ސްކޫލްގެ ދަރިވަރަކު އެހެން ދަރިވަރަކަށް ހަނގާކޮށް އަނިޔާ ކުރި ވީޑިޔޯ އާއި ފޮޓޯތައް ނުފެތުރުމަށް ފުލުހުންނާއި ޖެންޑާއިން އިލްތިމާސް ކޮށްފިއެވެ.
ސްކޫލްގެ ކްލާސްރޫމެއްގެ ތެރޭގައި އެއް ދަރިވަރު އަނެއް ދަރިވަރަށް ހަނގާކޮށް ދެދަރިވަރުން ދެމެދުގައި ހަމަނުޖެހުން ހިނގާދިޔަ ވީޑިޔޯއާއި ފޮޓޯތައް މީސްމީޑިޔާގައި ވަނީ ދައުރުވެފައެވެ.
މިކަމާއި ގުޅިގެން ފުލުހުން ވިދާޅުވީ، ގާނޫނު ނަމްބަރ 19/2019 (ކުޑަކުދިންގެ ހައްޤުތައް ރައްކާތެރި ކުރުމުގެ ޤާނޫނު) ގެ 33 ވަނަ މާއްދާގައި ކުޑަކުދިންގެ ކަރާމާތަށް އުނިކަމެއް އަންނާނެ ފަދަ، ކުޑަކުދިންގެ ޒާތީ މައުލޫމާތު ނުވަތަ ތަސްވީރު (ފޮޓޯ/ވީޑިއޯ) އެއްވެސް ފަރާތަކުން އާންމު ކޮށްގެން ނުވާނެ ކަމަށް ބަޔާން ކޮށްފައިވާ ކަމަށާއި ސްކޫލެއްގެ ކްލާސް ރޫމެއްގައި ދަރިވަރުންތަކެއް މާރާމާރީ ހިންގާ ވީޑިއޯއެއް ދައުރުކުރަމުން ދާތީ އެއީ ކުޑަކުދިންގެ ކަރާމާތަށް އުނިކަމެއް އަންނާނެ ފަދަ ކަމަކަށް ކަމަށެވެ.
އެހެންކަމުން އެއްވެސް މީޑިއާ އަކުން ނުވަތަ އެއްވެސް މީހަކު އެއްވެސް ގޮތަކަށް މި ވީޑިއޯ ދައުރު ނުކުރުމަށް ފުލުހުން ވަނީ އިލްތިމާސްކޮށްފައެވެ.
މިކަމާއި ގުޅިގެން ޖެންޑާއިން ވެސް ވިދާޅުވީ، އެ ގާނޫނުގައި ކުޑަކުދިންގެ ޒާތީ މަޢުލޫމާތު އެއްވެސް ފަރާތަކުން ޢާއްމުކޮށްގެން ނުވާނެ ކަމަށާއި، ކުށުގެ ތުހުމަތުގައިވާ ކުދިންނާއި، ކުށުގެ ޝިކާރައަކަށް ވެފައިވާ ކުދިންނާއި އެނޫން ވެސް ސަބަބަކަށްޓަކައި އަޅާލުމާއި ރައްކާތެރިކަން ބޭނުންވާ ކުދިންގެ ނަމާއި، އެޑްރެހާއި، ތަޢުލީމު، ޙާސިލުކުރާ ތަނުގެ މަޢުލޫމާތު ފަދަ ޒާތީ މަޢުލޫމާތެއް ނުވަތަ އެކުދިންގެ ތަސްވީރެއް، ނުވަތަ ސީދާ ގޮތުން ނުވަތަ ނުސީދާ ގޮތުން ނަމަވެސް ކުއްޖާއަކީ ކާކުކަން ދެނެގަނެވޭނެ ފަދަ އެއްވެސް މައުލޫމާތެއް މީޑިއާގައި ނުވަތަ އެނޫންވެސް ވަސީލަތެއްގައި ޝާއިޢުކޮށްގެން ނުވާނެކަން ބަޔާންކޮށްފައިވާ ކަމަށެވެ.
އެހެން ކަމުން މި ވީޑިއޯގައި ކުޑަކުދިންގެ ތަސްވީރު ފެނިގެން ދިޔުމަކީ އެކުދިންގެ ކަރާމާތައް އުނިކަން އަންނަ ކަމެއްކަމުގައިވާތީ، މި ވީޑިއޯ މީޑިއާގައި އަދި މީސް މީޑިއާގައި އެއްވެސް ފަރާތަކުން ދައުރު ނުކުރުމަށް ޖެންޑާއިންވެސް ވަނީ އިލްތިމާސްކޮށްފައެވެ.