ކުރީގެ ރައީސް ޔާމީންގެ މައްޗަށް އިއްވާފައިވާ ޖަލު ހުކުމްގެ އިސްތިއުނާފު އަޑުއެހުން ޕިޖީން އެދިގެން ހައި ކޯޓުން ކެންސަލްކޮށްފިއެވެ.
ޔާމީނުގެ ވެރިކަމުގައި ހިނގި އެމްއެމްޕީއާރުސީގެ ހިޔާނާތުގެ ތެރެއިން ވ. އާރަށް ދޫކުރުމުގެ މުއާމަލާތުގެ ތެރެއިން ރިޝްވަތުގެ ގޮތުގައި އެއް މިލިއަން ޑޮލަރު ނަގައި އެ ފައިސާ ލޯންޑާކުރި ކަމުގެ ކުށް ސާބިތުވެ 11 އަހަރަށް ޖަލަށްލައި ފަސް މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ވަނީ ހުކުމްކޮށްފައެވެ.
އެ ހުކުމް ޔާމީންގެ ފަރާތުން ހައި ކޯޓުގައި އިސްތިއުނާފުކޮށްފައިވާއިރު، އެ މައްސަލައިގައި މިއަދަށް ތާވަލު ކުރި އަޑުއެހުން ކެންސަލް ކުރީ ދައުލަތުން އެދިގެންނެވެ. ޕީޖީ އޮފީހުން ބުނި ގޮތުގައި، އަޑުއެހުން ކެންސަލް ކުރަން އެދުނީ އެ މައްސަލައިގައި ވަކާލާތު ކުރާ ދައުލަތުގެ ބައެއް ވަކީލުން ބަލިވެ އުޅޭތީއެވެ. މިދިޔަ ހަފުތާ ވެސް މި މައްސަލައިގެ އަޑުއެހުމެއް ކުރިއަށް ގެންގޮސްފައެވެ.
މި މައްސަލާގެ ތެރެއިން ޖޫރިމަނާގެ ހުކުމުން މައްސަލާގައި ގޮތެއް ކަނޑައެޅެންދެން ފަސްކޮށްދީފައެވެ. ޖަލު ހުކުމް ވެސް ފަސްކޮށްދޭން ޔާމީންގެ ފަރާތުން އެދުނުނަމަވެސް، އެ އަމުރު ހައި ކޯޓުން ނެރެނުދެއެވެ.
އަންނަ މަހު ބާއްވާ ރިޔާސީ އިންތިހާބުން ޔާމީނަށް ފުރުސަތު ގެއްލިގެން ދިޔައީ ވެސް މި ޖަލު ހުކުމާއި ޖޫރިމަނާގެ އެމަނިކުފާނުގެ މައްޗަށް އޮތުމުންނެވެ.