މަންމަ.. އެންމެ ލޯބިވާ މަންމަ..!!

މުހައްމަދު އަޚްތަރު ، ހުވަދޫ މީޑިއާ9 Oct 2022

(މިއީ ބައިނަލްއަގުވާމީ އިސްރައްވެހިންގެ ދުވަސް 2022 ފާހަގަ ކުރުމުގެ ގޮތުން ގއ.ވިލިނގިލީ ފެމިލީ އެންޑް ޗިލްޑްރެން ސަރވިސް ސެންޓަރ ގެ އިސްނެގުމުގެ މަތީން ވިލިނގިލީގެ އިސްރައްވެހިންގެ ޚިދުމަތުގެ އަގުވަޒަންކޮށް ދިން ޝަރަފުވެރި އެވޯޑް މަންމައަށް ލިބުމާއި ގުޅިގެން ގއ.ވިލިނގިލީ އަހުމަދު ހިލްމީ އޭނަގެ މަންމައަށް ހާއްސަކޮށް ލިޔެފައިވާ ލިޔުމެކެވެ.)

މިއީ ކިތަންމެ ކުޑަ އެވޯޑެއް ނުވަތަ ފިލައެއް ނަމަވެސް މަންމަމެން އަދި އެވޯޑް ލިބުނު އެހެން އިސްރައްވެހީން ނުހަނު އުފާވާނެ ކަމެކެވެ.

މަންމައަކީ މީގެ ކުރީން ޞިއްޙީ ދާއިރާގައި ފޫޅުމައެއްގެ ގޮތުގައި ދިގު މުއްދަތަކަށް ޚިދުމަތްކުރި ޚިދުމަތްތެރިއެކެވެ. އޭރު ވަސީލަތްތަކާއި ކަންތައްތައް ހުރިގޮތުން ގއ.އަތޮޅު ހޮސްޕިޓަލުގެ ޞިއްޙީ ޚިދުމަތްތެރިންނާއިއެކު ފޫޅުމައިންގެ ޓީމް ދިޔައީ ގިނަ މަސައްކަތްތަކެއް ކުރަމުންނެވެ. އޭގެ ތެރޭގައި ފެމިލީ ޕްލޭނިންގ، ޢާއްމު ސާފްތާހިރުކަމުގެ މަޢުލޫމާތާއި، ވަޅުތައް ކްލޮރިންކުރުމާއި މަދިރި ނައްތާލުމާއި ޢާއްމު ޞިއްޙީ ބަލިމަޑުކަމުގެ ތެރޭގައި ޕަބްލިކް އެވެއަރނަސް ފެތުރުން ހިމެނެއެވެ.

މީގެ އިތުރުން މާބަނޑު މީހުންނަށް ޞިއްޙީ ޚާއްސަ ސަމާލުކަމެއް ދިނުމާއި ގަވާއިދުން ބަރުދަންބެލުމާއި، ރަނގަޅު ކާނާއާއި ސާފްބޯފެނުގެ މުހިއްމުކަމާއި ބެހޭ މަޢުލޫމާތު ފޯރުކޮށްދިނުމާއި ބަރާބަރަށް ގޭގެއަށް ޒިޔާރަތްކުރުން ހިމެނެއެވެ.

މަންމައަކީ ވިލިނގިލީގެ އަންހެނުންގެ ތަރައްޤީއަށް މަސައްކަތްކުރާ ކޮމެޓީގައި ގިނަ ދުވަސްތަކެއްވަންދެން ޚިދުމަތް ކުރި ޓީމުގައި ހިމެނޭ މެންބަރެވެ. އެހެންކަމުން ރަށުތެރެއާއި ބަނދަރުމަތި ސާފްކުރުމުގެ އިތުރުން އިޖްތިމާއި ސަރަޙައްދުތައް ސާފްކޮށް ބޭއްވުމަށް މި ޓީމުން ގިނަ މަސައްކަތްތަކެއް ކޮށްފައިވެއެވެ.

