މީސްތަކުންގެ ތެރޭގައި ހެޔޮކަމުގެ ތަޅުދަނޑިތަކާއި ނުބައި ކަމުގެ ތަޅުތަކެއް ވާކަމަށާއި، އޭގެ ތެރެއިން އެންމެ ހެޔޮވެގެންވާ ހެޔޮ ކަމުގެ ތަޅުދަނޑިއަކީ، ފައިދާހުރި ޢިލްމު އުނގަންނައިދިނުމާއި، އެ ޢިލްމު ފެތުރުންކަމަށް މިއަދުގެ ޚުޠުބާގައި ބުނެފިއެވެ.
ހެޔޮކަމުގެ ތަޅުދަނޑިއަށް އަމާޒުކޮށްގެން މިއަދު އިއްވި ދިން ޚުޠުބާގައި، ވަނީ ހެޔޮކަމުގެ ތަޅުދަނޑި ޚާޞިލްކުރެވޭނެ އެތައް ގޮތްތަކެއް އަހަރެމެންނަށް ބުނެދީފައެވެ. އެގޮތުން، މާތްﷲ އެމީހެއްގެ އަތްމަތީ ހެޔޮކަމުގެ ތަޅުދަނޑިތައް ލެއްވި މީހާއަށް އެތައް އުފާވެރިކަމާއި ބާއްޖަވެރިކަމެއްވާކަމަށް ޚުޠުބާގައި ފާހަގަކޮށްފައިވެއެވެ. ހަމައެފަދައިން، ނުބައި ކަމުގެ ތަޅުދަނޑި ލެއްވި މީހަކަށް އެތަކެއް ގެއްލުންތަކެއްވާ ކަމުގައިވެސް ފާހަގަކޮށްފައިވެއެވެ.
އެގޮތުން ހެޔޮކަންތަކަށް ގޮވާލާ މީހުންގެ ތެރެއިން ވުމަށްޓަކައި، އެންމެ ފުރަތަމަ ކަމެއްގެ ގޮތުން، ތިމާގެ ޢަމަލުތަކާއި، ބަސްތަކުގައި އިކްލާސްތެރިވުމަށް ޚުތުބާގައި ބުނެފައިވެއެވެ. އަދި ކުރާ ކޮންމެ ކަމަކާއި، ކޮންމެ ޢަމަލެއް މާތްﷲއަށް ޚާސިލްކުރުމާއި، އެކަނލާންގެއަށް ޚާލިސްނުކޮށް ކުރާ އެއްވެސް ޢަމަލެއް މާތްﷲ ގަބޫލުފުޅު ނުކުރައްވާނެކަމަށް މިއަދު ޚުޠުބާގައި ފާހަގަކޮށްފައިވެއެވެ.
މީގެ އިތުރުން ހެޔޮކަންކަމުގެ ތަޅުދަނޑި ހާސިލްކުރަން އެދޭ މީހާ، މާތްﷲ ފްރްޟު ކުރައްވާފައިވާ ނަމާދުތަކާއި ދީނުގެ އެހެނިހެން ފަރްޟުތަކާއި ވާޖިބުތައް ބަރާބަރަށް އަދާކޮށް، މުންކަރާތްތަކުން ދުރުހެލިވާން ވާނެއެވެ. އަދި، މާތް ﷲގެ އަމުރުފުޅުތަކާއި އެއްގޮތަށް ޢަމަލުކޮށް، އެކަލާނގެއަށް ވެފައިވާ ޢަހްދަށް ވަފާތެރިވުމާއިއެކު، ފާޙިޝް ޢަމަލުތަކާއި ދުރުހެލިވާމީހާ، ހެޔޮކަމުގެ ތަޅުދަނޑިއެއް ކަމުގައި ލައްވައި ނުބައި ކަމުގެ ތަޅެއްކަމުގައި ލައްވާނެކަމަށް މިއަދު ޚުޠުބާގައި ބުނެފައިވެއެވެ.
އަދި ހަމައެހެންމެ ހެޔޮކަމުގެ ތަޅުދަނޑިއަކަށް ވާން އެދޭ މީހާ މަތިވެރި އަޚުލާޣުގެ ވެރިއަކަށް ވާން ޖެހޭނޭ ކަމަށް ޚުތުބާގައި ބުނެފައިވެއެވެ. އެގޮތުން މަތިވެރި އަޚުލާގުގެ ވެރިޔާ، އޭނާގެ ފަސްބައި ހަޑިހުތުރު ޢަމަލުތަކުން ކިލާކުރަން ބޭނުން ނުވާނޭ ކަމަށާއި، ރިވެތި އަޚުލާގުގެ ވެރިއަކަށް ވެވޭނީ، ރަނގަޅު އެކުވެރީންނާއި އަދި ރަނގަޅު މަޖިލީސްތަކަށް ގޮސްއުޅެގެން ކަމަށްވެސް ޚުޠުބާގައި ފާހަގަކޮށްފައިވެއެވެ.
ހެޔޮކަންކަމުގެ ތަޅުދަނޑިއަކަށްވާން އެދޭ މީހާ، އެހެން މީހުންނަށް ހެޔޮ ކަންކަމަށް ނސޭހަތްދީ، ތެދުމަގު ދައްކައި އުލޭ މީހަކަށް ވާންޖެހޭނޭ ކަމަށާއި، އަދި އަހަރެމެންނަކީ އެކަކު އަނެކަކަށް ހެޔޮ އަމަލުތައް ކުރުމަށް ނަސޭހަތްދޭ ބަޔަކަށް ވެއްޖެނަމަ، މުޖުތަމައުގެ ތެރޭގައި ހެޔޮ އަމަލުތައް ފެތުރިގެންދާނެ ކަމަށްވެސް ޚުޠުބާގައި ބުނެފައިވެއެވެ.
މީގެ އިތުރުން ތަޢުލީމަކީ އެންމެ މުހިންމު ތަޅުދަނޑިކަން ފާހަގަކޮށް، ހުރިހާ ކަމެއްގެ އަސާސަކީ ޝަރުއީ ގިއުގަޑުގެ ތެރޭގައި ދެވޭ ރަނގަޅު ތައުލީމު ކަމަށާއި، އަދި ޒަމާނީ ކުރުމޖގެ ނަމުގައި ވިޔަސް ތައުލީމު އެ ގިއުގަޑުން ބޭރުވެދިޔަ ދީގެން ނުވާނެ ކަމަށް ޚުޔުބާގައި ބުނެފައިވެއެވެ.
އަދި މުސްލިމުންގެ ނަމޫމާއަކަށް ވާންޖެހޭނީ ހެޔޮ އަމަލުތައްކަން ފާހަގަކޮށް، މުސްލިމުންގެ ހައިސިއްޔަތުން، އަހަރެމެންގެ އާދަކާދަތަކާއި، ބުނާ ބަސްތަކާއި، އަކުލާގު އިސްލާޟް ދީނުގެ އެބޫލުތަކާއި އެއްގޮތަށް ބައްޓަންކުރަންޖެހޭ ކަމަށްވެސް މިއަދުގެ ޚުޠުބާގައި ބުނެފައިވެއެވެ.