ސަރުކާރުގެ ސިއްރު ލިޔެކިޔުންތައް އަމިއްލަ ގެކޮޅުގައި ގެންގުޅުއްވި މައްސަލަ ކޯޓަށް ނުވައްދަނީސް ޙައްލެއް ހޯދުމަށް ޓްރަމްޕްގެ ވަކީލުން ކުރިން ހުށަހެޅުއްވި ހުށަހެޅުއްވުމަކަށް ވެސް ޓްރަމްޕް ވަނީ ދެކޮޅުހައްދަވާފައެވެ. 2022 ވަނަ އަހަރުގެ ފަހުކޮޅު ޓްރަމްޕްގެ ވަކީލުންގެ ތެރެއިން ކްރިސްޓޮފާ ކައިސް ވަނީ މިހާރު ކޯޓަށް ހުށަހެޅިފައިވާ މައްސަލަތައް ކޯޓުން ބޭރުގައި ނިންމުމަށް ޝަރުޢީ އިދާރާތަކުގައި އޮންނަ ފުރުޞަތުގެ ބޭނުން ހިފުމަކީ، ޓްރަމްޕް އާއި ދެކޮޅަށް ދަޢުވާތަކެއް އުފުލުން ހުއްޓުވިދާނެ ކަމެއްކަމަށް ޓްރަމްޕް އަށް ލަފާ ދެއްވާފައެވެ.
ލިޔެކިޔުންތައް ރައްދުކުރުމާއިއެކު، ކޯޓުންބޭރުގައި މައްސަލައަށް ޙައްލެއް ހޯދުމަށް ހުށަހަޅައިފި ނަމަ އެއީ، އެޓާނީ ޖެނެރަލް މެރިކް ގާރލޭންޑް ވެސް ޤަބޫލުފުޅު ކުރައްވަފާނެ ކަމެއްކަމަށް ވަރަށް ބޮޑަށް އުއްމީދު ކުރައްވާކަމަށް ކައިސް ވަނީ ވިދާޅުވެފައެވެ.
އެހެނަން މިހުށަހެޅުމަށް ޓްރަމްޕް ދެކޮޅުހެއްދެވީ، ވަކީލުންގެ ޓީމުގައި ހިމެނޭ، އެހެން ބައެއް ބޭފުޅުންގެ ޚިޔާލުތައް ޤަބޫލުކުރައްވައިގެން ކަމަށާއި، އެހެން ކަމުން ކައިސް ވެސް ފަހުން އެޚިޔާލު ދޫކޮށްލެއްވީ ކަމަށް ވޮޝިންޓަން ޕޯސްޓުން ބުނެފައިވެއެވެ.
އެފަރާތުން އިތުރަށް ބުނެފައިވަނީ ތަޙުޤީޤީ ޓީމުން ޓްރަމްޕް ގެންދަވާފައިވާ ލިޔުންތައް ހޯދުމާއި ހަމައަށް ދާންދެން އެބޭފުޅާވަނީ، އެބޭފުޅާގެ ވަކީލުންނަށް ވެސް އެކަން ސިއްރު ކުރައްވާފައެވެ. އެ ފޮށިތަކުގައި ހުންނާނީ ނޫސްކަރުދާހާއި އަންނައުނު އަދި ކަރުދާހަށް ޖަހާ ނަރުދަތި ފަދަ އެއްޗެއްހިކަމަށް ޓްރަމްޕް ވަނީ އެބޭފުޅުންގާތު ވިދާޅުވެފައެވެ.
3 ބިލިއަން ޑޮލަރުގެ ފީއަކަށް ޓްރަމްޕްގެ ވަކީލުންގެ ޓީމާއި ގުޅިވަޑައިގަތް ކައިސް އަކީ ފްލޮރިޑާގެ ކުރީގެ ސޮލިސިޓަރް ޖެނެރަލްކަން ވެސް ކުރައްވާފައިވާ ފަރާތެކެވެ. ޓަރަމްޕްގެ މައްސަލަ މިހާރު ކޯޓަށް ހުށަހެޅި ކުރިއަށްދާއިރު، މިކަމާއި ބެހޭގޮތުން އެއްވެސް އެއްޗެއް ވިދާޅުވުމަށް ކައިސްވަނީ ދެކޮޅުހައްދަވާފައި ކަމަށް ވެސް ވޮޝިންގޓަން ޕޯސްޓުން ވަނީ ބުނެފައެވެ.
