ޤާނޫނުގައި ކަނޑައަޅާ ވަކި ޝަރުތުތަކެއް ފުރިހަމަވާ މީޑިއާތަކަށް ދައުލަތުގެ ބަޖެޓުން ވަކި އިންސައްތައެއް ކަނޑައެޅުމަށް އެމް.ޑީ.ޕީގެ ރިޔާސީ މެނިފެސްޓޯގައި ހިމަނައިފިއެވެ.
ކުރިއަށްއޮތް ރިޔާސީ އިންތިޚާބަށް “އުފާވެރި އަމާންރާއްޖެ” މި ނަމުގައި އެމް.ޑީ.ޕީއާއި ގުޅިފައިވާ ޕާޓީތަކުން އެކުލަވާލާފައިވާ މެނިފެސްޓޯގައި ދައުލަތް ހިންގުމާއި ޖަވާބުދާރީ ކުރުވަނިވި ނިޒާމު ހަރުދަނާކުރުމަށް ގިނަ ކަންތައްތަކެއް ހިމަނާފައިވެއެވެ. މީގެ ތެރޭގައި ކުރިއަށް ރާވާފައިވާ ކަންކަމުގެ ތެރޭގައި މީޑިއާގެ މިނިވަންކަން ކަށަވަރުކުރުމަށްޓަކާ މައިގަނޑު 7 ކަމެއް އެމް.ޑީ.ޕީއިން ހުށަހަޅާފައިވެއެވެ.
އެގޮތުން މީޑިއާތަކުގެ ސެލްފް ގަވަރނަންސް އަދި ރެޖިސްޓްރޭޝަން ޕްރޮސެސްގައި ހުރި މައްސަލަތައް ހައްލުކުރުމަށް މީޑިއާތަކާއި ގުޅިގެން މީޑިއާގެ ދަފްތަރުގައި ހުރި މައްސަލަތައް ހައްލުކުރުމާއި، މީޑިއާތަކުން ރައްޔިތުންނަށް ފޯރުކޮށްދޭ މައުލޫމާތަކީ ސައްހަ، ތެދު އަދި ވެރިފައިކުރެވިފައިވާ ޚަބަރުތަކާ މައުލޫމާތުތަކެއްކަން ކަށަވަރުކުރުމަށްޓަކައި، ހަރުދަނާ އިންތިޒާމުތައް މީޑިއާ ކައުންސިލުން ޤާއިމުކުރުމަށް މި މެނިފެސްޓޯގައި ހިމަނާފައިވެއެވެ.
މިކަންކަމުގެ ތެރޭގައި ހިމެނޭ އެންމެ މުހިންމު އެއްކަމަކީ މީޑިއާތަކަށް ދައުލަތުގެ ބަޖެޓުން ވަކި އިންސައްތައެއް ކަނޑައެޅުމެވެ.
އެމް.ޑީ.ޕީންގެ މެނިފެސްޓޯ 2023 ގައި ހުށަހަޅާފައިވަނީ މީޑިއާތަކުގެ މާލީ ޤާބިލުކަމަށް ވަކި ފަރާތަށް ބަރޯސާވުން ނައްތާލުމަށްޓަކައި ޤާނޫނުގައި ކަނޑައަޅާ ވަކި ޝަރުތުތަކެއް ފުރިހަމަވާ މީޑިއާތަކަށް ދައުލަތުގެ ބަޖެޓުން ކަނޑައެޅޭ އިންސައްތައެއްގެ ފައިސާ އެލޮކޭޓްކުރުމަށެވެ.
މި ފައިސާ ދޫކުރެވެނީ ހަމަހަމަކަމާއި ނުފޫޒުން އެއްކިބާވެފައިވާ ނިޒާމަކުންކަން ކަށަވަރުކުރުމަށް، ބައިނަލްއަޤްވާމީ މިންގަނޑުތަކާއި އުޞޫލްތަކާއި އެއްގޮތަށް އޮންނަ ރޭޓިންގް ނިޒާމެއް ކަނޑައަޅާނެކަމަށްވެސް އެ ޕާޓީން ބުނެއެވެ.
މީގެ އިތުރުން ދިވެހި ސްޓްރީމިން ސާވިސްތަކާއި، ޕޮޑްކާސްޓިން، އަދި އެހެނިހެން އޮންލައިން މީޑިއާ ޕްލެޓްފޯމް ތަކުގައި ކޮންޓެންޓް ކްރިއޭޓްކުރާ ފަރާތައް ކުރިއެރުމަށް ބެނުންވާ ގާނޫނީ ރައްކާތެރިކަމާއި އެހީތެރިކަން ފޯރުކޮށްދިނުމަށްވެސް މެނިފެސްޓޯގައި ހިމަނާފައިވެއެވެ. އަދި ކޮމިއުނިޓީ-ބޭސްޑް ޖާނަލިޒަމް، ފްރީލާންސް ޖާނަލިޒަމް، ޑިޖިޓަލް ކޮންޓެންޓް ކްރިއޭޝަން ފަދަ ދާއިރާތަކުން ކުރިއެރުމަށް ބެނުންވާ، ތަމްރީނާއި، ތައުލީމީ ފުރުސަތު ފަހިކޮށްދެވޭނެކަމަށްވެސް އެމްޑީޕީގެ މެނިފެސްޓޯގައި ހިމަނާފައިވެއެވެ.
ހަމައެހެންމެ ޑިޖިޓަލް ކޮންޓެންޓް ކްރިއޭޝަން، ސްޓްރީމިން ސާވިސްތަކާއި، ޕޮޑްކާސްޓިން، ޕަބްލިޝާޒް، ފިލްމް އަދި ޑޮކިއުމަންޓްރީ ޕްރޮޑިއުސަރުން އަދި ނޮވެލިސްޓުންނަށް ބޭނުންވާ މާލީ އެހީތެރިކަން SDFC މެދުވެރިކޮށް ފޯރުކޮށްދިނުމަށްވެސް މި މެނިފެސްޓޯގައި ވަނީ ކަނޑައަޅާފައެވެ. އަދި ދައުލަތުގެ މީޑިއާއިން ފޯރުކޮށްދޭ ޚަބަރާ މައުލޫމާތުތަކަކީ ނުކުޅުދުންތެރިކަން ހުންނަ ފަރާތްތަކައް އެކްސެސިބަލް ކޮށް ފޯރުކޮށްދޭ ކޮންޓެންޓަށް ހަދާނެކަމަށާއި، އައު ނޫސްވެރިން ތަމްރީނުކޮށް، ކެރިއަރެއްގެ ގޮތުގައި މީޑިއާގައި މަސައްކަތްކުރުމަށް ބޭނުންވާ އެކި ތަމްރީނު ފުރުސަތުތައް ފަހިކޮށްދެވޭނެކަމަށްވެސް އެމް.ޑީ.ޕީގެ މެނިފެސްޓޯގައި ހިމަނާފައިވެއެވެ.