އެމްއެންޕީ ގެ ވެރިކަމެއްގައި އެކަނިވެރި މައިންގެ އިނާޔަތް ބޮޑުކުރާނެ ކަމަށާއި، 18 އަހަރުން މަތީ ކޮންމެ މީހަކަށް ރޯދަ އެލަވެންސް ދޭނެ ކަމަށް އެމްއެންޕީގެ ރިޔާސީ ކެންޑިޑޭޓް، މުޙައްމަދު ނާޒިމް ވިދާޅުވެއްޖެއެވެ.
ނާޒިމް މިހެން ވިދާޅުވީ “އުޖާލާ ޒަމާން” ނަމުގައި އެމްއެންޕީގެ ރިޔާސީ ކެންޑިޑޭޓް މުހައްމަދު ނާޒިމުގެ ވެރިކަމެއްގައި ކުރައްވާނެ ކަންކަން ހިމަނާފައިވާ މެނިފެސްޓޯ ލޯންޗު ކުރުމަށް ރޭ ބޭއްވި ހަފްލާގައި ވާހަކަ ދައްކަވަމުންނެވެ.
ރޭ އެޕާޓީން ބޭއްވި ރަސްމިއްޔާތެއްގައި ނެރުން “އުޖާލާ ޒަމާން” މެނިފެސްޓޯ ގައި ނާޒިމުގެ ވެރިކަމެއްގައި ކުރާނެ ކަންކަން މައިގަނޑު ގޮތެއްގައި 9 ބަޔަަކަށް ވަނީ ބަހާލާފައެވެ. އެއީ، އިސްލާމީ ވަހުދަތު، އުފާވެރި ޒުވާނާ، ބާއްޖަވެރި އާއިލާ، ފަންނީ ޖީލެއް، އަހަރެންގެ ދިވެހި ރާއްޖެ، ނަޒާހަތްތެރި ވެރިން، އަދުލު އިންސާފު، ސަލާމަތްތެރިކަން ކަށަވަރު، ބަދަހި އިގުތިސޯދު، މި ސުރުހީ ތަކެވެ.
އޭގެ ތެރެއިން އުފާވެރި ޒުވާނާގެ ދަށުން ޢުމުރުން 18 އަހަރުވުމުން، ބޯހިޔާވަހިކަމުގެ ޝަރުތު ހަމަވާ ފަރާތްތަކުގެ ދަފްތަރެއް އެކުލަވާލާ ހިންގުމާއި، ވަޒީފާ ނުލިބި ތިބޭ ޒުވާނުންނަށް އެލަވަންސް ދިނުމާއި، ނަފްސާނީ ބަލިތަކަށް ފަސޭހައިން ފަރުވާކުރެވޭނެ ގޮތް ހަމަޖައްސައި، ކިއުގައި ގިނަ ދުވަހު ހުންނަން ނުޖެހޭނެހެން ހެދުމާއި، މިއުޒިޝަނުންނާއި އާޓިސްޓުންނަށް އިންޑަސްޓްރީއެއް ތަރައްގީ ކުރުން ހިމެނެއެވެ.
ނާޒިމް ވިދާޅުވީ، އޭނާގެ ވެރިކަމެއްގައި މައިގަނޑު ސިޔާސަތަކީ، ރައްޔިތުންނަކީ ފުދުންތެރި ބަޔަކަށް ހަދައި، ރައްޔިތުންގެ ޖީބަށް ފައިސާ ވެއްދުން ކަމަށެވެ.
ނާޒިމް ވިދާޅުވީ، ރައްޔިތުންނަށް ބޭނުންވާ އަސާސީ ކަންކަން ކޮށްދިނުމަކީ ކޮންމެ ސަރުކާރަކުންވެސް ކޮށްދޭން ޖެހޭނެ ކަމެއް ކަމަށާއި، ވަޢުދުވާންވީ ރައްޔިތުންގެ ދިރިއުޅުމުގެ ޙާލަތު ރަނގަޅު ކުރުމަށް ކަމަށެވެ. އަދި އެމްއެންޕީން މަސައްކަތް ކުރާނީ، ކޮންމެ ރައްޔިތެއްގެ ދިރިއުޅުމަށް ވެސް ހެޔޮ ބަދަލެއް ގެނެސްދިނުމަށް ކަމަށް ވިދާޅުވިއެވެ.
“އުޖާލާ ޒަމާން” މެނިފެސްޓޯ ގައި ދައުލަތުން މިހާރު ދޭ ބައެއް އެލަވަންސްތައް ބޮޑުކޮށް އަދި ބައެއް އެލަވަންސްތައް އަލަށް ތައާރަފްކުރަން ހިމަނާފައިވެ އެވެ. އެގޮތުން އަލަށް އުފަންވާ ކޮންމެ ކުއްޖަކަށް 5،000 ރުފިޔާގެ އިނާޔަތެއް ދިނުމާއި، ހިޔާ ފްލެޓްތަކުގެ ކުލި 4000 ރުފިޔާއަށް ކުޑަކުރުމާއި، މައްސަރު ދުވަސްތަކުގައި ބޭނުންކުރާ ޕެޑް ހިލޭ ކޮށްދިނުމާއި، އެކަނިވެރި މައިންނަށް ދޭ އިނާޔަތް 4000 ރުފިޔާއަށް ބޮޑުކުރުމާއި، އުމުރުން 18 އަހަރުން މަތީގެ ކޮންމެ މީހަކަށް 3،000 ރުފިޔާގެ ރޯދަ އެލަވަންސެއް ދިނުމާއި ވަކި ވަރަކަށް ވުރެ ދަށުން އާމްދަނީ ލިބޭ އާއިލާތަކަށް މާލީ އިނާޔަތެއް ދިނުން ހިމެނެއެވެ.
މީގެ އިތުރުން ވެހިރާއްޖޭގެ އެއްގަމާއި ކަނޑާއި ވައިގެ ސަރަޙައްދުން އެންމެ އިންޗިއެއްވެސް ދޫކޮށްނުލައި ބެލެހެއްޓުމާއި، ވެހިރާއްޖޭގެ އެއްގަމާއި ކަނޑާއި ވައިގެ ސަރަޙައްދުން އެންމެ އިންޗިއެއްވެސް ދޫކޮށްނުލައި ބެލެހެއްޓުން ހިމެނެއެވެ.