އިބޫނޫން ގޮތެއް ހޯދަން މުޢިއްޒު އިންތިޚާބު ކުރުމަށް ޖަމީލް އިލްތިމާސް ކުރައްވައިފި

މަރިޔަމް ޝިއުނާ ، ހުވަދޫ މީޑިއާ12 Aug 2023

އިބޫނޫން ގޮތެއް ހޯދަން މުޢިއްޒު އިންތިޚާބު ކުރުމަށް ޖަމީލް އިލްތިމާސް ކުރައްވައިފި

ކުރިއަށްއޮތް ރިޔާސީ އިންތިޚާބުގައި މިހާރުގެ ރައީސުލް ޖުމްހޫރިއްޔާ އިބްރާހިމް މުޙައްމަދު ޞޯލިހު ބަލިކުރުމަށް ނުވަތަ (އިބޫ ނޫންގޮތެއް) ހޯދުމަށް އެންމެން ގުޅިގެން ޕީއެންސީގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު އިންތިޚާބުކުރަން މަސައްކަތްކުރުމަށް ޕީޕީއެމްގެ ސްޕެޝަލް އެޑްވައިޒަރ އަދި ރައީސް ޔާމީންގެ ސަރުކާރުގެ ފުރަތަމަ ނައިބު ރައީސް ޑރ. މުޙައްމަދު ޖަމީލް އަޙުމަދު ވިދާޅުވެއްޖެއެވެ.

ޕްރޮގްރެސިވް ކޮންގްރެސް ކޯލިޝަންގެ ލީޑަރ އަދި ކުރީގެ ރައީސް ޔާމީންގެ ދިފާޢީ ވަކީލްގެ ގޮތުގައިވެސް މަސައްކަތް ކުރައްވަމުން އަންނަ ޑރ. ޖަމީލް މިފަދައިން ވިދާޅުވީ މިއަދު ކުރެއްވި ޓްވީޓެއްގައެވެ.

ޑރ. މުޢިއްޒު އަދި ރަނިންމޭޓް ހުސައިން ގެ ކެމްޕޭން ޕޯސްޓެއް ޓްވިޓާގައި ހިއްސާ ކުރައްވާ ޑރ. ޖަމީލް ވިދާޅުވީ އެކުވެރިކަމަކީ ގަދަފަދަ ބާރެއް ކަމަށާއި، ރައީސް ޞޯލިހުގެ ޙައްދެއް ނެތް އަނިޔާގެ ޓާގެޓަކަށް ވީ ރައީސް ޔާމީން ކަމާއި، އެއީ ވަރަށް ސާފުކަމެއް ކަމަށެވެ.

މިއާއިއެކު ޖަމީލް ވިދޅާުވީ މިވަގުތު އެންމެން ގުޅިގެން އިބޫނޫން ގޮތެއް ހޯދުމަށް ޑރ. މުޢިއްޒު އިންތިޚާބު ކުރުމަށް ހީވާގިކޮށް މަސައްކަތް ކުރުމަށް އިލްތިމާސްކުރައްވާކަމަށެވެ.

އަންނަ ސެޕްޓެމްބަރު މަހު 9 ވަނަ ދުވަހު އޮންނަ މިއަހަރުގެ ރިޔާސީ އިންތިޚާބުގެ ކެމްޕޭން އިދިކޮޅު ޕީޕީއެމް/ޕީއެންސީން ފަށާފައިވާއިރު އެ ކޯލިޝަންގެ ފަރާތުން ޕީއެންސީގެ ޓިކެޓުގައި އިންތިޚާބުގައި ވާދަކުރައްވަނީ ޕީޕީއެމްގެ ކުރީގެ ނައިބު ރައީސް އަދި މާލެ ސިޓީގެ މޭޔަރު ޑރ. މުޙައްމަދު މުޢިއްޒުއެވެ. މުޢިއްޒު އާއިއެކު ޕީއެންސީގެ ރަނިންގމޭޓްގެ ގޮތުގައި ވާދަކުރައްވަނީ ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ޙުސައިން މުޙައްމަދު ލަޠީފް (ސެމްބެ) އެވެ.

ޓެގް