ޖުމްހޫރީ ޕާޓީގެ ޚާރިޖީ ސިޔާސަތަކަށް ވެގެން ދާނީ ރައީސް އިބްރާހިމް ނާޞިރްއާއި ރައީސް މައުމޫން އަބްދުލް ގައްޔޫމް ގެންގުޅުއްވި ޚާރިޖީ ސިޔާސަތުކަމަށް އެ ޕާޓީގެ ރިޔާސީ ކެންޑިޑޭޓް ގާސިމް އިބްރާޙިމް ވިދާޅުވެއްޖެއެވެ.
ގާސިމް މިހެން ވިދާޅުވީ، މިއަހަރުގެ ރިޔާސީ އިންތިހާބަށް ހާއްސަކޮށްގެން، ސަންގު ޓީވީން ކުރިއަށް ގެންދާ “ސަންގު ބަހުސް” ގައި ވާހަަކަފުޅު ދައްކަވަމުންނެވެ.
މި ބަހުސްގައި ވާހަކަފުޅު ދައްކަވަމުން ގާސިމް ވިދާޅުވީ، ރައީސް މައުމޫން އެމަނިކުފާނުގެ ވެރިކަމުގައި ގެންގުޅުއްވި ޚާރިޖީ ސިޔާސަތު ވަރަށް ކަމުދާ ަކަމަށާއި، އެހެން ކަމުން އިތުރު އެއްވެސް ގައުމަކާއި އެކު ހަމަނުޖެހުމެއް ނެތް ކަމަށެވެ.
” ހުރިހާ ބަޔަކަށް ވެސް އިޙުތިރާމް ކުރެވިގެން ބައިނަލް އަޤްވާމީ، އޭޖެންސީ ތަކުގައިވެސް ބައިވެރިވަމުން އަޅުގަނޑުމެން އައިސްފައިވަނީ. ގައުމުގެ މިނިވަންކަންމާއި އިސްތިގުލާލް ހިފެހެއްޓި އަދި އެއްވެސް ބައެއްގެ ދިގަ ހިފައިގެން އުޅެންޖެހޭ ސިފައެއްގައެއް ނޫން.”
މީގެ އިތުރުން މި ބަހުސްގައި ވާހަކަ ދައްކަވަމުން، ޖުމްހޫރީ ޕާޓީގެ ރިޔާސީ ކެންޑިޑޭޓް ވިދާޅުވީ އެބޭފުޅުންގެ ޚާރިޖީ ސިޔާސަތު ބައްޓަންވެފައިވާނީ ދިވެހިންނަށް އިސްކަންދިނުމުގެ ސިޔާސަތު ކަމަށާއި އަދި އެހީ ހުރިހާ ގޮތަކުންވެސް އިސްކަން ދޭނެ ކަންތައް ކަމަށެވެ.
އެގޮތުން އިގްތިސާދީ ކަންތައްތަކާއި އިޖްތިމާއި ކަންތައްތަކުންވެސް އަދި ދާޚިލީ ކަންތައްތަކުގައިވެސް ޚާރިޖީ ސިޔާސަތު ބިނާވެގެންދާނީ ގައުމުގެ ރައްޔިތުންގެ މައްޗަށް ކަމަށް ގާސިމް ވިދާޅުވިއެވެ.
މިއަހަރުގެ ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ މެދުގައި ބާއްވާ ހަމައެކަނި ބަހުސްއަކީ ސަންގު ބަހުސްއެވެ. މި ބަހުސްގައި ހުރިހާ ޕާޓީއެއްގެ ކެންޑިޑޭޓުންނާއި އަމިއްލަ ގޮތުން އިންތިހާބުގައި ވާދަކުރައްވާ ކެންޑިޑޭޓުންވެސް ވަނީ ބައިވެރިވެފައެވެ.