ދަށު ކޯޓްއަކުން އިއްވާފައިވާ ހުކުމަކުން ރިޔާސީ އިންތިހާބުގައި ވާދަކުރުމަށް ރައީސް އަބްދުﷲ ޔާމީންއަށް ހުރަސްއެޅިގެން ނުވާނޭ ކަމަށާއި، އޭގެ ސަބަބުން އިންތިހާބުގައި ވާދަކުރުމުގެ ހައްގުތައްވެސް ހަނިވެގެން ވާނެ ކަމަށް ގަބޫލުނުކުރައްވާ ކަމަށް އެމަނިކުފާނުގެ ގާނޫނީ ވަކީލުންގެ ޓީމްއިން މިއަދު ސްޕްރީމް ކޯޓްގައި ވިދާޅުވެއްޖެއެވެ.
އެމަނިކުފާނުގެ ގާނޫނީ ވަކީލުންގެ ޓީމްއިން މިހެން ވިދާޅުވެފައި މިވަނީ، އަންނަ ސެޕްޓެމްބަރ މަހުގެ ނުވަވަނަ ދުވަހު ބާއްވާ ރިޔާސީ އިންތިހާބުގައި ވާދަކުރެއްވުމަށް ނިންމަވައި، ޔާމީންގެ ކެންޑިޑެންސީ ފޯމް އިލެކްޝަންސް ކޮމިޝަން އަށް ހުށަހެޅި ނަމަވެސް އީސީން އެ ފޯމް ބަލައި ނުގަތުމާއި ގުޅިގެން، އެމަނިކުފާނުގެ ފަރާތުން ހުށަހެޅުއްވި ދުސްތޫރީ މައްސަލައާއި ގުޅިގެން މިއަދު ކުރިއަށް ގެންދާ ޝަީއަތުގެ އަޑުއެހުމުގައެވެ.
އީސީން އެގޮތަށް ނިންމާފައިވަނީ ވ. އާރަށް މައްސަލައިގައި ރިޝްވަތާއި މަނީލޯންޑްރިންގެ މައްސަލައެއްގައި ޔާމީންގެ މައްޗަށް 11 އަހަރުގެ ޖަލު ހުކުމެއް އައިސްފައި އޮތުމުންނެވެ. ގާނޫނުއަސާސީގެ 109 ވަނަ މާއްދާގެ (ޅ) ގައި ބުނާ ގޮތުން ރައިސުލްޖުމްހޫރިއްޔާގެ މަގާމަށް ކުރިމަތިލާ މީހާއަކީ 12 މަސް ދުވަހަށްވުރެ ދިގު މުއްދަތެއްގެ ހުކުމެއް ތަންފީޒުކުރަމުންދާ މީހަކަށް ވެގެން ނުވާނެއެވެ.
ސުޕްރީމް ކޯޓުގައި އޮތް އަޑުއެހުމުގައި ޔާމީންގެ ވަކީލް ހަމްޒާ ލަތީފް ވިދާޅުވީ 12 މަހަށް ވުރެ ދިގު މުއްދަތުގެ ހުކުމެއް އެމީހެއްގެ މައްޗަށް އިއްވާ ހުކުމުން މިންޖުވާ ދެ ގޮތެއް ބަޔާން ކުރެވިފައިވާ ކަމަށެވެ. އެއް ގޮތަކީ ހުކުމް ތަންފީޒުކޮށް ނިމުން އަދި ހުކުމަށް މާފް ލިބިދިނުން ކަމަށެވެ.
މީގެ އިތުރުން، އޭނާ ވިދާޅުވި ގޮތުގައި، އިސްތިއުނާފީ މަރުހަލާގެ ހުލކުމް ބާޠިލްކުރެވޭނަމަ، އެއީ ހުކުމްގެ ސަބަބުން ގެއްލިގެންދާ އިންތިހާބީ ހައްގު އަލުން ލިބިދެވޭނޭ ގޮތއް ނޫން ކަމަށް ތިލަކޮށް މާނަކުރާތީ އެއި ގާނޫން އަސާސީގެ 69 މާއްދާގައި ބުނާ މުޅި ހައްގު ނިގުޅައިގަނެވިދާނެ މާނަ ކުރުމެއް ކަމަށެވެ.
