"ކިތަންމެ ޒަމާނެއް ވަންދެންވެސް ލޯބިން ގެންގުޅެވޭނެފަދަ ގޮތަކަށް ތައްޔާރުކޮށްފައިވާ ފޮތެއް. ރައްޓެއްސަކަށް ހަދިޔާއަކަށްދޭންވެސް ފުދޭނެ، ހަނދާނެއްގެ ގޮތުގައި ބޭއްވޭނެ، އެންމެ ޚާއްޞަކަމަކީ ދިވެހިބަހުގެ ޤަވާޢިދުތަކާއި ބަސްމަގު ދިވެހިބަހަށް ފަރިތަވުމަށް ކިޔުމަށް ހަމައެންމެ އެކަށީގެންވާ ގޮތަށް ލިޔެފައިވާކަން." މިއީ މަމްދޫޙު އިބްރާހީމްގެ ވާހަކަ "ޕަރީ ފެންގަނޑު"ގެ ބައެއް ޞޮފްޙާތަކުން، ޚާއްޞަ ބައެއް ޙާދިސާތައް ކިޔާފައިވާ، ފޮތުގެ މުޞައްނިފުގެ ފަރާތުން ވާހަކަ ދެއްކި މީހާ މިވާހަކައިގެ ތަޢާރަފުގެ ތެރެއިން ދެއްކި ވާހަކަތަކެވެ.
އޭނާ ހާމަކުރި ގޮތުގައި މަމްދޫޙުގެ މިވާހަކައަކީ 18+ ޖަހާފައި އޮތަސް ކޮންމެ ޢުމުރަކާވެސް ގުޅޭފަދަ ޢިބާރާތްކުރުމެއް ހުރި ވާހަކައެކެވެ. ފަހަކަށް އައިސް ދިވެހިބަހަށް ސުކޫލުތަކުގެ ދަރިވަރުން ދޭ ސަމާލުކަން ކުޑަވުމާއި ފުރާވަރުގެ ކުދިން ކިޔުމަށް އެކަށީގެންވާފަދަ ބަސްމަގު ހުންނަ، ދިވެހިބަހުގެ ޤަވާޢިދާއި އަދަބިއްޔާތުގެ ގޮތްގަނޑު ހުންނަ ވާހަކަފޮތްތައް ނުލިބިގެން ކަންބޮޑުވާ ފަރާތްތަކަށް މިއީ ވަރަށްވެސް ރަނގަޅު ވާހަކައެއްކަމުގެ ޔަޤީންކަން އެފަރާތުންވެސް އަދި މަމްދޫޙުވެސް ހަމައެޔަޤީންކަން ދިނެވެ. ވާހަކަ ލިޔެފައިވަނީ ދިވެހިބަހުގެ އެކިދަރަޖަތަކަށް ހާއްސަ ސަމާލުކަމެއް ދީގެންނެވެ. އިހުގެ މޮޅެތި ދިވެހި އަދީބުން ޅެމާއި ރައިވަރުން ވާހަކަ ހުށަހަޅާ ހިޔާލު ބޭނުންކޮށްގެން މިވާހަކައަށް ތައްޔާރުކޮށްފައިވާ ހާއްސަ ރައިވަރުވެސް އެހާމެ ރީތިވެފައި ފުރިހަމައެވެ.
ފޭސްބުކް އާއި އިންސްޓަގްރާމުން ފެންނަ ކުރު ވީޑިޔޯ ކްލިޕްތަކާއި މިވާހަކައިގެ ޓްރެއިލާތައް ފެނުމުން މިއީ ކިހާވަރެއްގެ، ކޮންކަހަލަ މަސައްކަތްތަކެއް ކުރެވިފައިވާ. ކޮން މަޢޫޟޫއަކަށް ލިޔެފައިވާ ވާހަކައެއްކަން ކިތަންމެހާވެސް ރީއްޗަށް ހާމަވެގެންދާނެއެވެ.