ރަށުގައި ފާހަގަކުރާ ޢިޖުތިމާއީ ދުވަސްތަކުގައްޔާއި ރަށުފެންވަރުގައި ފާހަގަކުރާ ދުވަސްތަކާއި ޢީދު ފާހަގަކުރުމުގައި ރަށާއި އަވަށްތަކުގެ ޓީމުގައި މަންމަގެ ދައުރު ބޮޑުކަން އަޅުގަނޑު ފާހަނގަކުރަމެވެ.

އޭގެ ފަހުން މަންމަގެ ވަޒީފާ ބަދަލުވެ މޯލްޑިވްސް ޕޮލިސް ސަރވިސްގެ ސިވިލް މުވައްޒަފެއްގެ ގޮތުގައި ވިލިނގިލީ ފުލުހުންގެ މަރުކަޒުގައި ވެސް ދިގު މުއްދަތަކަށް ޚިދުމަތް ކުރި އަދި މިހާރުވެސް މަންމަ ދަނީ މަސައްކަތް ކުރަމުންނެވެ.

މިފަދަ ދަނޑިވަޅެއްގައި އަޅުގަނޑަށް އެންމެ ފާހަގަކޮށްލެވޭ އެއް ކަމަކީ އަޅުގަނޑުމެންގެ ކިޔެވުމަށް މަންމަ ދެއްވި ސަމާލުކަމެވެ. ބަރާބަރަށް ޤުރުއާން ކިޔެވުމާއި، ފިލާ ދަސްކުރުމާއި، ރީތިކޮށް ލިޔުމާއި، ސްކޫލުން ދޭ ފިލާވަޅުތައް ދަސްކުރޭތޯ އޭރު ވެސް މަންމަ ދިޔައީ އެންމެ ގާތުން ބަލަމުންނެވެ.

މަންމަގެ ބުރަ މަސައްކަތާއި ތަރުބިއްޔަތުގެ އިތުރުން އަވައްޓެރީންގެ ފަރާތުން އަޅުގަނޑުމެންނަށް ލޯތްބާއި އަޅާލުން ލިބިފައިވާކަން އުފަލާއި އެކު ފާހަގަ ކުރަމެވެ.

ވިލިނގިލީގެ އިސްރައްވެހިންގެ ޚިދުމަތުގެ އަގުވަޒަންކޮށްދެއްވުމަށް ބޭއްވި ހަފްލާގައި މަންމަގެ ޚިދުމަތުގެ އަގުވަޒަން ކުރެވިގެން ދިޔުމުން ނުހަނު އުފާކޮށް އަދި ނުހަނު ލޯތްބާއިއެކު މަންމަ އަށް މަރުޙަބާއާއި ޝުކުރު ދަންނަވަމެވެ.

މި ރަސްމިއްޔާތުގައި އަޅުގަނޑުމެންގެ ލޮބުވެތި ބޮޑުދައިތަ ރަޝީދާ މޫސާ އާއި ނަފިސާ ދައްތަގެ އިތުރުން ވިލިނގިލީގެ 31 ފަރާތަކަށް މިވަނީ ޚިދުމަތުގެ އެވާޑް ދީފައެވެ. ކަނބަލުން ކުރެއްވި މަސައްކަތުގެ އަގު ކިތަންމެހާވެސް ފުރިހަމަ އަށް އަދާ ކޮށްދެއްވާ އުފާވެރިކަން ގެނެސްދީފައެވެ. އެހެންކަމުން މި ފުރުސަތުގައި ގއ.ވިލިނގިލީ ޗިލްޑްރެންސް ސަރވިސް ސެންޓަރ ހިންގެވުމާއި ޙަވާލުވެ ހުންނެވި އަލްފާޟިލު މުޞްޠަފާ މުޙައްމަދާއި، އެސެންޓަރުގެ މުވައްޒަފުންނަށް ނިހާޔަތަށް ޝުކުރު ދަންނަވަމެވެ.

ޓެގް