“އެހެންވީމަ ދެ ހާލަތުން ކުރެ ހާލަތެއް ނެތް ގޮތަކަށް މިވަގުތު މާނަ ކުރަމުން ގެންދަވާތީވެ އެއީ އެ މާއްދާގައި އެންމެ ރަނގަޅު މާނަ ކުރުން ކަމުގައި އަޅުގަނޑު ނުދެކެން،” ހަމްޒާ ވިދާޅުވިއެވެ.
ގާނޫނުއަސާސީގެ 69 ވަނަ މާއްދާގައި ބުނެފައި ވަނީ އެ ގާނޫނުއަސާސީގައި ބަޔާންކޮށްފައިވާ އެއްވެސް ހައްގަކަށް ނުވަތަ މިނިވަންކަމަށް އުނިކަމެއް ލިބޭ ފަދަ އަމަލެއް ކުރުމުގެ ނުވަތަ އެފަދަ އަމަލެއްގައި ބައިވެރިވުމުގެ ހައްގު އެއްވެސް މީހަކަށް ނުވަތަ ޖަމާއަތަކަށް ނުވަތަ ދައުލަތަށް ލިބޭނެ ފަދަ ގޮތަކަށް ގާނޫނުއަސާސީގައި ހިމެނޭ އެއްވެސް މާއްދާއެއް މާނަކޮށް ނުވަތަ ތަރުޖަމާކޮށްގެން ނުވާނެ ކަމަށެވެ.
މި މައްސަލައިގައި ޔާމީންގެ ވަކީލުން އެދިވަޑައިގެންފައި ވަނީ އިލެކްޝަންސް ކޮމިޝަންގެ ނިންމުމަކީ ބާތިލް ނިންމެވުމެއް ކަމަށް ކަނޑައަޅައި ދިނުމަށެވެ. އަދި ޔާމީނަކީ މި އަހަރުގެ ރިޔާސީ އިންތިހާބުގައި ވާދަކުރެއްވުމުގެ ޝަރުތު ހަމަވާ ބޭފުޅެއް ކަމުގައި ކަނޑައަޅައި ދެއްވުމަށާއި އިންތިހާބުގައި ބައިވެރިވުމަށްޓަކައި ހުރިހާ އިންތިޒާމުތަކެއް ހަމަޖައްސައި ދެއްވުމަށްޓަކައި އިލެކްޝަންސް ކޮމިޝަނަށް އަންގަވައި ދެއްވުމަށް ވެސް ވަކީލުން އެދިވަޑައިގެންފައިވެއެވެ.
މީގެއިތުރުން ސުޕްރީމް ކޯޓުން ނިންމާ ނިންމުމެއްގެ ސަބަބުން ޔާމީންގެ ކެންޑިޑެސީ ހުށަނޭޅޭ ހާލަތެއްގައި ޕީޕީއެމަށް އިތުރު ހުށަހެޅުމެއް ހުށަހެޅުމުގެ ފުރުސަތު ދިނުމަށް ވެސް އެދިވަޑައިގެންފައިވެއެވެ. އަދި ޔާމީންގެ އިތުރު ހުށަހެޅުމެއް ހުށަހަޅަން ޖެހޭ ހާލަތެއްގައި އެ ހުށަހެޅުން ހުށަހެޅުމަށް ސުޕްރީމް ކޯޓުން ފުރުސަތު ދެއްވުމަށް ވެސް ޔާމީންގެ ވަކީލުން އެދިވަޑައިގެންފައިވެއެވެ.