ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޓެކްނިކަލް ޑިރެކްޓަރުގެ މަޤާމަށް ބަންގްލަދޭޝްގެ ފުޓްބޯޅަ ފެޑަރޭޝަނުގެ ކުރީގެ ޓެކްނިކަަލް ޑިރެކްޓަރު ޕޯލް ތޯމަސް ސްމޯލީ ހަމަޖައްސައިފިއެވެ.
އިންގްލަންޑްގެ ސްމޯލީ އެންމެ ފަހުން މަސައްކަތް ކޮށްފައިވަނީ ބަންގްލަދޭޝް ފުޓުބޯޅަ ފެޑަރޭޝަނުގައެވެ. ޕޯލް ވަނީ މީގެ ކުރިން ބުރޫނާއި ދާރުއްސަލާމާއި، ބަންގްލަދޭޝްގެ އަންހެން ޤައުމީ ޓީމާއި، އެ ޤައުމުގެ 20 އަހަރުގެ ދަށުގެ ޓީމަށް ކޯޗުކަންކޮށްދީފައެވެ.
އެފްއޭއެމުގެ ޓެކްނިކަލް ޑިރެކްޓަރުގެ މަޤާމަށް ސްމޯލީ ހަމަޖެއްސިކަން އިއުލާނުކުރައް ޤައުމީ ފުޓްބޯޅަ ދަނޑުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ އިދާރާގެ ރައީސް ބައްސާމް އަދީލް ޖަލީލް ވިދާޅުވީ، ޓެކްނިކަލް ޑިރެކްޓަރުގެ މަޤާމަށް ސްމޯލީ ހަމަޖެއްސީ އަހަރު ދުވަހުގެ މަޝްވަރާއަށްފަހުގައި ކަމަށެވެ. އަދި ސްމޯލީއަކީ މި ސަރަޙައްދުގެ ފުޓްބޯޅަ ވަރަށް ރަނގަޅަށް އެނގޭ ފަރާތެއް ކަމަށާއި، އުއްމީދަކީ އޭނާއާއެކު ފުޓުބޯޅައިގެ ޓެކްނިކަލް ގިނަ މަސައްކަތްތަކެއް ކުރެވިގެންދިޔުން ކަމަށްވެސް ވިދާޅުވިއެވެ.
ބައްސާމް ވިދާޅުވީ ސްމޯލީގެ މުސާރައަކީ ގަތަރު ފުޓްބޯޅަ ފެޑަރޭޝަނުގެ ސްޕޮންސަޝިޕެއްގެ ދަށުން، އެ ފެޑަރޭޝަނުން ދައްކާނެ އެއްޗެއް ކަމަށާއި، އެހެންކަމުން ސްމޯލީގެ މުސާރައިގެ ކަންކަމުގައި އެފްއޭއެމުން ވިސްނަން ނުޖެހޭނެ ކަމަށެވެ. އަދި އެފްއޭއެމާއި ގަތަރު ފުޓްބޯޅަ ފެޑަރޭޝަނުން އޭނާގެ މުސާރައިގެ އަދަދު ހާމަކުރަން ބޭނުންނުވާ ކަމަށްވެސް ބައްސާމް ވިދާޅުވިއެވެ.
ބަންގްލަދޭޝް ފުޓްބޯޅަ އިދާރާގެ ޓެކްނިކަލް ޑިރެކްޓަރުގެ މަޤާމުގައި ސްމޯލީ ހުރިއިރު، އޭނާގެ މުސާރައަކީ ފަނަރަ ހާސް ޑޮލަރެވެ.
ސްމޯލީއަކީ އެފްއޭއެމްގެ ރައީސް ބައްސާމުގެ ދައުރުގައި ރާއްޖޭގައި މަސައްކަތްކުރާ ބޭރުގެ ތިންވަނަ ޓެކްނިކަލް ޑިރެކްޓަރެވެ. ބައްސާމުގެ ފުރަތަމަ ދައުރުގައި ތުރުކީގެ ޖޭން ވަންލީ ޓެކްނިކަލް ޑައިރެކްޓަރަކަށް ހަމަޖެއްސިއިރު، އެ ދައުރުގެ ފަހުކޮޅުގައި ޖުދާން އަލީ ވަނީ ހަމަޖައްސާފައެވެ.