ރިޔާސީ ކެމްޕޭންގައި ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒު ހުވަދު އަތޮޅަށާއި، ފުވައްމުލަކަށް ކުރައްވާ ދަތުރުފުޅުގައި ފުރާ ވަޑައިގަންނަވާގޮތަށް ހަމަ ޖެހިއްޖެއެވެ.
ޑރ.މުއިއްޒުގެ ތަރުޖަމާން މުހައްމަދު ތޮލާލް ވިދާޅުވީ ދިވެހީންގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ފުވައްމުލަކު ސިޓީއަށް، ގދ. އަދި ގއ. އަތޮޅުގެ ބައެއް ރަށްރަށަށް ކުރައްވާ ދަތުރުފުޅުގައި މިއަދު ފުރާ ވަޑައި ގަންނަވާނެކަމަށެވެ. މިދަތުރުފުޅަކީ މިމަހުގެ 26 އިން 28 އަށް ކުރައްވާ ދަތުރުފުޅެއް ކަމަށް ތޮލާލް ވިދާޅުވިއެވެ.
މިދަތުރުފުޅުގައި ޑރ.މުއިއްޒު ފުރަތަމަ ވަޑަައި ގަންނަވާނީ ފުވައްމުލައް ސިޓީއަށެވެ. މިއަދު ހަވީރު ފުވައްމުލަކަށް ވަޑައިގެންނެވުމަށް ހަމަޖެހިފައިވާއިރު، މާދަމާރޭ އެސިޓީގައި ބޮޑު ޖަލްސާއެއް ބޭއްވުމަށްވަނީ ހަމަޖެހިފައެވެ.
ޑރ.މުއިއްޒު ހުވަދު އަތޮޅަށް ކުރައްވާ ދަތުރުފުޅު ފައްޓަވަނީ މިމަހުގެ 27 ވަނަ ދުވަހު ހެނދުނު ގައްދޫއިންނެވެ. އެދުވަހު، ގައްދޫގެ އިތުރުން މަޑަވެލި، ހޯޑެއްދޫ، އަދި ތިނަދޫއަށް ވަޑައިގަންނަވާނެއެވެ. އެރޭ ޖަލްސާ ބޭއްވުމަށް ހަމަޖެހިފައިވަނީ ތިނަދޫގައެވެ.
މުއިއްޒުގެ މިދަތުރުފުޅުގައި މިމަހުގެ 28 ވަނަ ދުވަހު ހެދުނު ވަޑައި ގަންނަވާނީ ގެމަނަފުއްޓަށެވެ. އެދުވަހު ދާންދޫ، އަދި ވިލިގިއްޔަށް ވަޑައި ގަންނަވާނެއެވެ. ބޮޑު ޖަލްސާ އޮންނާނީ އެރޭ ވިލިނގިލީގައެވެ. މިދަތުރުފުޅު ނިންމަވާލެއްވުމަށްފު ޑރ. މުއިއްޒު 28 ވަނަ ދުވަހުގެރޭ މާލެ ވަޑައި ގަންނަވާނެއެވެ.