ނިމިދިޔަ ރިޔާސީ އިންތިޚާބުގައި ފެނިގެން ދިޔަ ނަތީޖާއިން ހާމަވެގެން ދިޔައީ ރައީސް ނަޝީދަށް އޮތް ތާއީދަކީ ރައީސް ޑރ.ވަހީދަށް ވުރެ ދެ ޕަސެންޓް ވޯޓު އިތުރު އަދަދެއް ކަމުގައި ވިދާޅުވެ ނުސީދާ ބަހުގެ ހަމަލާއެއް އެމްޑީޕީގެ މަރަދޫ ދާއިރާގެ މެމްބަރު އިބްރާހިމް ޝަރީފް ދީފިއެވެ.
ޝަރީފް މިހެން ވިދާޅުވީ މިފަހަރުގެ ރިޔާސީ އިންތިޚާބުގެ ނަތީޖާއަށް ބަލާ ކިންގް މޭކާއަކީ އަކީ ރައީސް ނަޝީދުކަމަށް ޑިމޮކްރެޓްސްއަށް ތާއީދު ކުރާ ފަރާތްތަކުންނާއި، ގިނަ ބަޔަކު ބުނަމުންދާ ދަނޑިވަޅެއްގައެވެ.
އޭނާ ވިދާޅުވީ ކުރީގެ ރައީސުންގެ ސައިޒު އިންތިޚާބުތަކުން ހާމަވާކަމަށެވެ. އޭނާ ވިދާޅުވީ ރައީސް ވަހީދާއި، ރައީސް ނަޝީދުގެ ދެމެދުގައި ހުރި ފަރަގަކީ 2 ޕަސެންޓް ވޯޓުކަމަށެވެ.
ކުރީގެ ރައީސުންގެ ސައިޒު މިހާރު މާބޮޑަށްވެސް ސާފުވެއްޖެ. ޑރ. ވަހީދަށް 5 ޕަސެންޓް. ރައީސް ނަޝީދަށް 7 ޕަސެންޓް. މައުމޫން އަބްދުލް ޤައްޔޫމަށް 1 ޕަސެންޓަށްވުރެ މަދު. ވީމާ ޑރ. ވަހީދަށްވުރެ ރައީސް ނަޝީދުގެ ޕޮޕިއުލާ ވޯޓު 2 ޕަސެންޓަށްވުރެ ގިނަ. އަދުގެ ސިޔާސީ ހަގީގަތް – ޝަރީފް –
ޝަރީފް ވިދާޅުވީ މިއިންތިޚާބުގައި ކިންގް މޭކާއަކީ ކާކުކަން ބުނަން އަދި މާއަވަސް ކަމަށެވެ. ކުރީގެ ކިންގް މޭކަރ ޤާސިމަށް އެމަޤާމު ގެއްލުނީ ބަދަލުވަމުންދާ ސިޔާސީ އޮއިވަރުގެ ސަބަބުން ކަމަށް ޝަރީފް ވިދާޅުވިއެވެ.
ރިޔާސީ އިންތިޚާބުގެ ދެވަނަ ބުރުގައި ރައީސް ނަޝީދުގެ ތާއީދު ހޯދުމަށް އެމްޑީޕީން ދަނީ ވަރަށް ބޮޑަށް މަސައްކަތް ކުރަމުންނެވެ. ނަމަވެސް އަދި މިހާތަނަށް ރައީސް ނަޝީދާއި، ޑިމޮކްރެޓްސް އިން ވަކި ގޮތެއް ނިންމާފައި ނުވެއެވެ. ވިދާޅުވަމުންދަނީ ކޮންމެ ބަޔަކާއިވެސް މަޝްވަރާ ކުރާނެކަމަށާއި، ނަމަވެސް ގަބޫލު ކުރާ އުސޫލުތަކާއި ހަމަތަކާއި އެކު ނޫނީ ގޮތެއް ނުނިންމާނެކަމަށެވެ.
ކުރީގެ ކިންގް މޭކަރ ޤާސިމް އިބްރާހިމް އަށް އެމަޤާމުވެސް ގެއްލުނީ ބަދަލުވަމުންދާ ސިޔާސީ އޮއިވަރުގެ ބިޔަ ރާޅުގެ ސަބަބުން. ރާއްޖެވެސް ޓޫޕާޓީ ޕޮލިޓިކަލް ސިސްޓަމަކަށް ބަދަލުވާންވީ. އާކިންގް މޭކާއަކީ ކާކުކަން އަދި ބުނަން މާ އަވަސް -ޝަރީފް-
އިންތިޚާބުގެ ދެވަނަ ބުރު މިމަހުގެ 30 ވަނަ ދުވަހު އޮންނައިރު، ޑިމޮކްރެޓްސް އަކީ މިއިންތިޚާބުގެ ދެވަނަ ބުރުގައި ވާދަ ކުރައްވާ ދެ ކެންޑިޑޭޓުންނަށް އެންމެ މުހިންމު ޕާޓީއެވެ. އެއީ ޑިމޮކްރެޓުންވަނީ އިންތިޚާބުގެ ފުރަމަ ބުރުގައި ތިން ވަނަ ހޯދައިި، 15،000 އަށް ވުރެ ގިނަ ވޯޓު ހޯދާފައެވެ.