އެމްޑީޕީއަކީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް އުފެއްދެވި ޕާޓީއެއް ކަމަށާއި އެޕާޓީއަށް އެންމެ ފުރަތަމަ ސޮއި ކުރީވެސް އޭނާ ކަމަށް ޤާސިމް އިބްރާހިމް ވިދާޅުވެއްޖެއެވެ.
ރާއްޖެ ޓީވީގެ "ފަށާއިރު" ޕްރޮގްރާމުގައި ވާހަކަފުޅު ދައްކަވަމުން ޤާސިމް ވިދާޅުވީ އެމްޑީޕީއަކީ އޭނަގެ ސޮޔާއެކު އޭނާ އުފެއްދި ޕާޓީއެއް ކަމަށެވެ. އެހެންނަމަވެސް ޖުމްހޫރީ ޕާޓީ ދޫކުރައްވައި އެހެން ޕާޓީއަކަށް ނުދާނެ ކަމަށެވެ.
ޤާސިމް ވިދާޅުވީ އެހެން ޕާޓީއަކާ ގުޅިވަޑައިގެން، އެ ޕާޓީގެ ރިޔާސީ ކެންޑިޑޭޓަށްވުމުގެ ފުރުސަތު މާކުރިންވެސް ލިބިވަޑައިގަތް ކަމަށެވެ. އެގޮތުން އެމްޑީޕީއަކީ އޭނާ އުފެއްދި ޕާޓީއަކަށްވެފައި އެޕާޓީގެ ކެނޑިޑޭޓަކަށް ވުމުގެ ފުރުސަތު ލިބިވަޑައިގަތީސް ކަމަށް ޤާސިމް ވަނީ ވިދާޅުވެފައެވެ.
"އެމްޑީޕީއަކީ އަޅުގަނޑު އުފެއްދި ޕާޓީއެއް. އެމްޑީޕީގަ ފުރަތަމަ ސޮއި ވެސް ކުރީ އަޅުގަނޑު. ފުރަތަމަ 42 މީހުން ސޮއިކުރިއިރު އެކަން ބޭރުގަ އިފްތިތާހު ކުރީ ވެސް އަޅުގަނޑު އެކަމަށް އެހީތެރިވެދީގެން. އެހެންވީމަ އަޅުގަނޑު ކޮންމެހެން އެ ވާހަކަ ދައްކާކަށް ނެތިން."
އެހެންނަމަވެސް ރައީސް ނަޝީދު އާއި ތަޅާފޮޅަން ބޭނުން ނުވާތީ އެޕާޓީގައި ނުހުންނެވީ ކަމަށް ޤާސިމް ވިދާޅުވިއެވެ. އަދި އޭނަގެ އެޖެންޑާއަކީ އިސްލާހީ މަސައްކަތް ކުރުން ކަމަށްވާތީ މީހުންނާއި ދިމާކޮށްގެން މަސައްކަތް ކުރަން އެއްގޮތަކަށްވެސް ބޭނުންފުޅު ނުވާ ކަމަށް ޤާސިމް ވަނީ ވިދާޅުވެފައެވެ.