މަކިޓާ ޖޫނިއަރ ޗެމްޕިއަންޝިޕް ޤައުމީ އެތްލެޓިކްސް މީޓަށް ގދ.ތިނަދޫ ވަރަށް ފުރިހަމައަށް ތައްޔާރުވަމުންދާ ކަމަށް ތިނަދޫ ކައުންސިލްގެ ރައީސް ސައުދު އަލީ ވިދާޅުވެއްޖެއެވެ.
ހުވަދޫ ނިއުސް އާއި މައުލޫމާތު ހިއްސާ ކުރަމުން ތިނަދޫ ކައުންސިލްގެ ރައީސް ސައުދު އަލީ ވިދާޅުވީ މަކިޓާ ޖޫނިއަރ ޗެމްޕިއަންޝިޕް ޤައުމީ އެތްލެޓިކްސް މީޓަކީ ތިނަދޫގައި ބާއްވާ އެންމެ ބޮޑު މުބާރާތްކަމަށް ދެކިގެން، މިމުބާރާތް ވަރަށް ގިނަ ގޮތްގޮތުން ފުރިހަމަ އަދި ކާމިޔާބު މުބާރާތަކަށް ހެދުމަށް މަސައްކަތް ކުރަމުން ގެންދާ ކަމަށެވެ.
އެގޮތުން މުބާރާތުގައި ބައިވެރިވުމަށް ރަށްރަށުން ތިނަދޫއަށް އަންނަ މެހެމާނުންނަށް ވަރަށް ފުރިހަމަ މަރުހަބާއެއް ކިޔުމާއި އެމީހުންނަށް ތިނަދޫއިން އެކޮމޮޑޭޝަން ހަމަޖައްސައިދިިނުމާއި އެހެނިހެން ކަންތައްތައް ވަރަށް ފުރިހަމައަށް ކުރިޔަށް ގެންދާނެ ކަމަށެވެ. އަދި ހަމައެއާއެކު ރަށް ވަރަށް ބޮޑަށް ޒީނަތތްތެރި ވެގެންދާނެ ކަމަށް ސައުދު ވަނީ ވިދާޅުވެފައެވެ.
މީގެއިތުރުން ތިނަދޫގައި ތިބި މުއައްސަސާތަކާއި ގުޅިގެން މިހާރުން ފެށިގެން މުބާރާތަށް ތައްޔާރުވުމުގެ ގޮތުން ސްޓޭޑިޔަމްގައި ޓެންޓުތައް ޖަހާ ތައްޔާރީތައް ވަމުންދާ ކަން ސައުދު ފާހަނގަކޮށްލިއެވެ.
މަކިޓާ ޖޫނިއަރ ޗެމްޕިއަންޝިޕް ޤައުމީ އެތްލެޓިކްސް މީޓުގައި ބައިވެރިވުމުގެ ފުރުސަތު މިއަދަށް ހަމަވެގެން ދިޔައިރު މިހާތަނަށް 36 ޓީމް ވަނީ ބައިވެރިވެފައެވެ. މިހާތަނަށް ޖުމްލަ 1261 ދަރިވަރުން ބައިވެރިވެފައިވާ މި މުބާރާތުގައި ބައިވެރިވުމުގެ މުއްދަތު މިއަދަށް ހަމަވިއިރު އިތުރު ސްކޫލްތަކުން މިހާރުވެސް އެދެމުންދާކަން ސައުދު ވަނީ ވިދާޅުވެފައެވެ.
23 އޮކްޓޫބަރ 2022 ގައި ގދ.ތިނަދޫގައި ފެށުމަށް ހަމަޖެހިފައިވާ މަކިޓާ ޖޫނިއަރ ޗެމްޕިއަންޝިޕް ޤައުމީ އެތްލެޓިކްސް މީޓަށް ތައްޔާރީތައް ވުމުގައި ތިނަދޫގައި ތިބި އެތުލެޓިކްސް އާއި ގުޅުން ހުރި ތަޖުރިބާކާރު ބޭފުޅުންގެ އެހީތެރިކަން މިމުބާރާތަށް ލިބިގެންދާކަން ސައުދު ވަނީ ފާހަނގަކޮށްފައެވެ.
ތިނަދޫ ކައުންސިލުގެ ވިސްނުމަކީ މިބޮޑު މުބާރާތުގެ ތައްޔާރީތަކުގައި މުއައްސަސާތަކުން ރަސްމީ ޙައިޘިއްޔަތުން ބައިވެރި ވުމުގެ އިތުރުން ކްލަބް ޖަމިއްޔާތަކާއި، ވިޔަފާރިވެރީންނާއި، ރަށުގެ އެއްމެހާ ރައްޔިތުންވެސް ފަރުދީގޮތުން މުޅިރަށް މިކަމަށް ތައްޔާރު ކުރުމުގައި އެބައެއްގެ މިންވަރުން ޙިއްސާ ވެވޭނޭ ދޮރު ހުޅުވައި އެކަމަށް ބާރު އަޅައި ހިތްވަރު ދިނުން ކަމަށް ތިނަދޫ ކައުންސިލުން ވަނީ ބުނެފައެވެ.