ގދ.ތިނަދޫގައި އެޅުމަށް ހަމަޖެހިފައިވާ 200 ހައުސިން ޔުނިޓް އެޅުމަށް ބިޑް ހުށަހެޅުމަށް ހުޅުވާލުމުން ދިވެހި ގިނަ ކުންފުނިތަކުންވަނީ ކުރިމަތިލާފައެވެ. އެހެންނަމަވެސް މިޕްރޮޖެކްޓް ހަވާލުކޮށފައިވަނީ އަވަށްޓެރި ސްރީލަންކާގެ ކުންފުންޏަކާއެވެ.
"ދައުރު" މީޑިޔާއިން ހާމަކުރާ ގޮތުގައި ޑިޒައިން އެންޑް ބިލްޑް އުސޫލުން ތިނަދޫގައި 200 ހައުސިންގ ޔުނިޓް އެޅުމަށް ހަވާލުކޮށްފައިވަނީ ލަންކާގެ ކުންފުންޏެއް ކަމަށްވާ ސިއޭރާ ކޮންސްޓްރަކްޝަނާއި ސްޓާ ކޮންސްޓްރަކްޝަން އެންޑް އިންޖިނިއާސްގެ ޖޮއިންޓް ވެންޗާ (ޖޭވީ) އާއެވެ.
މިދިޔަ އޭޕްރީލްމަހު ފިނޭންސް މިނިސްޓްރީން ކުރި އިއުލާނާއި ގުޅިގެން ދިވެހި ގިނަ ކުންފުނިތަކުން ވަނީ މިޕްރޮޖެކްޓަށް ޝައުޤުވެރިކަން ދައްކާފައެވެ. އަދި ތަފާތު އެގި އަގުތަކުގައި ބިޑް ހުށަހަޅާފައިވީނަމަވެސް ސަރުކާރުން މި މަޝްރޫޢު ހަވާލުކުރީ ބޮޑު އަގު ހުށަހަޅާފައިވާ ލަންކާގެ ކުންފުންޏަކަށެވެ.
ނޭޝަނަލް ކޮމްޕެޓެޓިވް ބިޑިން (އެންސީބީ) އުސޫލުން ޖޭވީ ކުންފުންޏާއި ހަވާލުކުރެވުނު މިޕްރޮޖެކްޓަށް އެކުންފުނިން ހުށަހަޅާފައިވަނީ 253.9 މިލިޔަން ރުފިޔާގެ ބިޑެކެވެ.
އެ މަޝްރޫއުގެ ދަށުން ތިނަދޫގެ ހަތަރު ސަރަހައްދެއްގައި ހައުސިންގ ޔުނިޓް އަޅާނެއެވެ.
ތިނަދޫގައި ހައުސިން ޔުނިޓު އަޅާ ސަރަހައްދުތައް. (ކުރެހުން/ޕްލޭނިން މިނިސްޓްރީ)
ގދ.ތިނަދޫއަކީ ހުވަދުއަތޮޅުގެ ނިސްބަތުން ބަލާއިރު އާބާދީ ގިނަ މުސްތަޤުބަލުގައި ސިޓީއެއްގެ ދަރަޖަ ލިބޭ ރަށެކެވެ.
ސަރުކާރުން އާ މަޝްރޫއުއެއް ނުފަށާނެ ކަމަށާއި އިތުރު ލޯނުތައް ނުނަގާނެ ކަމަށް މިދިޔަ ޖޫން މަހު ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފަ އެވެ. ނަމަވެސް، އޭގެ ފަހުން ވެސް އާ މަޝްރޫއުތައް ފަށައި، ކުރިން ފަށާފައި ހުރި މަޝްރޫއުތައް އަވަސް ކުރަން ބޮޑެތި އަދަދުތަކުން ލޯނު ނަގާފައި އެބަހުއްޓެވެ.