ގދ.ތިނަދޫ ގަހާކޯޅި ފާތިމަތު ހިންދު އަބްދުލް މުޙްސިނަށް އެއްމަސް ދުވަސްތެރޭގައި ގދ.ތިނަދޫއިން ގޯއްޗެއް ދިނުމަށް، ތިނަދޫ ކައުންސިލްގެ މައްޗަށް ހައިކޯޓުން ހުކުމްކޮށްފިއެވެ.
2011 ވަނަ އަހަރު ގދ. ތިނަދޫއިން ގޯތި ދިނުމަށް އިއުލާނު ކުރުމާއި ގުޅިގެން ހިންދު ގޯއްޗަކަށް އެދި ފޯރމް ހުށަހެޅުމުން ގުރުއަތުގައި ހިމެނި މާރކްސް ދެވިފައިވަނިކޮށް، ގދ، ތިނަދޫ ކައުންސިލަރެއްގެ މަޤާމުގައި އޭރު ހުންނެވި ބޭފުޅަކު އެ ފޯރމުގައި ޓިޕެކްސް ޖަހައި، އެ ފޯމް، އެހެން މީހެއްގެ ނަމަށް ވަނީ ބަދަލުކޮށްފައެވެ. މިކަން މޯލްޑިވްސް ޕޮލިސް ސާވިސް އާއި، އެންޓި ކޮރަޕްޝަން ކޮމިޝަނުގެ ތަހުގީގުން ވަނީ ހާމަވެފައެވެ.
ހިންދުއަށް ލިބުނު ގޯތި ހޯދުމަށް އެދި ގދ. ތިނަދޫ ކައުންސިލުގެ މައްޗަށް ހިންދު ކުރި ދައުވާ، އޭނާއަށް ކާމިޔާބުވެ، ހިންދުއަށް 1 މަސްދުވަހުގެ ތެރޭ ގޯއްޗެއް ދިނުމަށް ގދ. ތިނަދޫ ކައުންސިލުގެ މައްޗަށް ހައި ކޯޓުން މިވަނީ ހުކުމްކޮށްފައެވެ.
ތިނަދޫ މެޖިސްޓްރޭޓް ކޯޓުން ހިންދުއަށް ގޯތި ލިބެން އަންގާނެ ތަނެއް ނެތްކަމަށް ކުރި ހުކުމް، ހިންދުގެ ފަރާތުން ހައި ކޯޓުގައި އިސްތިއުނާފު ކުރުމުން، އެ މައްސަލަ ހައި ކޯޓުން ބެލުމަށް ފަހު، އެ ކޯޓުގެ 3 ޤާޒީންގެ އިއްތިފާޤުން ތިނަދޫ މެޖިސްޓްރޭޓް ކޯޓުގެ ހުކުމް އިއްޔެ ވަނީ ބާތިލުކޮށްފައެވެ.
ހައިކޯޓުން ކުރި ހުކުމުގައި ބުނާގޮތުން ފާތިމަތު އަބްދުލް ހިންދު މުޙްސިން ގޯއްޗަކަށް އެދި ހުށަހެޅިކަން ކައުންސިލުގެ އިއުތިރާފުންވެސް އެނގެން އޮތް ހިނދު، ފާތިމަތު ހިންދު އަބްދުލް މުޙްސިން ގޯއްޗަށް ހުށަހެޅި ފޯރމަށް ވީގޮތެއް ނޭނގި ގެއްލިފައިވާ ކަމަށް ކައުންސިލުން ބުނެފައިވާތީ، ފާތިމަތު ހިންދު އަބްދުލް މުޙްސިން ގޯއްޗަށް ހުށަހެޅި ހުށަހެޅުމުން އޭނާއަށް ގޯއްޗެއް ލިބެން އޮތް ފުރުޞަތުން އޭނާ މަޙްރޫމް ވެފައިވަނީ ސީދާ ކައުންސިލުގެ ސަބަބުން ކަން އެނގެއެވެ. އެހެންކަމުން، ފާތިމަތު ހިންދު އަބްދުލް މުހްސިނަކީ ގޯއްޗެއް ލިބުމުގެ ޝަރުތު ފުރިހަމަވާ މީހެއްތޯ ކަށަވަރު ކުރުމަށްފަހު، އޭނާ އަކީ ގޯއްޗެއް ލިބުމުގެ ޝަރުތު ފުރިހަމަވާ މީހެއް ނަމަ އޭނާއަށް 01 (އެކެއް) މަސް ދުވަހުގެ ތެރޭގައި ގޯއްޗެއް ދިނުމަށް ކައުންސިލަށް އަންގާ އަމުރު ކޮށްފައިވެއެވެ.
މީގެއިތުރުން ހުސައިން ޝާކިރަށް ދޫކުރި ގޯތީގެ ސައްޙަ ކަމާމެދު އުފައްދާފައިވާ ސުވާލާމެދު، ކައުންސިލުން އެ ގޯތި އޭނާއަށް ދޫކޮށްފައިވަނީ ޤާނޫނީ އިމުގެ ތެރެއިންކަން ކައުންސިލަށް ޖަސްޓިފައި ކޮށްދެވޭތޯ ނުވަތަ ނޫންތޯ ދަށު ކޯޓުން އަލުން ބަލަން ވަނީ އަންގާފައެވެ.
ތިނަދޫ ކައުންސިލުން ގޯތި ދިނުމުގައި މަކަރުހަދައި އޮޅުވާލާފައިވާކަމަށް ގިނަ ރައްޔިތުން އަންނަނީ ބުނަމުންނެވެ.