ހައިކޯޓަށް ހާޒިރުވަނީ އެއްލައްކަ އެތައްހާސް ރައްޔިތެއްގެ ޙައްޤު ހޯދަން: އިދިކޮޅު
ދިވެހި ރާއްޖޭގެ ހައިކޯޓުގައި މަޑުޖެހިފައިވާ އިދިކޮޅުގެ ރިޔާސީ ކެނޑިޑޭޓް ރައީސް އަބްދުﷲ ޔާމީން އަބްދުލް ޤައްޔޫމްގެ އިސްތިއުނާފު މައްސަލއިގައި އިދިކޮޅުން ހައިކޯޓަށް ހާޒިރުވަނީ އެންމެ މީހެއްގެ މަސްލަޙަތު ހިމެނޭ ކަމެއްގައި ނޫންކަމަށާއި، ރައީސް ޔާމީންގެ މައްސަލައިގެ އަޕްޑޭޓް ހޯދުމަށް ހައިކޯޓަށް ހާޒިރުވަނީ އެއްލައްކަ އެތައްހާސް ރައްޔިތެއްގެ ޙައްޤު ހޯދަން ކަމަށް އިދިކޮޅު ކޯލިޝަން ހިންގެވުމާއި ވަގުތީގޮތުން ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް (އަދުރޭ) ވިދާޅުވެއްޖެއެވެ.
އަދުރޭ މިފަދައިން ވިދާޅުވީ ރައީސް ޔާމީންގެ އިސްތިޢުނާފް މައްސަލަ ދިވެހި ރާއްޖޭގެ ހައިކޯޓުގައި މަޑުޖެހިފައިވާތީ އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިއަދު ހައިކޯޓަށް ހާޒިރުވުމަށްފަހު މީޑިއާތަކަށް މަޢުލޫމާތު ދެއްވަމުންނެވެ.
އަދުރޭ ވަނީ މިއީ ރައީސް އިބްރާހިމް މުޙައްމަދު ޞޯލިހު ގަސްތުގައި ރާވައިގެން ދިވެހި ރާއްޖޭގެ އާބާދީގެ ދެބައިކުޅަ އެއްބަޔަށްވުރެ ގިނަ މީހުންނަށް އަނިޔާދިނުމަށް ކުރާ ކަމެއްގޮތުގައި ސިފަކުރައްވާފައެވެ.
”މިއީ ރައީސް އިބްރާހިމް މުޙައްމަދު ޞޯލިހު ގަސްތުގައި ރާވައިގެން ދިވެހި ރާއްޖޭގެ އާބާދީގެ ދެބައިކުޅަ އެއްބަޔަށްވުރެ ގިނަ މީހުންނަށް އަނިޔާދިނުމަށް ކުރާ ކަމެއް. އަޅުގަނޑުމެން ހައިކޯޓަށް ހާޒިރުވަނީ އެންމެ މީހެއްގެ މަސްލަޙަތު ހިމެނޭ ކަމެއްގައެއް ނޫން. މިކަން މިކުރަނީ އެއްލައްކަ އެތައްހާސް ރައްޔިތެއްގެ ޙައްޤު ހޯދަން“ އަދުރޭ ވިދާޅުވިއެވެ.
ހައިކޯޓުގައި ރައީސް ޔާމީންގެ އިސްތިއުނާފް މައްސަލަ ޕާކު ކޮށްފައިވާތީ މައްސަލައިގެ އަޕްޑޭޓެއް ހޯދުމަށް އިދިކޮޅު ލީޑަރޝިޕް ވަނީ ހައިކޯޓަށް ހާޒިރުވީ ނަމަވެސް އެ މައްސަލައިގެ އެއްވެސް އަޕްޑޭޓެއް ދީފައެއް ނުވެއެވެ. ހައިކޯޓުގެ ރިސެޕްޝަނުން އިދިކޮޅު ކޯލިޝަނަށް ދެއްވި ޖަވާބަކީ ރައީސް ޔާމީންގެ އިސްތިއުނާފް މައްސަލައާއި ގުޅޭ ޑިޕާޓްމެންޓްގެ އެއްވެސް ބޭފުޅަކު މިއަދު އޮފީހަށް ހާޒިރުވެފައި ނުވާކަމަށާއި، އެ މައްސަލައިގެ އިތުރު އަޕްޑޭޓެއް ދެވެން ނެތްކަމަށެވެ.
