ހުވަދުއަތޮޅު ގުޅާލުމުގެ ނަމުގައި ހުވަދުއަތޮޅުގެ ހުރިހާ ރަށެއްގެ ރައްޔިތުންނަށް ދައުވަތުދީގެން ތިނަދޫގައި ބޮޑު ރަސްމިއްޔާތެއް ބޭއްވުމަށް ތާވަލުކޮށްފިއެވެ.
ދިވެހިރާއްޖޭގެ ރަށްތަށް ދަތުރުފަތުރުގެ ވިއުގައަކުން ގުޅާލާ އެއް ރަށުން އަނެއް ރަށަށް ފަސޭހަކަމާއި ރައްކާތެރިކަމާއިއެކު ދަތުރުކުރެވޭނެ އިންތިޒާމެއް ހަމަޖައްސައިދިނުމަށް ސަރުކާރުން ކުރިއަށް ގެންދާ އިންޓަގްރޭޓެޑް ނެޝަނަލް ޕަބްލިކް ފެރީ ނެޓްވޯކްގެ ދަށުން ތައާރަފް ކޮށްފައިވާ ރާއްޖެ ޓްރާންސްޕޯޓް ލިންކް މިހާރު ވަނީ ހުވަދުއަތޮޅުގައި ފަށާފައިއެވެ.
މިހާރު މި ހިދުމަތް ހުވަދު އަތޮޅުގައި ފަށާފައިވާތާ މިހާރު ގާތްގަޑަކަށް ދެ މަސް ދުވަސް ވީއެވެ.
މި ރަސްމިއްޔާތަކީ ދިވެހި ރާއްޖޭގެ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ޝަރަފްވެރި ކުރާ ރަސްމިއްޔާތެއް ކަމުން ހުވަދު އަތޮޅުގެ ހުރިހާ ރަށަކަށް ވަނީ ދައުވަތު ދީފައެވެ.
މައުލޫމާތު ލިބިފައިވާ ގޮތުގައި މި ރަސްމިއްޔާތަށް މީހުން އުފުލުމުގައި އާރްޓީއެލްގެ ހުރިހާ ލޯންޗް ތަކެއް ބޭނުންކުރުމަށް ވަނީ ނިންމާފައެވެ. އަދި ރަަށުން ބޭރުން އަންނަ ފަރާތްތަކުގެ ކެއުމާއި، އެކޮމަޑޭޝަން ވަނީ ހަމަޖައްސަވާފައެވެ.
ޕްލޭނިންގ މިނިސްޓްރީގެ މި ރަސްމިއްޔާތުގެ ތަފްސީލުގައި މާލެއިން ޗާޓަރު ފްލައިޓެއްގައި މީހުން އަންނަން ޝެޑިއުލްކޮށްފައިވާކަން ހާމަވެއެވެ.
ހުވަދޫއަށް ކަށަވަރުވެފައިވާ ގޮތުގައި މިރަސްމިއްޔާތުގައި ބައިވެރިވުމަށް އަންނަ ފަރާތްތަކަށްް ޕޮކެޓް މަނީ އެއް ދިނުމަށް ވަނީ ނިންމާފައެވެ.
މިރަސްމިއްޔާތާއި ދިމާކޮށް ވެރިކަން ކުރާ އެމްޑީޕީން ވަނީ ތިނަދޫގައި ބޮޑު ޖަލްސާއެއް ބޭއްވުމަށް ނިންމާފައެވެ. އަދި މިޖަލްސާއަށް ވެސް މީހުން އުފުލުމުގެ އިންތިޒާމް މިހާރު ވަނީ ހަމަޖައްސަވާފައެވެ.