ހުވަދު އަތޮޅުގެ ހުރިހާ ރަށެއްގެ ބަދަރާއި މަގުބައްތިތައް މަރާމާތްކޮށް ބެލެހެއްޓުމުގައި ކައުންސިލްތަކަށް ބޮޑެތި ގޮންޖެހުންތައް އެބަހުރިކަމަށް ފިޔޯރީ ކައުންސިލްގެ ރައީސް ފައިޒަރު ރަޝީދު ވިދާޅުވެއްޖެއެވެ.
އަތޮޅު ކައުންސިލް 4 ވަނަ ދައުރުގެ 58 ވަނަ އާންމު ޖަލްސާގައި ފިޔޯރީ ކައުންސިލްގެ ރައީސް ފައިޒަރު ރަޝީދު ވަނީ މިމައްސަލަ ހުށަހަޅާފައެވެ. މިޖަލްސާގައި އަތޮޅުގެ ހުރިހާ ރަށެއްގެ ބަދަރާއި މަގު ބައްތިތައް ކައުންސިލް ތަކުން މަރާމާތުކޮށް ބެލެހެއްޓުމަށް ހުރި ބޮޑެތި ގޮތްޖެހުންތަކާއި ގުޅިގެން ފުޅާ ދާއިރާއެއްގައި މަޝްވަރާ ކުރެވުނެވެ.
ހަމައެއާއެކު ކައުންސިލް ސްޓާފުންގެ ގޮތުގައި އިލެކްޓްރިކް މަސައްކަތް ދަންނަ ބަޔަކު ނެތުމާއި އެކު ފެނަކައިގެ ޓެކްނިކަލް މުވައްޒަފުން މެދުވެރިކޮށް މިހާރު ލިބެމުންދާ އެހީތެރިކަމުގެ މިންވަރު ކޮންމެވެސް ސަބަބަކާހުރެ ކުޑަވެއްޖެ ކަމަށާއި އޭގެ ސަބަބުން އެންމެ އެކަށީގެންވާ ގޮތުގައި ބަދަރާއި މަގު ބައްތި ކައުންސިލްތަކަށް ބެލެހެއްޓުން ވަރަށް ބޮޑު ތަކުލީފަކަށް ވެފައިވާކަމަށް ފައިޒަރުވަނީ ވިދާޅުވެފައެވެ.
ދާދި ފަހަކުން ސްޓެލްކޯ އިން ކަރަންޓް ހިދުމަތް ދެމުންދާ ހުރިހާ ރަށެއްގެ ބަދަރާއި މަގު ބައްތި ބެލެހެއްޓުން ހަވާލުވި ގޮތަށް ފެނަކައިގެ ބެލުމުގެ ދަށައް ގދ އަތޮޅުގެ ހުރިހާ ރަށެއްގެ ބަދަރާ މަގުބައްތި ބެލެހެއްޓުން ހަވާލުކުރުމަށް އެދި މިޖަލްސާގައި ވަނީ ހުށަހަޅާފައެވެ.
މީގެ އިތުރުން މިސްކިތްތަކުގެ ކަރަންޓްބިލްތައް ބިލް ކުރަމުންދަނީ ވިޔަފާރީގެ އުސޫލުންކަން ފާހަކަކޮށް، އެކަމުގެ ސަބަބުން ދައުލަތުގެ ގްރާންޓް ރަށްތަކަށް ދެމުންދާ ބަޖެޓުން ސްޓާފުންގެ މުސާރަ އާއި ކަރަންޓް ބިލްތައް ކެޑުމަށްފަހު ރައްޔިތުންނަ ކަމެއްކޮއްލާނެ އެއްޗެއް ނޯންނާތީ އާއި، ކައުންސިލްތަކަށް އާމްދަނީ ލިބޭނެ ވަސީލަތްތައް މަދުވުމުގެ ސަބަބުން ކައުންސިލްތައް އަބަދުމެ އޮންނަން ޖެހެނީ ފެނަކާ ބިލްތަކަށް ދަރާފައިކަން މިޖަލްސާގައި ފައިޒަރު ވަނީ ފާހަގަކޮށްފައެވެ.
މިކަމަށް ހައްލެއް ފެންނަން އޮތީ މިހާރު މިސކިތްތަކުގެ ކަރަންޓްބިލް ބިލް ކުރަމުންދާ ރޭޓް ދަށްކޮށްގެން ކަމަށް ފެންނާތީ ފެނަކާ އަށާއި ރައީސް އަށް މިކަން ހުށަހަޅަން ކައުންސިލްގެ އިއްތިފާގުން ވަނީ ފާސްވެފައެެވެ.