ކެމްބޯޑިއާގެ ބޮޑުވަޒީރަށް ރަސްމީ މަރުހަބާއެއް؛ ދެގައުމުގެ ދެމެދުގައި ގިނަ އެއްބަސްވުންތަކެއް

އިއްޔެ ހެނދުނު ރާއްޖެ ވަޑައިގެންނެވި ކެމްބޯޑިއާގެ ބޮޑުވަޒީރަށް ރަސްމީކޮށް މަރުހަބާ ދެންނެވުމަށް މިއަދު ޖުމްހޫރީ މައިދާނުގައި ބޭއްވި ހަރަކާތުގައި އެ މަނިކުފާނަށް މަރުހަބާ ދެންނެވީ ރައީސް ސޯލިހެވެ.

ކެމްބޯޑިއާގެ ބޮޑުވަޒީރަށް ރައީސް ސޯލިހް ރަސްމީކޮށް މަރުހަބާ ދަންނަވަނީ. (ފޮޓޯ/ރައީސް އޮފީސް)

ރައީސް ވިދާޅުވީ ކެމްބޯޑިއާގެ ބޮޑުވަޒީރާ އެކު ބޭއްވި މަޝްވަރާތަކުގެ ތެރޭގައި ރާއްޖެއިން އެ ގައުމަށް ގިނަ ފުރުސަތުތަކެއް ފަހިކޮށްދިނުމަށް ނިންމާފައިވާ ކަމަށެވެ. އެގޮތުން އެ ގައުމުގެ ރައްޔިތުންނަށް ތައުލީމީ ދާއިރާއިންނާއި މަސައްކަތުގެ ދާއިރާއިން ފުރުސަތުތަކެއް ދިނުމަށް ނިންމާފައިވާކަން ރައީސް އިއުލާންކުރެއްވި އެވެ.

ކެމްބޯޑިއާގެ ބޮޑުވަޒީރު ރާއްޖެ ވަޑައިގެން، ރައީސާ މިއަދު ބައްދަލުކުރައްވަނީ.– ފޮޓޯ: ރައީސް އޮފީސް

ރައީސް އޮފީހުގައި ބޭއްވި މި ރަސްމިއްޔާތުގައި ދެގައުމުގެ ދެމެދުގައި ގިނަ އެއްބަސްވުންތަކެއްގައި ވަނީ ސޮއިކޮށްފައެވެ.

ސޮއިކުރި އެއްބަސްވުންތައް:

• ކެމްބޯޑިއާއިން ރާއްޖެ އަށް ހަނޑޫ އެތެރެކުރުން
• ޒުވާރި، މިރުސް، ދަނޑިއަލުވި އަދި ކެޝޫނަޓް ފަދަ ބާވަތްތައް އެތެރެކުރުން
• މޭވާގެ ބާވަތްތައް ރާއްޖެ އަށް އެތެރެ ކުރުން
• ފޭރާމާއި ދަތުރުފަތުރާ ގުޅުން ހުރި މުދަލާއި ލަކުޑި އެތެރެ ކުރުން
• ރާއްޖޭގައި ތައްޔާރުކުރާ ދަޅު މަހާއި ކަނޑު މަހުގެ އުފެއްދުންތައް ކެެމްބޯޑިއާ އަށް އެކްސްޕޯޓު ކުރުން

“ކެމްބޯޑިއާ އަށް ރާއްޖޭގެ ޓޫރިޒަމް ދާއިރާގައި މަސައްކަތްކުރުމަށް އިންޓާންޝިޕްގެ 20 ފުރުސަތު ދޭން ވަނީ ނިންމަވާފައި. މީގެ އިތުރުން ކޯސްޓްގާޑުން ހިންގާ ބޭސިކް ޑައިވް ކޯހުގައި ބައިވެރިވުމުގެ ފުރުސަތު ކެމްބޯޑިއާގެ ސިފައިންނަށާއި، އެމްއެންޔޫއިން ދެ ސްކޮލަޝިޕް ފުރުސަތު ވެސް އެ ގައުމަށް ދޭން ވަނީ ނިންމާފައި،” ރައީސް ވިދާޅުވި އެވެެ.

ރައީސް ވިދާޅުވީ މި އެއްބަސްވުންތަކުގެ ސަބަބުން ކާބޯތަކެތީގެ އަގު ހެޔޮވެ، އެ ތަކެތީގެ ރައްކާތެރިކަން އިތުރަށް ކަށަވަރު ކުރެވޭނެ ކަމަށެވެ.

ރައީސް ވިދާޅުވީ މިއަދު އެއްބަސްވި ކަންކަމާ ދޭތެރޭ މަޝްވަރާ ކުރުމަށް ދެ ގައުމުގެ އޮފިޝަލުން ވަރަށް އަވަހަށް ބައްދަލުވުންތައް ބާއްވަން ފަށާނެ ކަމަށެވެ.