ހޮނިހިރު ދުވަހުގެ ވޯޓުލުމުގެ ކުރިން މިސަރުކާރުން ފައިސާގެ ނުފޫޒު އިންތިހާއަށް ފޯރުވަމުންދާ ކަމަށާއި، އިންތިޚާބަށް ނުފޫޒު ފޯރުވައި ޤާނޫނާއި ގަވާއިދާއި ޚިލާފަށް ރިޝްވަތުގެ ގޮތުގައި ވަގު ނޫޓު ބޭނުންކޮށް ވޯޓު ގަންނަމުންދާކަމަށް އިދިކޮޅު ޕްރޮގްރެސިވް ކޯލިޝަނުން ތުހުމަތު ކޮށްފިއެވެ.
ރިޔާސީ އިންތިޚާބުގެ ވޯޓުލުން އޮންނާނީ ހޮނިހިރު ދުވަހުއެވެ. އިންތިޚާބުގައި މިސަރުކާރު ބޮޑުތަނުން ބަލިވާނެކަން އެނގޭތީ މިހާރު ކުރަމުންދާ ކަމަކީ ރިޝްވަތުގެ ގޮތުގައި ފައިސާ ބަހައިގެން ވޯޓު ހޯދުންކަމަށް ޕީޕީއެމްގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި އަދުރޭ ވިދާޅުވިއެވެ.
އޭނާ ވިދާޅުވީ މިސަރުކާރަކީ މަކަރާއި ހީލަތާއި އޮޅުވާލުމުގެ ތެރެއިން ކަންކަން ކުރަމުންދާ ސަރުކާރެއް ކަމަށާއި، ރައްޔިތުންގެ ތާއީދު ނެތުމުން ވޯޓު ގަތުމަށް މިހާރު މަސައްކަތް ފަށާފައިވާކަމަށެވެ. އެގޮތުން ވޯޓަކަށް 20،000 ރުފިޔާ އާއި 30،000 ރުފިޔާއާއި ދޭތެރޭގެ އަދަދަކަށް ފައިސާ ދީގެން ވޯޓު ގަންނަމުންދާކަމަށް ފައިސާ ހުށަހަޅާ މީހުން ބުނަމުންދާކަމަށެވެ. މިސަރުކާރުން ބަހަން ގެންގުޅެނީ ވަގުނޫޓު ތަކެއްކަމަށް އަދުރޭ ވިދާޅުވިއެވެ.
އަދުރޭ ވިދާޅުވީ އިންތިޚާބު އޮޅުވާލައި އިންތިޚާބަށް ނުފޫޒު ފޯރުވުމަށް މިސަރުކާރުން ކުރާ މަސައްކަތް ހުއްޓުވުމަކީ ކަމާއިބެހޭ މުވައްސަސާތަކުން ކުރަންޖެހޭ ކަމެއްކަމަށެވެ.
މިހަފްތާ ވެގެން މިދަނީ އެއްވެސް ހައްދެއް ހުދޫދެއްނެތި ޕްރޮޖެކްޓުތައް ފުލުފުލުގައި ސޮއިކޮށް ހައިމާކުތައް ގެންގޮސް ކުލަ މަންޒަރު ދައްކާ ހަފްތާއެއްގެ ގޮތުގައި ކަމަށެވެ. ވެރިކަމުގެ ފަސް އަހަރު ނިމުނުއިރު ނުވިކަންކަން ހަފްތާއެއްގެ ތެރޭ ކުރެވޭނެކަން ދައްކަން ކުރާ މަސައްކަތް ބަލައި ނުގަތުމަށް އަދުރޭ ވަނީ ގޮވާލާފައެވެ.