ފުރަތަމަ ބުރުގައި ދިވެހި ރައްޔިތުން ކުރެއްވި އިތުބާރަށް ސެލިއުޓްކޮށް، ޑރ. މުއިއްޒުގެ ރަނިން މޭޓް ހުސެއިން މުހައްމަދު ލަތީފް ދިވެހި ރައްޔިތުންގެ ކިބައިން ދެވަނަ ބުރުގައި ބޮޑު ތާއީދެއް ދެއްވުމަށް އެދިވަޑައިގެންފިއެވެ.
ރިޔާސީ އިންތިޚާބުގެ ދެވަނަ ބުރުގައި ލިބުނު ކާމިޔާބީ ފާހަގަ ކުރުމަށް އާޓްފިޝަލް ބީޗުގައި ބޭއްވި ޖަލްސާގައި ވާހަކަ ދައްކަވަމުން ސެމްބެ ވިދާޅުވީ ދިވެހި ރައްޔިތުން އިިއްޔެ ނިންމި ނިންމުމަކީ ބިރުވެރިކަމާއި، ނުފޫޒުގެ ކުރިމަތީގައި ނިންމި ހިއްތަވަރު ގަދަ ނިންމުމެއް ކަމަށެވެ.
އެކަމުން ހާމަވީ ކިތަންމެ ވަރަކަށް ބިރު ދެއްކިޔަސް، ފައިސާ ހުށަހެޅިޔަސް ދިވެހިންގެ މިނިވަންކަން ބޮލާލައި ޖަހާލާފައި ދެން އިސްކުރާނެ އިތުރު ކަމެއް ނެތްކަމަށެވެ.
ދިވެހި ރައްޔިތުން ނިންމި ނިންމުމަކީ މިޤައުމުގެ ހާލަތު ބަދަލުކޮށް ޒުވާނުންނާއި، ކަނބަލުންގެ ހައްގުތައް ހޯދުމަށް ކުރަމުންދާ މަސައްކަތުގައި ނިންމި މިނިންމި ނިންމުމެއްކަން ފާހަގަކޮށް ސެމްބެ އެދުނީ ދެވަނަ ބުރުގައި އިތުރު ތާއީދަކާއިއެކު މިއިންތިޚާބު ނިންމުމަށެވެ.
ދިވެހިންގެ ރާއްޖެ ދިވެހިންނަށް ހޯދައިދެވޭނީ ރައީސް ޔާމީންގެ އިރުޝާދާއިއެކު މަސައްކަތް ކުރާ ޓީމަކަށްކަން ފާހަގަކޮށް ސެމްބެ ވަނީ މިއިންތިޚާބުގައި މިސަރުކާރަށް ނޫނެކޭ ބުނުމަށް ގޮވާލާފައެވެ.
ދެވަނަ ބުރުގައި އެކީގައި ކުރިއަށްދާން މުއިއްޒު ދެއްވި ދައުވަތު ގަބޫލު ކުރައްވާ ހުރިހާ ސިޔާސީ ޕާޓީތަކާއި ލީޑަރުން މުއިއްޒުއާއިއެކު މަސައްކަތް ކުރައްވަން ނިންމެވުމަކީ އެދޭ ގޮތްކަމަށް ސެމްބެ ވިދާޅުވިއެވެ. އަދި އުންމީދަކީ އެންމެން އެކީގައި މިއިންތިޚާބު ބޮޑުތަނުން ކާމިޔާބު ކޮށް މިޤައުމު އަމާން އައްސޭރިއަކަށް ގެންދިއުންކަމަށް ސެމްބެ ވިދާޅުވިއެވެ.