ހޯމް މިނިސްޓަރ އިމްރާނަށް ދަޢުވާ ކުރާ ދުވަސް ގާތްވަމުން ދާކަމުގައި ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ވިދާޅުވެއްޖެއެވެ.
ސީޕީ ހުސައިން ކުރެއްވި ފޭސްބުކް ޕޯސްޓެއްގައި ވިދާޅުވީ އޭނާގެ ބޮލުގައި މީހަކު މަރާލިކަމުގެ ތުހުމަތު އާންމު އެއްވުމެއްގައި އަޑުބާރުކޮށް، ހަޅޭއްލަވާ، ހެކިތަކެއް ހުރިކަމަށް ގޮވާ އެޅުވި ނުބައިނުލަފާ އިމުރާނުގެ މައްޗަށް ދަޢުވާ އުފުލާނެ ދުވަސް އެބަ ގާތްވާ ކަމުގައެވެ.
އެމްޑީޕީން 2015 ވަނަ އަހަރުގެ މެއި މަހުގެ 1 ވަނަ ދުވަހު މާލޭގައި ބޭއްވި މޭޑޭ މުޒާހަރާގައި އިމްރާން ވަނީ ޑރ.އަފްރާޝީމް އަލީގެ މަރާއި ކުރީގެ ރައީސް ޔާމީން އަބްދުލްޤައްޔޫމާއި، އަދި އޭރު ޓްއަރިޒަމް މިނިސްޓަރަކަށް ހުންނެވި އަހުމަދު އަދީބާއި، ސީޕީ ހުސައިން އާއި ގުޅޭ ލިޔުންތަކެއް އެބަހުރި ކަމަށް ބުނެފައެވެ.
މޭޑޭ މުޒާހަރާ އާއި ގުޅިގެން އިމްރާނަށް ޖަލު ހުކުމެއް އިއްވިއެވެ. ވެރިކަން ބަދަލުވުމުން އެހުކުމް ވަނީ ބާތިލް ކޮށްފައެވެ. ފަހުން އެނގުނު ގޮތުގައި އިމްރާން އެދުވަހު ދެއްކީ ހަވީރު ނޫހުގެ ވެބް ޕޭޖްތަކެއްގެ ޕްރިންޓްތަކެކެވެ. އެލިޔުންތަކާއި ގުޅޭ ގޮތުން ވެސް އިމްރާން ވަނީ އެތައް ފަހަރަކު އިތުރުފުޅު ހައްދަވާފައެވެ.
އެގޮތުން 2020 ވަނަ އަހަރުގެ އޮކްޓޯބަރު މަހުގެ 21 ވަނަ ދުވަހުގެ ރައްޔިތުން މަޖިލީހުގެ ޖަލްސާގައި މެންބަރަކު ސުވާލު ކުރުމުން އިމްރާން ވިދާޅުވީ ފުލުހުން އެލިޔުންތައް އޭނާ ހައްޔަރުކުރި ދުވަހު އަތުލާފައި ކަމަށެވެ. އެކަމަކު އިމްރާން ހައްޔަރު ކުރަން ފުލުހުން އެގެޔަށް ދިޔަ ދުވަހުގެ ވީޑިއޯއިން އެފަދަ މަންޒަރެއް ފެނިފައެއް ނުވެއެވެ. އެ މައްސަލައިގައި އެފަހުންވެސް އެހެން ވާހަކަތަކެއްވެސް އިމްރާން ދެއްކެވިއެވެ.
އެގޮތުން ދިވެހިރާއްޖޭގެ އަޑުން 2020 ވަނަ އަހަރުގެ އޮކްޓޯބަރު މަހުގެ 24 ވަނަ ދުވަހުގެ ރޭ ގެނެސްދިން ”އަހާށޭ ބުނާނަން“ ޕްރޮގުރާމްގެ ބައިވެރިއެއްގެ ސުވާލަށް ދެއްވި ޖަވާބުގައި އިމްރާން ވިދާޅުވީ މޭޑޭ މުޒާހަރާގައި އޭނާ ދެއްކެވީ ސިޔާސީ ވާހަކަތަކެއް ކަމުގައެވެ.