ތިނަދޫގައި ހުންނަ ޑރ.އަބްދުއްސަމަދު މެމޯރިއަލް ހޮސްޕިޓަލުން ޚިދުމަތް ހޯދައިގެން ނިކުންނަނީ ހިނިތުންވުމަކާއި އެކީ ކަމަށް ބުނެވޭނެ އެއްވެސް ޖާގައެއް ނެތްކަމަށް ހުވަދު އަތޮޅު ދެކުނުބުރީ ފިޔޯރީ ކައުންސިލްގެ ރައީސް، ފައިޒަރު ރަޝީދު ވިދާޅުވެއްޖެއެވެ.
ރައީސް ފައިޒަރު މިހެން ވިދާޅުވެފައިވަނީ، ޑރ.އަބްދުއްސަމަދު މެމޯރިއަލް ހޮސްޕިޓަލުން ހުރިހާ މުވައްޒަފުންނަށާއި ގދ އަތޮޅުގެ ހުރިހާ ސިއްޙީ މަރުކަޒުތަކުގައި މަސައްކަތްކުރައްވާ މުވައްޒަފުންނަށް އަމާޒުކޮށްގެން އިފްތިތާހް ކުރެވުނު “އިހެމުން” ގެ ނަމުގައި ކެމްޕެއިނެއް ފަށާފައިވަނިކޮށެވެ. މި ކެމްޕެއިނަކީ ހޮސްޕިޓަލުގެ ގަވަރނިން ބޯޑުގެ ޗެއަރ ޑރ.ލައުޝާ މުހައްމަދު އަދި ހޮސްޕިޓަލުގެ ޑެޕިއުޓީ ސީއީއޯ އަބްދުލް އަޒީޒް ރިފާއު އިފްތިތާހް ކޮށްދެއްވި ކެމްޕެއިނެކެވެ. މި ކެމްޕެއިންގެ މަގްސަދަކީ ހޮސްޕިޓަލް އަދި ސިއްޙީ މަރުކަޒުތަކުގައި މަސައްކަތްކުރައްވާ މުވައްޒަފުންގެ ހުނަރާއި ޤާބިލްކަން އިތުރުކޮށް ބަލިމީހުންނަށް ފޯރުކޮށްދޭ ޚިދުމަތުގެ ފެންވަރު ރަގަޅުކުރުމުގެ އިތުރުން ޚިދުމަތް ލިބިގަތުމަށް އަންނަ ބަލިމީހުންނާއި ރައްޓެހި މާހައުލެއްގައި ހިނިތުންވުމާއި އޯގާތެރިކަމާއެކު ފޯރުކޮށްދޭ ޚިދުމަތަކަށް ބަދަލުކުރުން ކަމަށް ޑރ.އޭއެސްއެމްއެޗް އިން ވަނީ ބުނެފައެވެ.
ފައިޒަރު ފޭސްބުކްގައި ހިއްސާކޮށްފައިވާ ޕޯސްޓެއްގައި ބުނެފައިވަނީ، އަތޮޅުގެ ރައްތަކުން ފެރީ ނިޒާމުން ދަތުރު ކޮށްފައި، ޑރ.އަބްދުއްސަމަދު މެމޯރިއަލް ހޮސްޕިޓަލުން ޚިދުމަތް ދެނީކީ އެ ހޮސްޕިޓަލުން ފަށާފައިވާ ކެމްޕެއިން ޝިޢާރު “އިހެމުން” އޭ ބުނެވޭނެ އެއްވެސް ހަމަ އެއްނެތްކަމަށާއި، ފެރީ އޮންނަ ދުވަހާ ދިމާ ކޮށް ޚާއްސަ ބަލިތަކުގެ ރަނގަޅު ޑޮކްޓަރުން ހެދުނު ޑިއުޓީ އަށް ނެރުމުގެ ބަދަލުގަ ހަވީރު ޝިފްޓަށް ނެރުމަކީ އަތޮޅު ތެރެއިން އެ ހޮސްޕިޓަލަށް ޚިދުމަތް ހޯދުމަށް އަންނަ ފަރާތްތަކަށް ތަކުލީފެއް ކަމަށެވެ.
އަދި ޑޮކްޓަރަށް ދައްކެމަށްފަހު ލެބޯރަޓަރީ ޓެސްޓް ހަދަން ޖެހިއްޖެ ނަމަ ބަލިމީހާ އުފުލަންޖެހެނީ ބޮޑު ތަކުލީފެއް ކަމަށެވެ. އެގޮތުން ލޭނެގުމަށް ދެ ކައުންޓަރ ހެދިފަ އެތައް ސްޓާފުންނެއް ތިބޭ އިރު އެއް ކައުންޓަރުން ނޫނީ ލޭނެގުމުގެ ޚިދުމަތް ދިނުމުގެ އިންތިޒާމް ހަމަ ޖައްސާފައި ނުހުރުން ހިމެނޭކަމަށް ފައިޒަރު ފާހަގަ ކުރެއްވިއެވެ. އަދި އެކަމުގެ ސަބަބުން އަތުން ހޭދަ ކޮށް ދުރު ދަތުރެއްގަ ދާ ރައްޔިތު މީހާ ޑޮކްޓަރަށް ދިޔަ އަސްލު ބޭނުން ނުފުދި ފެރީ ފުރާ ގަޑި ޖެހޭތީ އަބުރާ ރަށައް ދާން ތެޅި ފޮޅެމުން ހޮސްޕިޓަލުން ނުކުމުގެން ފެރީ އަށް އަރަނީ ހިނިތުންވުމަކާއި އެކީ ނޫންކަމަށްއަތޮޅުގެ އެއްމެހާ ރައްޔިތުން ޤަބޫލް ކުރާނެކަމަށްވެސް ފައިޒަރު ވިދާޅުވިއެވެ.