މީގެ އަހަރެއްހާ ދުވަސްކުރިން މާލެސިޓީއަށް އުފަން މަމްދޫޙު އިބްރާހީމް، އޭނާގެ މުއްސަނދި ޚިޔާލުތައް ފޮތެއްގެ ސިފައިގައި ނެރުމަށް ގަލަމާއި ފޮތެއްހިފައިގެން އިށީނީ، އެއްގޮތަކަށްވެސް ޕަރީންގެ ޝެހެޒާދާއިން ބާނދީ ޕަރީންނާއެކު ނާނޭފުޅުފިއްލެވުމަށް އަންނަ ކަމަށް މީހުން އެކިޔާ އުޅޭ ފެންގަނޑު ހަމަލޮލަށް ފެނި، އެތަނުގެ އެއްވެސް މަޢުލޫމާތެއް އެނގިގެނެއްނޫނެވެ. މިވާހަކައިން މާއިހުޒަމާނެއްގައި ރަސްކަމުގެ ދަރުބާރެއްގައާއި ޕަރިސްތާނުސަހަރެއްގައި ހިނގާ ހާދިސާތަކަކުން އައިސް ރާއްޖޭގެ އަތޮޅުތައް އުފެދި މީހުންގެ ދިރިއުޅުން ފެނިގެންދެއެވެ. އަތޮޅުތަކާއި ރަށްތައް އާބާދުވަމުން އަންނަނިކޮށް، ޕަރިސްތާނު ސަހަރުގެ ރާނީކަމަނާއާއި ރާއްޖޭގެ ލާމު އަތޮޅުގަމާ އޮންނަ ގުޅުމުގެ އަޞްލު، ރަށްފުށުގެ ސިޙުރުވެރިއަކު އަމިއްލައެދުމާއި ދުނިޔޭގެ ޒީނަތްތެރިކަމަށް ދަހިވެތިވުމާއި މިހުރިހާ ކަމެއްގައި ފޮރުވިފައިވާ ވަރުގަދަ ބޮޑު ސިއްރު، އިންތިހާއަށް ރީތި ޕަރީޒާދާގެ ވަންހަނާ ކުރެވިފައިވާ ފެންގަނޑުގެ ގުޅުމާއި މިހެން ވެއްޖެ ކަންތައްތަކެއް ހިމެނޭ މިވާހަކައީ ލާމުއަތޮޅުގައި އޮންނަ "ޕަރީފެންގަނޑު"ގެ ފޮރުވިފައިވާ އަޖައިބުންފުރިގެންވީ ޙަޤީޤަތުގެ މައްޗަށް ބިނާކޮށް ލިޔެފައިވާ، ސައްތައިން ސައްތަ ޚިޔާލީވާހަކައެކެވެ.
"ސިހުރު ހެދުމަކީ ކޮންކަހަލަ ކަމެއްކަމާއި އޭގެއިން ލިބިދާނެ ގެއްލުން، ޒަމާނުއްސުރެ ދެކެވޭ ބޯދާ ވާހަކަތަކުގެ ސިއްރު، ޕަރީންނާއި ޖިންނީންގެ ވާހަކަ، ލާމު ގަމުގައި އެއޮންނަ ޕަރީން ފެންވަރަން އަންނަ ކަމަށް ޔޯލަކޮށް ބުނާ ފެންގަނޑުގެ ފުންމިންނޭނގޭ ސިއްރު، މިއިން އެއްވެސް ކަމެއްގައި އެއްވެސް ޙަޤީޤަތެއް ނޯންނާނެ. މުޅިންވެސް އަމިއްލަ ޚިޔާލު. އެއްވެސް ހަޤީޤީ ދިރިއުޅުމަކާ އެއްގޮތް ކަމެއް އޮތްނަމަ އެއީ ހަމަ ބޮޑު އިއްތިފާޤެއް."
