ހުވަދޫ މީޑިއާއިން ކުރިއަށް ގެންދާ "ހުވަދޫ މަދަޙަ ޗެލެންޖް 1444" ގެ ޓައިޓަލް ޕާރޓްނަރ އަކަށް މާލެ އޮޕްޓިކަލް ހަމަޖައްސައިފިއެވެ.
މާލޭ އޮޕްޓިކަލް ކޮމްޕެނީއަކީ، ރާއްޖޭގައި އައިނު ހަދައިދިނުމުގެ ޚިދުމަތް ދޭން ފެށި ފުރަތަމަ ކުންފުންޏެވެ. މި މަސައްކަތް އެކުންފުނިން ފެށީ، 1981 ވަނަ އަހަަަަަަރުއެވެ. މި ޚިދުމަތް ރާއްޖެއިން ލިބެން ފެށުމުން ރާއްޖޭގައި އައިނު ހަދަން ބޭނުންވެފައިވާ ގިނަބަޔަކަށް މިކަމުގެ ލުއިފަސޭހަކަން ލިބިގެންދިޔައެވެ. އައިނު ހެދުމުގެ އިތުރަށް، އަޑު އިވުމުގެ ޙިއްސަށް އުނިކަން ލިބިފައިވާ މީހުންނަށް ހިޔަރިންގ އެއިޑް ހޯދައިދިނުމުގެ ޚިދުމަތްވެސް މި ކުންފުނިން ދަނީ ފޯރުކޮށްދެމުންނެވެ.
މާލެ އޮޕްޓިކަލް އަކީ ޞިއްޙީ ޚިދުމަތްކުރުމުގެ ރޮނގުން އާންމު ޚިދުމަތުގެ ޤައުމީ އިނާމާއި، ސަރުކާރުން ދެއްވާ ޚާއްސަ އިނާމް ލިބިފައިވާ ދިވެހިންގެ އިތުބާރާއި ލޯބި ހޯދައިފައިވާ ކުންފުންޏެކެވެ.
"ހުވަދޫ މަދަޙަ ޗެލެންޖް 1444" ގެ ޓައިޓަލް ޕާރޓްނަރ އަކަށް މާލެ އޮޕްޓިކަލް ހަމަޖެއްސުމާއެކު މި މުބާރާތުގެ ނަން "މާލެ އޮޕްޓިކަލް ހުވަދޫ މަދަޙަ ޗެލެންޖް 1444" އަކަށް ބަދަލުވެގެން ދާނެއެވެ.
ހުވަދޫ މީޑިއާއިން މުޅި ރާއްޖެއަށް ހުޅުވާލައި އިންތިޒާމްކޮށްގެން ކުރިއަށްގެންދާ މަދަހަ ޗެލެންޖަކީ އިސްލާމީ ފިކުރުތަކަށާއި، ކީރިތި މާތް ނަބިއްޔާގެ މައްޗަށް ދިވެހިންގެ ހިތްތަކުގައި ލޯބި އުފައްދާ، ދީނީ ކަންކަމަށް އަހުލުވެރި ކުރުމަށާއި މަދަޙަ ކިޔުމުގެ ހުނަރު ތަރައްޤީކުރުމުގެ ފުރުޞަތު ތަނަވަސްކޮށްދީ، މަދަހަ ކިޔުމުގެ ފަންނުވެރިން އުފެއްދުމުގެ މަޤްޞަދުގައި ކުރިއަށްގެންދާ މުބާރާތެކެވެ.
މި މުބާރާތުގައި ބައިވެރިވުމުގެ ފުރުޞަތު މިހާރު ހުޅުވާލާފައިވާއިރު، މިއީ ހުވަދޫ މީޑިއާ އިން 1444 ވަނަ އަހަރުގެ ރަމަޟާންމަހަށް ޚާއްސަކޮށްގެން ކުރިއަށްގެންދާ މުބާރާތެކެވެ. "މާލެ އޮޕްޓިކަލް ހުވަދޫ މަދަޙަ ޗެލެންޖް 1444" ގައި ބައިވެރިވުމުގެ ފުރުޞަތު އަންނަ އޭޕްރީލް މަހުގެ 10 ވަނަ ދުވަހުގެ މެންދުރު 12:00 އާއި ހަމައަށް ވަނީ ހުޅުވާލާފައެވެ.
