ރިޔާސީ އިންތިހާބު ކާމިޔާބު ވާނޭ ކަމުގެ އުންމީދެއް އޮތް ނަމަ ދަ ޑިމޮކްރެޓްގެ ގެ ރިޔާސީ ކެންޑިޑޭޓްއަކަށް އެ ޕާޓީން ނެރޭނީ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) ވިދާޅުވެއްޖެއެވެ.
އޭނާ ކުރެއްވި ޓުވީޓެއްގައި ވިދާޅުވީ، ދަ ޑިމޮކްރެޓްސްއިން ރިޔާސީ ކެންޑިޑޭޓްއެއްގެ ގޮތުގައި ނެރުނު، އިލްޔާސް ލަބީބްއަކީ، ސިރިޔަސް ކެންޑިޑޭޓްއެއް ނޫންކަން އައްޑޫގެ ރައްޔިތުން ވިސްނަން ޖެހޭނެ ކަމަށެވެ. އަދި އިލްޔާސްއަކީ ސިޔާސީ ގޮތުން ނަޝީދު އަނެއްކާވެސް ގުރުބާން ކުރާ ކަންބަޅިއެއް ކަމަށް އިބްރާހިމް ޝަރީފް ވިދާޅުވެފައިވެއެވެ.
މި ހިނގާ 19 ވަނަ ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސް (އެސްއޯއީ) ކޮމިޓީގެ މުގައްރިރުކަން އިލްޔާސް ވަނީ ކުރައްވައިފައެވެ.
ނަމަވެސް، މި ސަރުކާރާ ދެކޮލަސް އިލްޔާސް މަސައްކަތްކުރައްވަން ފެއްޓެވުމުން މުގައްރިރުކަމުން އޭނާ ވަނީ ވަކިކޮށްފައެވެ.
އަންނަ ސެޕްޓެމްބަރ މަހުގެ ނުވަވަނަ ދުވަހު ބާއްވާ ރިޔާސީ އިންތިހާބުގައި އިލްޔާސް ދެވަނަ ބުރަކަށް ވަޑައިގަންނަވާނޭ ކަމަށް ނަޝިދުވަނީ ވިދާޅުވެފައެވެ.