މަމްދޫޙު އިބްރާހީމް އޭނާގެ ވާހަކަ"ޕަރީފެންގަނޑު"ގެ މަޢުލޫމާތު "ހުވަދޫ" ނިއުސްއަށް ދެމުން ބުނި ގޮތުގައި މިއީ އޭނާގެ ލޮބުވެތިމަންމައާއި މަރުޙޫމު ބައްޕައަށް ޚާއްޞަކޮށް ހަދިޔާ ކުރާ ވާހަކައެކެވެ. ވާހަކައިގެ ހުރިހާ ކޮޕީރައިޓެއް ވާނީ މަމްދޫޙުގެ ނަމަށް ރަޖިސްޓްރީކޮށް، ފޮތް ޕަބްލިޝްކޮށް މާކެޓަށް ނެރުމުގެ ހުއްދަވެސް ވަނީ ހޯދާފައެވެ. ވާހަކަފޮތުގެ އެންމެހާއްސަ އެއްކަމަކީ ވާހަކަފޮތުގެ ބަރުދަނެވެ. ފެންނަފެނުމަށް މިއީ ވަރަށް ބޯ ފޮތެކެވެ. އެހެންނަމަވެސް އާދައިގެ 120ސޮފްހާގެ މޮނީޓާރފޮތެއްހާ ލުޔެވެ. ފޮތުގެ ގަނޑުތައް އެހާމެ ފެންވަރުރަނގަޅެވެ. އަވަހަށް ކަތުރުފަނި އެޅުމާއި ހަލާކުވުން ދުރު މޮޅު ކަރުދާހުގައި ޓައިޕްކޮށްފައިވާއިރު ކިޔަމުންދާ މީހާ ވަކިހިސާބަކުން ފޮތް ބާއްވަން ޖެހިއްޖެ ހިނދެއްގައި ގަނޑުގެ ކަން ލެންބުމުގެ ބަދަލުގައި، އެތަން ފާހަގަކުރުމަށް "ބުކްމާކެއް" ލިބޭނެއެވެ. އެބުކްމާކު ފަރުމާކޮށްފައިވަނީ ވާހަކައިގަ ޕަރީޒާދާ ބޭނުންކުރާ ޖާދޫގެ ދަނޑިކޮޅެވެ. ފޮތާއެކު ލާމުއަތޮޅުގެ ޗާޓުގެ ފުރިހަމަ ފޮޓޯ ކުރެހުމަކާއި ލީފްލެޓެއް(ވާހަކައިގެ ބޭރުގަނޑުގެ ކުރެހުމާއި ލާމު އަތޮޅުގެ ޗާޓު ހިމެނޭހެން)އަދި މަމްދޫހުގެ އޮޓޯގްރާފާއި އޭނާގެ ޚާއްސަ ‘ތަފާތު ލޯގޯ ލިބޭނެއެވެ. އެހެންކަމުން މަމްދޫޙުގެ މިވާހަކައަކީ ހަމަ ޙަޤީޤަތުގައިވެސް ދިވެހިރާއްޖޭގެ ތާރީޚުގައިވެސް މިފަދަ ތަފާތު ގޮތަކަށް ފަރުމާކޮށް ތައްޔާރުކުރެވިފައިވާ އަދި އަލިފުލައިލާ، 101 އަރަބިއަން ނައިޓްސް، ސުހުރާބުރުސްތުމް، ފަދަ ޕަރީންނާއި ޖިންނިޝައިތާނުންނާއި ސިހުރާއި ޖާދޫގެ ކަންތައްތައް ފެންނަ، ދިވެހިބަހަށާއި ދިވެހި ވާހަކަތަކަށްވެސް އިތުރުވެގެންދާ ވަރަށް ފުރިހަމަ ތާރީހީ ވާހަކަ ފޮތަކަށްވާނެކަން ގައިމެވެ.
ކޮންމެއަކަސް މަމްދޫޙު އިބްރާހީމް، އޭނާގެ ހަޔާތުގައިވެސް ފުރަތަމަ ފަހަރަށް ވާހަކައެއް ލިޔެ ނެރުމަށް ކުރަމުން އައި މަސައްކަތް މިއަދު ވަނީ ނިމިފައެވެ. އެތައްބައިވަރު މަސައްކަތާއި ހިތްދަތިކަމާއި ހާސްކަމާއި ދެރަވާފަދަ އެތައް ހުރަސްތަކަކާއި ގޮންޖެހުންތަކެއް ގިރާކޮށް މަމްދޫހު އޭނާގެ ވާހަކަފޮތް ކިޔުންތެރިންނާ ހަމައަށް ގެނައުމަށް ވެއްޓުނު ކޮންމެ ވަޅުގަނޑަކުން ހިތްވަރާއެކު ތެދުވެ އަރައިގަންނަމުން، ހުއްޓުމެއް ނެތި ކުރަމުން އައި މަސައްކަތުން، އޭނާއަށް