މިކަމާއި ގުޅިގެން ކަންބޮޑުވުން ފާޅުކުރައްވަމުން އަދުރޭ ވިދާޅުވީ ފެންނަމުންދަނީ ރައީސް ޔާމީންގެ މައްސަލަ ހިނގިޔަ ނުދިނުމަށް މަސައްކަތް ކުރަމުންދާތަން ކަމަށެވެ. އޭނާ ވިދާޅުވީ މިއީ ރައީސް ޞޯލިހުއަށް ރައީސް ޔާމީން އާއި ވާދަކުރައްވަން ކެރިވަޑައި ނުގަންނަވާތީ ގަދަކަމުން ދެވަނަ ދައުރެއް ހޯދުމަށްޓަކާ ކުރަމުންދާ ކަމެއް ކަމަށެވެ.
މީގެ އިތުރުން އަދުރޭ ވިދާޅުވީ ދިވެހި ރާއްޖޭގެ ފަނޑިޔާރުންނަށް ވަރަށް އިޙްތިރާމް ކުރައްވާ ކަމަށާއި، އެހެންނަމަވެސް މާތްﷲ ގަންދީ ހުވާކޮށްގެން ތިއްބަވައިގެން މިފަދަ ކަންކަން ކުރުމަކީ ހިތާމަ ކުރަންޖެހޭ ކަމެއް ކަމަށާއި ވަރަށްބޮޑު ކަންބޮޑުވުމެއް ކަމަށެވެ. އަދި ފަނޑިޔާރުންނަކީ އެއްވެސް ނުފޫޒެއްނެތި މައްސަލަތައް ނިންމަންތިބޭ ބަޔަކަށް ވީއިރު، މިފެނުނީ ރައީސް ޔާމީންގެ މައްސަލަ ނިމެން 2 ދުވަހަށް ވެފައިވަނިކޮށް ފަނޑިޔާރުން ޗުއްޓީ ނެންގެވި މަންޒަރު ކަމަށާއި، މިއީ ސީދާ ރައީސް އިބްރާހިމް މުޙައްމަދު ޞޯލިހު އަޑީގައި ހުންނަވައިގެން ހިންގަވާ ކަމެއް ކަމުގައި އަބްދުއްރަހީމް ތުހުމަތު ކުރެއްވިއެވެ.
އަދުރޭ ވިދާޅުވީ މިއީ އެއްގޮތަކަށްވެސް ފަނޑިޔާރުންގެ މަސްޢޫލިއްޔަތާއި ބެހުން ނޫންކަމަށާއި، މިކަމުގައި އިދިކޮޅުގެ ޒިންމާއެއް ވާކަމާއި، އެ ޒިންމާ އަދާކުރަން މަޖުބޫރު ކަމަށެވެ. އަދި މި މައްސަލައަކީ ވަގުތުން ބައްލަވަންޖެހޭ މައްސަލައެއް ކަމަށް ޤަބޫލުކުރައްވާ ކަމަށާއި، މި މައްސަލަ މަޑުޖެހިފައި އޮތުމުން އިންތިހާއަށް ކަންބޮޑުވުން އޮތްކަމަށެވެ.
ރައީސް ޔާމީންގެ އިސްތިއުނާފް މައްސަލަ ދިވެހި ރާއްޖޭގެ ހައިކޯޓަށް ވައްދާފައިވަނީ ފެބްރުއަރީ މަހުގެ 23 ވަނަ ދުވަހުއެވެ. މިހާތަނަށް 2 އަޑުއެހުމެއް ކުރިއަށް ގެންގޮސްފައިވާއިރު، އެންމެ ފަހުން އޮތް އަޑުއެހުން ބޭއްވުމަށް ތާވަލްކުރުމަށް 2 ދުވަހަށް ވެފައިވަނިކޮށް ފަނޑިޔާރުން ވަނީ ޗުއްޓީއަށް ވަޑައިގެންފައެވެ. އެއާއިއެކު ރައީސް ޔާމީންގެ އިސްތިއުނާފް މައްސަލަ މިވަނީ ޕާކުކުރެވިފައެވެ. އަދި އެމަނިކުފާނަށް އަންނަ ރިޔާސީ އިންތިޚާބުގައި ވާދަކުރުމުގެ ފުރުޞަތުވެސް ވަނީ ހަނިވެފައެވެ.