އަންނަ ރިޔާސީ އިންތިހާބުގައި ޖުމްހޫރީ ޕާޓީން ކެންޑިޑޭޓަކު ނެރޭނެކަމުގެ 99 އިންސައްތަ ޔަގީންކަން އެބަ އޮތްކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސައިން ވިދާޅުވެއްޖެއެވެ.
ރާއްޖޭގެ މީޑިއާއަކުން ކުރިޔަށް ގެންދިޔަ ޕްރޮގްރާމެއްގައި ކުރި ސުވާލަކަށް ޖަވާބު ދެއްވަމުން އަލީ ހުސައިން ވިދާޅުވީ ކޮންގްރެސްގެ އިއްތިފާގުން އެންމެން އާނއެކޭ ބުނި ބަހެއް ބޮލާލާ ޖަހާނޭކަމަށް އޭނާއަށް ގަބޫލު ނުކުރެއްވޭކަމަށެވެ.
“އަޅުގަނޑު ގަބޫލު ކުރާ ގޮތުގައި ހަމަ ގާތްގަނޑަކަށް %99 ޔަގީން ޖޭޕީން ކެންޑިޑޭޓަކު ނެރޭނެކަން. ކޮންގްރެސްގެ އިއްތިފާގުން އެންމެން އާނއެކޭ ބުނި ބަހެއް ބޮލާލާ ޖަހާނޭކަމަށް ގަބޫލެއް ނުކުރަން”- އަލީ ހުސައިން
އޭނާ އިތުރަށް ވިދާޅުވީ އަންނަ ރިޔާސީ އިންތިހާބުގައި ޖޭޕީން ކޯލިޝަން ހަދައިގެން ބައެއްގެ ފަހަތަށް އަރައިގެން ދާން ޖެހޭ ވަރުގެ ސަބަބުތަކެއް ހުރިކަމަށްވެސް ގަބޫލު ނުކުރައްވާކަމަށެވެ. ރައީީސް އިބްރާހީމް މުޙައްމަދު ޞާލިހުގެ ސަރުކާރާއެކުގައި ޖޭޕީއިން ކޯލިޝަން ހަދަންޖެހޭ އެއްވެސް ސަބަބެއް ނެތް ކަމަށް އޭނާ ވަނީ މީގެ ކުރިންވެސް ވިދާޅުވެފައެވެ.
ޖޭޕީ އިން އިސްވެ އޮންނަ ކޯލިޝަނެއް ހަދައި ކުރިއަށް އޮތް ރިޔާސީ އިންތިޚާބުގައި ވާދަކުރުމަށް ޖޭޕީ ގައުމީ ކޮންފަރެންސް އިންވަނީ ނިންމާފައެވެ. މި ޤަރާރު ފާސްކުރީ ކޮންފަރެންސްގައި ބައިވެރިވި ހުރިހާ މެންބަރުންގެ އިއްތިފާޤުންނެވެ. މިޤަރާރަށް ކުރި ބަހުސްގައި ރައީސް އޮފީހުގެ މިނިސްޓަރ ސަމީރު ފިޔަވައި ދެން ވާހަކަ ދެއްކެވި ހުރިހާ މެމްބަރުން ވަނީ ޖޭޕީން ކެނޑިޑޭޓަކު ނެރުމަށް ތާއީދު ކޮށްފައެވެ. ސަމީރު ތާއީދު ކުރެއްވީ އެމްޑީޕީއާއި ކޯލިޝަން ހެދުމަށެވެ.