އަމާން އައްސޭރިއަކަށް މިވަނީ އާދެވިފައެވެ. މިއޮކްޓޯބަރުމަސް ނިމޭއިރު ކިޔުންތެރިންނަށް ފޮތް ލިބޭގޮތަށް، އޮކްޓޯބަރުމަހުގެ ފަހުހަފުތާގެތެރޭގައި ވާހަކަފޮތް ލޯންޗް ކުރުމުގެ ޚާއްޞަ ރަސްމިއްޔާތެއް ބޭއްވި ފޮތުގެ އަގާއި ލިބޭނެ ގޮތްތަކާއި ކަންތައް ކުރަންވާގޮތް އަދިވެސް އެހެނިހެން މަޢުލޫމާތެއް ޙިއްސާ ކުރެވޭނެއެވެ. ހަމައެހެންމެ އަނެއް އުފާވެރި ޚަބަރަކީ މިއީ މަމްދޫޙުގެ ފުރަތަމަ ވާހަކައަށް ވީގޮތަށް މިއީ މިދާއިރާގައި މަމްދޫޙު ކުރިއަށް ދިއުމަށް އަޅާ ހަރުދަނާ ނުގުޑާނެ ފިޔަވަޅަކަށް މިވާހަކަ ވާކަމެވެ. ސަބަބަކީ މިވާހަކަ މާކެޓަށް ނެރެވުމާއެކު، މިހާރުވެސް ދެބައިކުޅަ އެއްބައިގެ މަސައްކަތް ނިމިފައިވާ، މަމްދޫޙުގެ ދެވަނަ ވާހަކަ ކިޔުންތެރިންނާ ހަމައަށް ގެނެސްދެވޭނެއެވެ. އަދި ތިންވަނަ، ހަތަރުވަނަ، ފަސްވަނަ މިހެންގޮސް ކިތަންމެ ވަނަތަކެއްވެސް އަންނާނެކަމުގެ ޔަޤީންކަން މަމްދޫޙު ދިނެވެ.
"މަމްދޫޙަށް މިވާހަކަ މިހިސާބަށް ގެނައުމަށް ގިނަހުރަސްތަކެއް ކުރިމަތިވި. ދާއިރާއަށް އަލަށް ނުކުންނަން އެޅި ފިޔަވަޅުގައި ގިނަ ގެއްލުންތަކެއްވެސް ލިބުނު. އެހެންނަމަވެސް މަމްދޫޙު ކުރި ހިތްވަރާއި ރެއާދުވާލު އުއްމީދުތައް އާކުރަމުން ކުރާ މަސައްކަތަށް ހަމައައްސަރިބަހާއި ސާބަހޭ ބުނާނީ. މީހުން ވާހަކަ ލިޔާތަނާއި މާކެޓަށް ނެރެ ވިއްކާތަންވެސް ފެނޭ. އެކަމަކު ވާހަކައެއް ނެރުމަށް، ވާހަކައަކަށް މިހާ ވަގުތުދީގެން ހޭދަކޮށްގެން މީހަކު މަސައްކަތް ކުރިތަނެއް ނުފެނޭ. ހުރިހާ ގޮތަކުންވެސް ތަފާތު."
މިއީ މަމްދޫޙުގެ ހުރިހާ ކަމެއްގައި އޭނާއާއެކު ޚިޔާލު ބަދަލުކޮށް މިވާހަކަ މާކެޓަށް ނެރުމުގެ މަސައްކަތުގައި އޭނާއާއެކު އެންމެ ގާތުން މިކަމުގައި އުޅޭ ފަރާތުގެ ބުނުމެކެވެ. ތެދެކެވެ. ދިވެހި ވާހަަކަފޮތެއްގެ ޓްރެއިލާ ސޯޝަލްމީޑިޔާއިން މިގޮތަށް ފެނުނު، އަދި އޯޑިޔޯކްލިޕްސްތައް ވީޑިޔޯއާއެކު ބަރާބަރަށް ކޮންމެ ދުވަހަކު އާ ގޮތަކަށް ފެންނަމުން އަންނަ އެހެން އެއްވެސް ވާހަކަ ފޮތެއް މީގެ ކުރިން ފެނިފައެއް ނެތެވެ. މިއީ ފެށުމެއް ކަމުގައި ބަލަމާތޯއެވެ. މަމްދޫޙުގެ މިމަސައްކަތުން ޖޯޝު އުފެދިގެން ދިވެހިބަހުގެ ރީތި ލިޔުންތައް، އާޚިޔާލުތަކާއި އުފެއްދުންތެރި އާގޮތްތަކެއްގައި މުސްތަޤުބަލުގައި ފެނިގެން ދިއުމަކީވެސް އެކަށީގެންވާކަމެކެވެ.