އައްޑޫ ހިތަދޫގެ މަގުތަކުގައި ތާރު އެޅުމުގެ އަމަލީ މަސައްކަތް ފެށުމުގެ ރަސްމިއްޔާތު އިންޑިޔާގެ ބުދު ދީނުގެ ސަޤާފަތާ އެއްގޮތަށް ފެށިގެން ދިޔުމުން ގިނަ ބަޔަކު އެކަމާ ފާޑުކިޔަން ފަށައިފިއެވެ.
މީސްމީޑިޔާގައި ދައުރުވަމުންދާ ވީޑިޔޯއަކުން ފެނިގެންދިޔައީ އައްޑޫ ސިޓީ ހިތަދޫގެ މަގުތަކުގައި ތާރު އެޅުމުގެ މަސައްކަތް ފެށުމުގެ ކުރިން އެމަސައްކަތުގައި އުޅޭ ބިދޭސީންތަކެއް ހިންދޫ ދީނުގެ ސަޤާފަތާ އެއްގޮތަށް ތާރު އަޅަން ބޭނުންކުރާ މެޝިނުގެ ކައިރީގައި ތިބެ އަޅުކަން ކުރުމަށް ފަހު، ތާރު އަޅާ މެޝިންގައި ކާއްޓަކުން ޖަހާ މަސައްކަތް ފެށިގެން ދިޔަތަނެވެ. އަދި ކާށިފެޅުމުގެ ކުރިން ކާށީ ދެއަތް ތެރެއަށްލާ، މޫނުގަޔާ މޭގައި ޖައްސާ އެއްޗެއް ކިޔަވާ، މިފަދަ ހަރަކާތް ވެސް ކޮށްފައި ވެއެވެ. އެއަށްފަހު ކާށީގައި ހުރި ފެން އެމެޝިން މައްޗަށް އޮއްސާ މިކަހަލަ ހަރަކާތްތަކެއް ވީޑިއޯއިން ފެނިގެން ދެއެވެ.
އިންޑިޔާގެ ކުންފުންޏަކުން ފަށާފައިވާ މިމަސައްކަތް ފެށުމުގެ ކުރިން އެގޮތަށް އަމަލުކުރުމުން ގިނަ ބަޔަކު ދަނީ މިސަރުކާރަށާއި އެވީޑިޔޯއަށް ފާޑު ކިޔަމުންނެވެ.
މިއީ، ރާއްޖޭގައި ހިންގާ މިފަދަ މަޝްރޫއެއް ފެށުމަށް އެހެން ގައުމެއްގެ ދީނީ އަޅުކަން ބަޔަކު އިސްކޮށް، އެ ގޮތަށް އަމަލުކުރާ މަންޒަރު ފެނުނު ފުރަތަމަ ފަހަރެވެ. ދިވެހިރާއްޖޭގައި އިންޑިޔާ ބަޔަކު ބޭނުން ގޮތަކަށް އުޅެމުންދާކަމަށް ބުނެ ދިވެހި ސަރުކާރަށް ވެސް ބައެއް މީހުން ދަނީ ފާޑުކިޔަމުންނެވެ.
އެއީ އެއްގޮތަކަށް ވެސް ބަލައިގަނެވޭނެ ކަމެއް ނޫން ކަމަށާއި އަދި އެ އަމަލު ނުހުއްޓުވުމުން ވެސް މީހުން ވަނީ ރުޅިގަދަ ވެފަ އެވެ.