އަމާޒަކީ 2026 ވަނަ އަހަރު އަންނަންވާއިރަށް ދައުލަތުގެ ރިޒާވް، 350 އާއި 450 މިލިއަން ޑިލަރާއި ހަމައަށް ސައިޒުކޮށް ބޮޑުކުރުން ކަމަށް އެމްޑީޕީގެ ފަރާތުން ރިޔާސީ އިންތިހާބުގައި ވާދަކުރައްވާ ކެންޑިޑޭޓް، އަދި ރައީސުލްޖުމްހޫރިއްޔާ އިބްރާހިމް މުހައްމަދު ޞޯލިހް ވިދާޅުވެއްޖެއެވެ.
ރައީސް ޞޯލިހް މިހެން ވިދާޅުވީ، މިއަހަރުގެ ރިޔާސީ އިންތިހާބަށް ހާއްސަކޮށްގެން، ސަންގު ޓީވީން ކުރިއަށް ގެންދާ “ސަންގު ބަހުސް” ގައި ވާހަަކަފުޅު ދައްކަވަމުންނެވެ.
މި ބަހުސްގައި ވާހަކަފުޅު ދައްކަވަމުން ރައީސް ޞޯލިހް ވިދާޅުވީ، 2016 އަށް ދައްކާ ސިޔާސަތު އެމަނިކުފާނުގެ އެބައޮތް ކަަމަށާއި، އެގޮތުން ދައުލަތުގެ މާލިއްޔަތުގެ އާމްދަނީ އިތުރުކޮށް ވެފައިވާ ވައުދުތައް ފުއްދޭނެ ގޮތް ކަނޑައަޅާފައިވާ ކަމަށެވެ.
“2026 ގައި މި ދައްކާ އަނެއް ސިޔާސަތު އަޅުގަނޑުމެންގެ އެބައޮތް. އޭގެ ތެރެއިން، ދެބައިކުޅަ އެއްބައި އަޅުގަނޑުމެން، އަލުން ރިފައިނޭންސް ކޮށް މާކެޓްއަށް ގޮސް، ފައިސާ ހޯދޭނެ ގޮތް އަޅުގަނޑުމެންނަށް އެބަހުރި، ކޮވިޑްގެ ތެރޭގައި އެކަން އަޅުގަނޑުމެން ވާނީ ހާމަކޮށްފައި،” ބަހުސްގައި ވާހަކަދައްކަވަމުން އެމަނިކުފާނު ވިދާޅުވިއެވެ.
މީގެ އިތުރުން ބަހުސްގައި ވާހަކަ ދައްކަވަމުން ރައީސް ޞޯލިހް ވިދާޅުވީ، ދައުލަތައް ލިބެމުންދާ އާމްދަނީ ދަނީ މިހާރުވެސް އެއް ދުވަހުން އަނެއް ދުވަހަށް އިތުރުވަމުން ކަމަށާއި، އެގޮތުން، މި ސަރުކާރު ވެރިކަމާއި ހަވާލު ވިއިރު، ދައުލަތައް ލިބެނީ 22 މިލިއަން ރުފިޔާކަމަށާއި، މިއަހަރު މިހާ ހިސާބަށް 34 މިލިއަން ރުފިޔާ، ދައޫލަތައް ވަދެފައި ވާކަމަށެވެ. އަދި 2026 ވަނަ އަހަރު އަންނައިރު، 46 ބިލިއަން ރުފިޔާ ދައުލަތައް ވަންނާނެ ކަމަށްވެސް އެމނަިކުފާނު ވިދާޅުވިއެވެ.
މިއަހަރުގެ ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ މެދުގައި ބާއްވާ ހަމައެކަނި ބަހުސްއަކީ ސަންގު ބަހުސްއެވެ. މި ބަހުސްގައި ހުރިހާ ޕާޓީއެއްގެ ކެންޑިޑޭޓުންނާއި އަމިއްލަ ގޮތުން އިންތިހާބުގައި ވާދަކުރައްވާ ކެންޑިޑޭޓުންވެސް ވަނީ ބައިވެރިވެފައެވެ.