އަތޮޅުތެރޭ ރައްޔިތުން މާލެ ބަދަލުވަނީ ކުރީގެ ސަރުކާރުތަކުން ސިޔާސަތު ބައްޓަން ކުރި ގޮތުން ކަމަށް ބުނެ ހުވަދު އަތޮޅު ދެކުނުބުރީ ތިނަދޫ ކައުންސިލްގެ ރައީސް ސައުދު އަލީ ފާޑު ވިދާޅުވުމުން ގދ.ފިޔޯރީ ކައުންސިލްގެ ރައީސް ފައިޒަރު ރަޝީދު ސައުދު އަށް ރައްދު ދެއްވައިފިއެވެ.
ފައިިޒަރު ވިދާޅުވީ ހުވަދު އަތޮޅުގެ ހުރިހާ ރައްޔިތުން ގދ.ތިނަދޫއަށް ބަދަލު ކުރުމުގެ ސިޔާސަތު ގެންގުޅުއްވަމުން ސައުދު ކުރީގެ ސަރުކާރުގެ ސިޔޔާސަތަށް ފާޑު ކިޔުމަކީ ލަދުވެތި ދެރަ ކަމެއް ކަމަށެވެ. އަދި އެކަމުން ފިލާވަޅެއް އުގެނުމަށް ވިދާޅުވެ ފައިޒަރު ވަނީ ސައުދުއަށް ރައްދު ދީފައެވެ.
ފޭސްބުކް ޕޯސްޓެއްގައި ސައުދު ވިދާޅުވެފައިވަނީ އަތޮޅުތެރޭ ރައްޔިތުން މާލެ ބަދަލުވާން މަޖުބޫރުވާ ގޮތަށް ކުރީގެ ސަރުކާރުން ސިޔާސަތު ބައްޓަންކޮށްފައި ވާ ކަމަށާއި ރައީސް ސޯލިހުގެ ސަރުކާރުގައި ގެންގުޅުއްވާ ސިޔާސަތު މުޅިން ތަފާތު ކަމަށެވެ.
އެގޮތުން ރައްޔިތުން އެދޭގޮތަށް ބަދަލުތަކެއް ގެނެސް ރައްޔިތުން އެދޭ ތަރައްޤީ ރަށްރަށުގައި ކުރިޔަށް ގެންދިޔުމަށް ރައީސް ސޯލިހް ގެންދަވަނީ ރެއާދުވާލު ކަނޑަނޭޅި މަސައްކަތްކުރަމުން ކަމަށް ވިދާޅުވެ ސައުދު ވަނީ ރައީސް އިބްރާހިމް މުހައްމަދު ސޯލިހުއަށް ތައުރީފްކޮށްފައެވެ.
ފޭސްބުކް ޕޯސްޓެއްގައި ފައިޒަރު ފާހަނގަކުރެއްވި ގޮތުގައި ސައުދު އަލީ ގެންގުޅުއްވަނީ އެބުނާ ކުރީގެ ސަރުކާރުން ގެންގުޅުއްވާ ސިޔާސަތެވެ. ސަބަބަކީ ހުވަދު އަތޮޅުގެ ހުރިހާ ރައްޔިތުން ތިނަދޫއަށް ބަދަލުކުރުމުގެ މަސައްކަތް ކެނޑިނޭޅި ސައުދު ގެންދަވަނީ ކުރައްވަމުންނެވެ. ތިނަދޫ ސިޓީއަކަށް ބަދަލުކުރުމުގެ ރޫހުގައި ތިނަދޫގެ އާބާދީ އިތުރުކުރުމަށް އަތޮޅު ތެރެއިން މީހުުން ތިނަދޫއަށް ގެންނަން ސައުދު ދަނީ ގަދައަޅާ މަސައްކަތް ކުރައްވަމުންނެވެ.
އެހެންކަމުން ކުރީގެ ސަރުކާރުން ގެންގުޅުއްވާ ސިޔާސަތަށް ތާއީދު ކުރައްވާ ބޭފުޅަކު އެފަދަ ވާހަކައެއް ދެއްކުމުން އެކަމާ ލަދުގަންނަން ޖެހޭ ކަމުގައި ފައިޒަރުވަނީ ވިދާޅުވެފައެވެ.