2010 ވަނަ އަހަރުން ފެށިގެން ނައިފަރުގައި ތުއްތުކުދިންނަށް ޤުރުއާން ކިޔަވައި ދިނުމުގެ މަސައްކަތް ކުރަމުން އަންނަ ޖަމްޢިއްޔަތުއް ތައިސީރު މިއީ، ޚާއްޞަ އެހީ އަށް ބޭނުންވާ ކުދިންނަށް ޤުރުއާން ކިޔަވައި ދިނުމުގައި ވެސް ވަރަށް ތަޖުރިބާ ކާރު، އަދި އެތަށް ކާމިޔާބީއެއް މިކަމުގައި ހޯދައިފައިވާ ޖަމްޢިއްޔާ އެކެވެ.
މިފަދަ ބައެއް ދަރިވަރުންގެ ބެލެނިވެރިން އެ ފަރާތާއިމެދު ފާޅު ކުރައްވަމުން ދަނީ ވަރަށް ވެސް އުފާވެރި އުއްމީދީ ޝުޢޫރުތަކެކެވެ.
އުޞޫލެއްގެ ގޮތުން އަޅުގަނޑުމެން ޚާއްޞަ އެހީއަށް ބޭނުންވާ ކުދިންނާއި، ފީދެއްކުމުގައި ދަތިތައް ކުރިމަތިވާ ކޮންމެ ކުއްޖަކަށް ވެސް ހަމަ ހިލޭ މި ކްލާސް ނަގައިދެނީ.
ހުވަދޫ މީޑިއާ އަށް ފޯނުން މަޢުލޫމާތު ދެއްވަމުން ޖަމްޢިއްޔާގެ މަސްއޫލުވެރިޔާ ޢަބްދުﷲ ޢަބްދުލް ޙަކީމް ވިދާޅުވިއެވެ.
މަޤްޞަދަކީ ޚާއްޞަ އެހީއަށް ބޭނުންވާ އެއްވެސް ކުއްޖަކު ބާކީ ނުވުން ކަން ފާހަގަ ކުރައްވައި، ޖަމްޢިއްޔާގެ މަސްއޫލުވެރިޔާ އިތުރަށް ވިދާޅުވީ، އަޑުއިވުމުން މަޙްރޫމު ވެފައިވާ ކުދިންނަށާއި، ހިނގާބިނގާވެ އުޅުމުގައި ދަތިތައް ކުރިމަތިވާ ކުދިންނަށާއި، ގަލަން ހިފުމުގައި ދަތިކަން ހުންނަ ކުދިން އަދި ވާހަކަ ދެއްކުމުގައި ދަތިކަން ހުންނަ ކުދިންނަށް ވެސް މި ޖަމްޢިއްޔާއިން ކްލާސްތައް ނަގައިދޭކަމަށެވެ.
މި ފެށޭ ދިރާސީ އައު އަހަރު ނައިފަރު ކުއާޒާ އިންސްޓިޓިއުޓް އާއި ގުޅިގެން ވެސް ކްލާސްތަށް ފެށުމަށް މިހާރު ވަނީ ހަމަޖެހިފައި ކަމަށް ޖަމްޢިއްޔަތުއް ތައިސީރުން މަޢުލޫމާތު ދެއްވައެވެ.
ޅ. ނައިފަރުގައި ޤްރުއާން ކްލާސް ހިންގަމުންދާ މި ޖަމްޢިއްޔާއިން އެކި ރަށްރަށަށް ދަތުރުތަށް ކޮށް، އެރަށްރަށުގައި ވެސް ޚާއްޞަ ސެޝަންތަށް ނަގައިދެއެވެ. މިކަން ހަމަޖެއްސުމަށް އެރަށްރަށުގެ ކައުންސިލް ނުވަތަ ސްކޫލުގެ ފަރާތުން ޖަމްޢިއްޔާއަށް ގުޅުއްވުމުން އެކަން ހަމަޖެހިގެން ދާނެ ކަމަށް އެފަރާތުން ވިދާޅުވެއެވެ.
ރަށްރަށުގައި ނަގައިދޭ ސެޝަންތައް ރޭވިފައިވަނީ 3 ދުވަހުން ތަޖްވީދުގެ ޢާއްމު ޤަވާއިދު އެއްކޮށް ކިޔަވައިދޭ ގޮތަށެވެ. 3 ދުވަހުގެ ތެރޭގައި ކޮންމެ ދުވަހަކު 5 ސެޝަންގެ އުޞޫލުން ޖުމްލަ 15 ސެޝަން އެފަރާތުން ފުރިހަމަ ކޮށްދެއެވެ.
މި މަސައްކަތް ކުރަމުންދާތާ 14 އަހަރަށްވުރެ ގިނަ ވެފައިވާ މި ޖަމްޢިއްޔާއިން ތަޢުލީމު ޙާޞިލްކުރި 3 ދަރިވަރަކު މުދައްރިސުންގެ ގޮތުގައި އެތަނުގައި މިހާރު މަސައްކަތް ކުރަމުން ދިއުމަކީ އެފަރާތަށް ލިބުނު ބޮޑު ކާމިޔާބީއެއްގެ ގޮތުގައި އެ ޖަމްޢިއްޔާއިން ފާހަގަ ކުރެއެވެ.
ތައިސީރު ޤުރުއާން ކްލާހުގައި ބައިވެރި ވެވޭނެ އެންމެ ހަގު ޢުމުރަކީ 2 އަހަރެވެ. އޮންލައިންކޮށް ކިޔަވައިދޭ އެންމެ ހަގު ޢުމުރަކީ 5 އަހަރެވެ.
ޖަމްޢިއްޔަތުއް ތައިސީރުން ހިންގާ ޤުރުއާން ކުލާސް މެދުވެރިވެ އެކިއެކި ރަށްރަށުގައި ބާއްވާ ޤުރުއާން މުބާރާތްތައް ޖަޖުކޮށްދިނުމުގެ ޚިދުމަތް ވެސް އެފަރާތުން ދެއްވައެވެ.
މި ޖަމްޢިއްޔާއާއި ގުޅުމަށްޓަކައި އެބޭފުޅުންގެ ރަސްމީ ފޭސްބުކް ޕޭޖު ބޭނުން ކުރެއްވުމުން އެކަން ހަމަޖެހިގެން ދާނެކަމަށް އެފަރާތުން މަޢުލޫމާތު ދެއްވައެވެ.