ކުރިއަށްއޮތް ރިޔާސީ އިންތިޚާބަށް ޕީއެންސީގެ ރިޔާސީ ކެންޑިޑޭޓް އަތޮޅުތެރެއަށް ކުރައްވާ ދަތުރުފުޅުގެ ތެރެއިން އެންމެ ފުރަތަމަ މަންޒިލް ބޮޑުތިލަދުންމައްޗަށް ކުރެއްވި ދަތުރުފުޅުގައި ފެނިގެން ދިޔައީ ޕީޕީއެމް/ ޕީއެންސީގެ ސަރުކާރެއް ޤާއިމްކުރުމަށް ރައްޔިތުން ވަރަށްބޮޑަށް ބޭނުންވެފައިވާ މަންޒަރު ކަމަށް ޕީއެންސީގެ ރިޔާސީ ކެންޑިޑޭޓް އަދި މާލެ ސިޓީގެ މޭޔަރ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޑރ. މުޢިއްޒު މިފަދައިން ވިދާޅުވީ ބޮޑުތިލަދުންމައްޗަށް ކުރެއްވި ދަތުރުފުޅު ނިންމަވާލެއްވުމަށްފަހު އިއްޔެ މާލެ ވަޑައިގެންނެވުމަށްފަހު ކެމްޕޭނުގެ 2 ވަނަ މަންޒިލަށް މިއަދު ދަތުރު ފެއްޓެވުމުގެ ކުރިން އެއާޕޯޓްގައި ހުންނަވާ މީޑިއާތަކަށް ދެއްވި އިންޓަވިއުއެއްގައެވެ.
ހއ، އަދި ހދ އަށް ކުރި ދަތުރަކީ ވަރަށް ކާމިޔާބު ދަތުރެއްގެ ގޮތުގައި ފާހަގަކުރައްވަމުން މުޢިއްޒު ވިދާޅުވީ ބޮޑު ތިލަދުންމަތީގެ ރައްޔިތުންތިބީ ޕީޕީއެމް/ ޕީއެންސީގެ ސަރުކާރެއް ޤާއިމްކުރުމަށް ވަރަށްބޭނުންވެފައިކަން އިޙުސާސްކުރެވިގެން ދިޔަކަމަށެވެ. އެހެންކަމުން ޕީޕީއެމް/ޕީއެންސީ އޮތީ ރައްޔިތުންގެ އުންމީދުތައް ޙާސިލްކޮށްދިނުމުގެ ވަރުގަދަ ޢަޒުމުގައި ކަމަށް މުޢިއްޒު ވިދާޅުވިއެވެ.
”ރައްޔިތުންގެ ތަރުޙީބު އިރާދަ ކުރެއްވިއްޔާ ވަރަށްބޮޑަށް އެބައޮތް. ރައްޔިތުންގެ އުންމީދުތައް ވަރަށްބޮޑަށް ގުޅިފައި މިއޮތީ ޕީޕީއެމް/ ޕީއެންސީ އާ. އަޅުގަނޑުމެންގެ ސަރުކާރެއް ޤާއިމް ކުރުމަށް ރައްޔިތުން ވަރަށް ބޮޑަށް ބޭނުންވެފައިވާކަން ފެނިގެންދިޔައީ އެކަން އިހުސާސް ކުރެވިގެން ދިޔަ. އަޅުގަނޑުމެން މިތިބީ ރައްޔިތުންގެ އުންމީދުތައް ޙާސިލްކޮށްދިނުމުގެ ވަރުގަދަ ޢަޒުމުގަ“ ޕީއެންސީގެ ރިޔާސީ ކެންޑިޑޭޓް ޑރ. މުޢިއްޒު
ބޮޑު ތިލަދުންމަތީގެ ރަށްތަކެކޭ އެއްފަދައިން ކުރިއަށްއޮތް ދަތުރުގައިވެސް އެ ރަށްރަށުގެ ރައްޔިތުން އެދޭ ކަންކަން އޮޅުންފިލުވާ އެކަންކަމާއި ގުޅޭގޮތުން ވާހަކަ ދައްކަވާނެ ކަމަށް މުޢިއްޒު ވިދާޅުވިއެވެ.
ޑރ. މުޢިއްޒު އާއި ޓީމް މިއަދު ދަތުރު ފެއްޓެވީ ވ، މ، ފ، އަދި ދ އަތޮޅުގެ ބައެއް ރަށްރަށަށެވެ. އެގޮތުން މި ދަތުރުގެ ފުރަތަމަ މަންޒިލަކީ ދ. ކުޑަހުވަދޫއެވެ. މި ދަތުރުފުޅު ނިންމަވާލެއްވުމަށްފަހު އެނބުރި މާލެ ވަޑައިގަތުމަށް ހަމަޖެހިފައިވަނީ 19 އޯގަސްޓްގައެވެ.
ޕީޕީއެމް/ ޕީއެންސީގެ ރިޔާސީ ކެމްޕޭނު ދަތުރުގައި ޕީއެންސީގެ ރަނިންމޭޓް ޙުސައިން މުޙައްމަދު ލަޠީފް ވެސް ދަނީ ގއ، އަދި ގދ ގެ ބައެއް ރަށްރަށަށް ދަތުރު ކުރައްވަމުންނެވެ.