ޓްރަމްޕް އެއްބަސްވެވަޑައި ނުގެންނެވުމުގެ ސަބަބުން ކުރިއަށް ނުގެންދެވުނު، މިފަދަ އެތައް ހުށަހެޅުމެއް ވަނީ މިހާތަނަށް ފާއިތުވެ ގޮސްފައެވެ. މިދިޔަ ހުކުރު ދުވަހު ޓްރަމްޕްގެ މައްޗަށް 30 އަށްވުރެ ގިނަ ދާޢުވާ އުފުލާފައިވާ، މައްސަލަ ކޯޓަށް ހުށަހެޅި އަޑުއެހުންތައް މިހާރު ކުރިއަށްދާއިރު، މި ދަޢުވާތަށް ސާބިތުވެއްޖެ ނަމަ، އެބޭފުޅާއަށް ޖަލުގައި ދިގުމުއްދަތެއް ހޭދަކުރައްވަން ޖެހިވަޑައި ގަންނަވާނެއެވެ.
މިހާރު ކޯޓުގައި ކުރިއަށްދާ މައްސަލައަކީ އެބޭފުޅާގެ ޙަޔާތުގައިވެސް ކުރިމަތިވި އެންމެ ނުރައްކާތެރި ޙާލަތުކަމަށް ތަޖުރިބާކާރުން ވިދާޅުވެއެވެ. އަންގާރަ ދުވަހު ބޭއްވުނު އަޑުއެހުމުގައި ޓްރަމްޕްވަނީ، އެބޭފުޅާގެ މައްޗަށް އުފުލިފައިވާ ދަޢުވާތަކަށް އިންކާރު ކުރައްވާފައެވެ. އަދި މައްސަލަތަކާއި ކުރިމަތިލައްވާނެ ކަމަށްވެސް ޓަރަމްޕްވަނީ ވަޢުދުވެވަޑައިގެންފައެވެ.
ޓްރަމްޕްގެ ކެމްޕޭނު މެނޭޖަރު ސްޓީވަން ޗަންގ ވެސް ދަނީ، ކުރީގެރައީސުންނަށް ޚާއްޞަ ގާނޫނު "ޕްރެސިޑެންޝަލް ރެކޯޑްސް އެކްޓް" އާއި ޓްރަމްޕް ދުވަހަކުވެސް ޚިލާފުވެވަޑައި ނުގަންނަވާކަމަށް ތަކުރާރުކޮށް ވިދާޅުވަމުންނެވެ.
ޤައުމީ ރަސްމީ ލިޔެކިޔުުންތަކާއިބެހޭ އިދާރާ ނެޝެނަލް އާކައިވްސް އިން 2021 ވަނަ އަހަރުގެ ފެބްރުއަރީ މަހު، ޓްރަމްޕް ގެންދަވާފައިވާ ލިޔުންތައް، އަނބުރާ ރައްދު ކުރުމަށް އެނގިފަހުން މިމަހުގެ ތެރޭގައި އެބޭފުޅާގެ މައްޗަށް ދަޢުވާތައް އުފުލުމާއި ހަމައަށް ވެސް، މިމައްސަލައިގައި ޓްރަމްޕް އިޚްތިޔާރު ކުރައްވާފައި ވަނީ ގޮތްދޫނުކުރެއްވުމެވެ.
ނަންހާމަކުރަން ބޭނުންނުވާ، މިކަމުގެ މަޢުލޫމާތު އެނގޭ ފަރާތްތަކުން ވަނީ މިމައްސަލައިގައި ޓްރަމްޕް އަމިއްލަފުޅަށް ރައްދު ކުރެއްވި އެއްވެސް ލިޔެކިޔުމަކާއި މެދެ އެބޭފުޅާގެ މައްޗަށް ދަޢުވާ އުފުލާފައި ނުވާކަން ވެސް ކަށަވަރު ކޮށްދެއްވާފައެވެ.