މުޅި ރާއްޖެއަށް ހުޅުވާލައިގެން ކުރިއަށް ގެންދާ މި މުބާރާތުގެ ފަނޑިޔާރުންނަކީ މުހައްމަދު އަބްދުލް ޣަނީ (ތޭރަ)، އިބްރާހިމް ޒައިދް އަލީ (ކުޑައިއްބެ)، އަދި މަރިޔަމް އަޝްފާއެވެ.
"މާލެ އޮޕްޓިކަލް ހުވަދޫ މަދަޙަ ޗެލެންޖް 1444" އަކީ ވާރޗުއަލްކޮށް ކުރިއަށް ގެންދިޔުމަށް ނިންމާފައިވާ މުބާރާތެކެވެ. އެގޮތުން މި މުބާރާތުގައި ބައިވެރިވުމަށް އެދޭ ފަރާތުން މަދަޙަ ކިޔުމަށް ފަހު ހުވަދޫ މީޑިއާ އަށް ފޮނުވާ މަންޒަރާއި އަޑުގެ ރިކޯޑިން ހުވަދޫ މީޑިއާގެ ރަސްމީ ފޭސްބުކް ޕޭޖުގައި ހިއްސާ ކުރެވިގެންދާނެއެވެ.
މަދަޙަ ފޮނުވުމަށް : https://t.me/Huvadhoo (ޓެލެގްރާމް : 9334888)
މި މުބާރާތުގައި ކޮންމެ ބައިވެރިއަކަށްވެސް ހުށަހެޅޭނީ އެއް މަދަހައެވެ. އަދި ބައިވެރިން ހުށަހަޅާ މަދަހަ ކިޔަންވާނީ މިއުޒިކާ ނުލައެވެ. އެެހެންނަމަވެސް ޤުދުރަތީ އަޑުތައް (ރާޅު ޖަހާއަޑު، ދޫނިގޮވާ އަޑު، ވައިޖެހޭ އަޑުފަދަ) ރެކޯރޑް ކޮށްގެން ބޭނުން ކުރެވިދާނެއެވެ. މީގެ އިތުރުން ހުށަހަޅާ ރިކޯރޑިންގައި އަދި ރިކޯޑް ކުރުމަށް ފަހުގައިވެސް މަދަޙަ ކިޔުންތެރިޔާގެ ރިކޯޑިންގް އަށް (އިކޯ އަދި ރިވާބް) ފިޔަވާ އިތުރު އެއްވެސް އެޑިޓެއް ގެނެސްފިނަމަ އަސްލާއި ޚިލާފު ހުށަހެޅުމެއް ކަމަށް ނިންމާ މުބާރާތުން އެ މަދަޙައެއް ޑިސްކޮލިފައިކުރެވޭނެއެވެ.
"މާލެ އޮޕްޓިކަލް ހުވަދޫ މަދަޙަ ޗެލެންޖް 1444" ގައި ވަނަތައް ހޮވާނީ އިންސާފު ކުރުމަށް ކަނޑައެޅިފައިވާ 3 ފަނޑިޔާރުންގެ މާކުސްގެ %75 ގެ އިތުރުން ފޭސްބުކް އިން ޙިއްސާ ކުރެވިފައިވާ އެ ވީޑިއޯ އަކަށް ލިބޭ ރިއެކްޓްގެ %25 ހިމަނައިގެންނެވެ.
މަދަހަ މުބާރާތުގައި ބައިވެރިވާން ޝަޢުގުވެރިވާ ފަރާތްތަކަށް އެ ފުރުޞަތު މިހާރު ހުޅުވާލާފައިވާއިރު، މުބާރާތުގައި ބައިވެރިވުމަށް ފޮނުވަން ޖެހޭ ވީޑިއޯ އާއި މަޢުލޫމާތު (ނަން، އެޑްރެސް، ރަށް، އައިޑީ ކާޑު ނަންބަރ، ފޯނު ނަންބަރު) ފޮނުވުމުންނެވެ.
ހުވަދޫ މަދަޙަ ޗެލެންޖް 1444 އާއި ބޭހޭގޮތުން އިތުރު މަޢުލޫމާތު ބޭނުންފުޅުވާނަމަ 9111164 ނުވަތަ 9195071 އަށް ގުޅުއްވުން އެދެމެވެ.
މުބާރާތުގެ : ހުވަދޫ މަދަޙަ ޗެލެންޖް 1444 ގެ ޤަވާއިދު
މަދަޙަ ފޮނުވުމަށް ލިންކް : (ފިއްތާލާ) ނުވަތަ ޓެލެގްރާމް ނަންބަރު : 9334888