މީހެއްގެ އިންޓަނެޓް ބޭންކިން ހެކްކޮށް އިންޓަނެޓް ބޭންކިން އެޕްލިކޭޝަން މެދުވެރިކޮށް ކިއުއާރު ކޯޑް ސްކޭން މެދުވެރިކޮށް 2 ލައްކައަށްވުރެ ގިނަ ރުފިޔާގެ މުދާ ގަނެފައިވާ މައްސަލައެއްގައި ދެމީހަކު ހައްޔަރުކޮށްފިއެވެ.
ފުލުހުން ބުނީ މި މައްސަލާގައި މި މަހުގެ 18 ވަނަ ދުވަހު ދިވެހި ދެ ފިރިހެނަކު ހައްޔަރުކޮށްފައިވާ ކަމަށާއި އެއީ 25 އަހަރުގެ މީހަކާއި 27 އަހަރުގެ މީިހެއް ކަމަށެވެ. އަދި ކޯޓުން ވަނީ އެ ދެމީހުންގެ ބަންދުގެ މުއްދަތަށް 15 ދުވަސް ދީފައެވެ.
ފުލުހުންގެ އެކޮނޮމިކް ކްރައިމް ޑިޕާޓްމެންޓުން މިހާރު އަންނަނީ މި މައްސަލަ ތަހުގީގުކުރަމުންނެވެ.
ރާއްޖޭގައި މިގޮތަށް އޮޅުވާލައިގެންނާއި، މީހުންގެ އިންޓަނެޓް ބޭންކް ހެކްކޮށްގެން ގިނަ އަދަދެއްގެ ފައިސާތައް ދަނީ އަތުލަމުންނެވެ. އޮޅުވާލައިގެން މަކަރާއި ޙީލަތުން ފައިސާ ހޯދުމަށް ގިނައިން ފޯނުކުރާ ސަރަހައްދަކީ މާފުށި ސަރަހައްދު ނުވަތަ މާފުށީ ޖަލުކަމަށް ފުލުހުން ކުރިން ވިދާޅުވެފައިވެއެވެ. އަދި މާފުށީ ޖަލުން ފޯން ނުކުރެވޭނެގޮތް ހެދުމަށް ފުލުހުން އިސްނަގައިގެން، ޖަލުގައި ޖޭމަރު ހަރުކުރުމަށް ޕޮލިސީ ލެވެލްގައި މަޝްވަރާތައް ކުރެވި އެކަމަށް ހައްލެއް ގެނައުމުގެ މަސައްކަތް ކުރަމުން އަންނަކަމަށް ފުލުހުން ވިދާޅުވެއެވެ.
ފުލުހުން ހާމަކޮށްފައިވާ ގޮތުގައި މިދިޔަ އަހަރު އެކަނި 23 މިލިއަން ރުފިޔާ އެތައް ބައެއްގެ އަތުން މިގޮތަށް ގެއްލިފައިވެއެވެ.