ގިޔާސުއްދީން އިންޓަރނޭޝަނަލް ސްކޫލް ގެ ގްރޭޑް 8 އަދި 9 ގެ ދަރިވަރުންގެ ފަންޑަކުން 50000 ރުފިޔާ ގެ އެހީ ތުރުކީ އާއި ސީރިއާއަށް އެހީގެ ގޮތުގައި ހަދިޔާ ކޮއްފިއެވެ.
ތުރުކީ އާއި ސީރިއާއަށް އާއި ބިންހެލުމުގައި ޙާލުގައި ޖެހިފައިވާ މީހުންނަށް އެހީވުމަށް މަސައްކަތް ކުރާ އިންޓަރނޭޝަނަލް އެއިޑް ކެމްޕެއިން ޖަމިއްޔާ އާއި މެދުވެރިކޮށް މިއަދު ސްކޫލްގައި ބޭއްވި އެސެމްބްލީގައި އެ ދަރިވަރުން ދިން އެހީ އަކީ ގިޔާސުއްދީން ސްކޫލް ގެ ދަރިވަރުން 2019 އިން 2020 އަށް ކުރިޔަށް ގެންދިޔަ އޭބީއީ ފެއަރ އިން ލިބުނު ފައިސާއެވެ.
ގިޔާސުއްދީނު ސުކޫލުގެ ދަރިވަރުން ފެއާރގެ ތެރެއިން
މިމަހުގެ ކުރީ ކޮޅު ތުރުކީއާއި ސީރިއާ ބޯޑަރު ސަރަހައްދަށް އައި ބިންހެލުމުގައި ދެގައުމުން ގިނަ އަދަދެއްގެ ބަޔަކު މަރުވެ، އެތައް ބައެއްގެ ގެދޮރު ގެއްލި ވަނީ ހާލުގައި ޖެހިފައެވެ.
ޔުނައިޓެޑް ސްޓޭޓްސް ޖިއޮލޮޖިލަކް ސާވޭއިން ބުނެފައިވަނީ ތުރުކީއަށް އައި މި ބިންހެލުމަކީ 1939 ވަނަ އަހަރު ތުރުކީއަށް އައި ބާރުގަދަ ބިންހެލުމެއްގައި 30،000 މީހުން މަރުވި ފަހުން އައި އެންމެ ބާރުގަދަ ބިންހެލުން ކަމަށެވެ. ތުރުކީއަށް އައި ބިންހެލުމަކީ ވަރަށް މަދުން އަންނަ ވައްތަރުގެ ބިން ހެލުމެއް ކަމަށާއި ފާއިތުވި 25 އަހަރުގެ ތެރޭގައި ތުރުކީއަށް 7.0 މެގްނިޓިއުޑް ނުވަތަ އެއަށްވުރެ ބާރުމިނުގައި ބިންހެލުންތައް އައިސްފައިވާ ކަމަށް ވެސް ބުނެފައިވެއެވެ.
ބިންހެލުމާ ގުޅިގެން ގައުމުތަކުން ދަނީ މި ދެގައުމަށް އެހީތެރިކަން ފޯރުކޮށްދެމުންނެވެ. އެމެރިކާ އަދި ޔޫރަޕިއަން ޔޫނިއަން ގައުމުތަކުގެ އިތުރުން އޭޝިއާގެ ބައެއް ގައުމުތަކުންވެސް މިހާރު ވަނީ ތުރުކީއަށާއި ސީރިއާއަށް ސިފައިންނާއި މީހުން ހޯދުމަށް ހާއްސަ ކުއްތާތައް ފޮނުވައިފައެވެ. ބިން ހެލުންތަކުގެ ސަބަބުން ގެއްލޭ މީހުން ހޯދުމަށް މެކްސިކޯގެ ސިފައިން ބޭނުންކުރާ ކުއްތާތަކުގެ ޓީމެއްވެސް ވަނީ ތުރުކީއަށް ފޮނުވައިފައެވެ.
ގިޔާސުއްދީނު ސުކޫލުގެ ދަރިވަރުން ފެއާރގެ ތެރެއިން
ފްރާންސްގެ ފޮރިން މިނިސްޓްރީގެ ސްޕޯކްސްޕާސަން ފްރޭންސިސް ޑެލްމާސް އިއްޔެ ވިދާޅުވީ ސީރިއާއަށް 13 މިލިއަން ޕައުންޑްގެ އެހީ ފޮނުވުމަށް ނިންމާފައިވާ ކަމަށެވެ. އެގޮތުން އެހީ ފޮނުވަން ނިންމާފައިވަނީ ސީރިއާގެ ސަރުކާރު މެދުވެރިނުކޮށް ކަމަށްވެސް ވިދާޅުވެފައިވެއެވެ.
ތުރުކީ އަދި ސީރިޔާގެ ބޮޑުބަޔަކަށް މިހާރު އައިސްގެން އުޅޭ ބިންހެލުމާއި ގުޅިގެން އެހީތެރިކަން ފޯރުކޮށްދިނުމުގެ ގޮތުން (ޚިދުމަތް ޖަމިއްޔާ) ގެ އިސްނެގުމަކާއި އެކު އެހެނިހެން ޖަމިއްޔާތަކާއި ގުޅިގެން ބިންހެލުމުގައި ހާލުގައި ޖެހިފައިވާ ފަރާތްތަކަށް އެހީތެރިވެ ދިނުމަށްޓަކައި 17 ފެބްރުއަރީ 2023 ވާ (ހުކުރު) ދުވަހު، މާލެ އާއި ވިލިމާލެ އާއި ހުޅުމާލެ އަދި އަތޮޅު ތެރޭގެ ބައެއް ރަށްތަކުގައި ފަންޑު ފޮށި ބަހައްޓައިގެން ފައިސާ ހޯދުމަށް ވަނީ ފަށާފައެވެ.