މީގެ އިތުރުން ރައީސް ފައިޒަރުގެ ޕޯސްޓްގައި ބުނެފައިވަނީ ތަނުގެ ހިންގުމާ ހަވާލުވެ ހުރި ވެރިޔާއަށް ތަނުގެ ހުންނަ މައްސަލަތަކާއި ގުޅިގެން ރަނގަޅުގޮތުގަ މުޢާމަލާތް ކުރުމުގެ ފުރުސަތު، ކަންބޮޑުވުން ފާޅު ކުރާ ފަރާތައް ނުދީ ނުހަނު ރުޅިވެރި ކަމާއި ރުންކުރު ކަމާ އެކު މީހުންނާއި މުޢާމަލާތް ކުރަމުން ދިއުމަކީވެސް ޚިދުމަތުގެ ފެންވަރު ދަށްވާ ސަބަބެއް ކަމަށެވެ.
ފައިޒަރުގެ ޕޯސްޓްގައި އޭނާ ފާހަގަ ކުރެއްވީ، ރައްޔިތުމީހާ އެބުރި ރަށައް ދަނީ ކަންބޮޑުވުމާއި ހާސްކަމުގަ ދެވަނަ ދުވަހަކު ހަމަ އެބޭނުމަށް އެ ޚަރަދާއި އެ ވަގުތު ހޭދަކުރަން ދެވަނަ ދަތުރަކަށް ތި ޑރ.އަބްދުއްސަމަދު މެމޯރިއަލް ހޮސްޕިޓަލަށް ދާން މަޖުބޫރު ހާލަތުގައި ކަމަށެވެ. ނުވަތަ ބަލިމީހާ ޖެހެނީ ބޮޑު އަގުގައި ތިނަދޫއިން ކޮޓަރި ކުއްޔަ ހިފާއިގެން ތިނަދޫގައި މަޑު ކުރަންކަމަށެވެ. އަދި މީ ޑރ.އަބްދުއްސަމަދު މެމޯރިއަލް ހޮސްޕިޓަލު މެނޭޖުމެންޓުން ޕުލޭން ކުރެވިގެން ހިންގާ ބޮޑު ޖަރީމާއެއް ކަމަށްވެސް ފައިޒަރު ވަނީ ފާހަގަ ކުރައްވާފައެވެ.
ފައިޒަރު ވިދާޅުވީ، ކުރިން ރަށްތަކުން ދާ ބަލި މީހުންނަށް ފަސޭހަ އިންތިޒާމްތަަކެއް ހުރިނަމަވެސް، ޑރ.އަބްދުއްސަމަދު މެމޯރިއަލް ހޮސްޕިޓަލުގެ ޚިދުމަތުގެ ފެންވަރު މިހާ ދަށްވެގެން ދިޔައީ، އެތަނުގެ ހިންގުން ބޯޑެއްގެ ދަށަށް ގެނެވުނު ހިސާބުން ކަމަށެވެ.
ގދ.އަތޮޅު ކައުންސިލްގެ މެމްބަރެއްގެ މަޤާމުވެސް އަދާކުރައްވާ ފިޔޯރީ ކައުންސިލްގެ ރައީސް ފައިޒަރު ރަޝީދު ވަނީ މީގެ ކުރިންވެސް ޑރ.އަބްދުއްސަމަދު މެމޯރިއަލް ހޮސްޕިޓަލްގެ ޚިދުމަތުގެ ފެންވަރު ދަށްކަމަށް ވިދާޅުވެ، ގދ.އަތޮޅު ކައުންސިލް މެދުވެރިކޮށްވެސް މައްސަލަތައް ހައްލު ކުރުމަށް މަސައްކަތް ކޮށްފައެވެ.
ދާދި ފަހުން ޑރ.އަބްދުއްސަމަދު މެމޯރިއަލް ހޮސްޕިޓަލުން ވަނީ ރައްޔިތުންގެ ޚިޔާލާއި، ޝަކުވާ ހުށަހެޅުމަށް ޕޯރޓަލްއެއް ގާއިމްކޮށްފައެވެ. ނަމަވެސް، މިކަމާއިގުޅިގެންވެސް ގިނަ ރައްޔިތުންތަކެއް ވަނީ ކަންބޮޑުވުން ފާޅުކޮށްފައެވެ. އެގޮތުން، ހޮސްޕިޓަލަށް ތަކުރާރުކޮށް ހުށަހަޅާ ޝަކުވާ ބަލައި ނުގަންނަ ކަމަށާއި، މައްސަލަތައް ހައްލު ކުރުމުގެ ބަދަލުގައި، މީސްމީޑިއާގައި ހޮސްޕިޓަލްގެ މުވައްޒަފުން އެފަރާތްތަކަށް ރައްދުދީ ކަންކަން ސިޔާސީ ވިސްނުމުން ނަގާކަމަށް ވަނީ ތުހުމަތު ކޮށްފައެވެ.