރައީސް ސޯލިހުއަށް ރިޔާސީ ޓިކެޓް ދިނުމާމެދު ރައީސް ނަޝީދު ވަރަށް ބޮދަށް ދެކޮޅު ހައްދަވަމުުން ގެންދަވާ ވަގުތެއްގައެވެ.
އެމްޑީޕީގެ ކޮންގްރެސްއަށް ރައީސް ނަޝީދު ހުށަހަޅުއްވާފައިވާ ބަރުލަމާނީ ނިޒާމާއި ގުޅޭ ޤަރާރު މާދަމާއަށް ވަނީ އެޖެންޑާކޮށްފައެެވެ.