ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އިތުބާރު ނެތްކަމުގެ މައްސަލަ ނެގުމުންވެސް މަލާމާތާއި ފުރައްސާރަ ކުރިމަތި ކުރާކަމަށް ވިދާޅުވެ، ރައީސް ނަޝީދަށް މިހާރުވެސް އިތުބާރު ނެތްކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި) މަޖިލީހުގައި ހިމެނޭ އެމްޑީޕީ މެމްބަރުން މަޖިލިސްގެ ރައީސާއި، ނައިބް ރައީސްގެ އިތުބާރު ނެތްކަމުގެ މައްސަލަ އަނބުރާ ނެންގެވި ނަމަވެސް އެނެންގެވި ސަބަބު އެމްޑީޕީގެ މެމްބަރުން ހާމަކޮށް، ރައްޔިތުންގެ ކިބައިން މާފަށް އެދެންޖެހޭކަމަށް އިންތި ވަނީ ވިދާޅުވެފައެވެ. އަދި މަޖިލިސް ހުއްޓުވައި ކޮމެޓީތައް ހުއްޓުވީ ސީދާ ސަރުކާރުން ކަމަށް އިންތި ވިދާޅުވިއެވެ.
ޝަރީފް ވިދާޅުވީ މަޖިލިސް ރައީސާއި، ނައިބް ރައީސްގެ އިތުބާރު ނެތްކަމުގެ މައްސަލަ ނެގި ނަމަވެސް ބޮޑާވެ، މަލާމާތްކޮށް ފުރައްސަ ކުރީ ހަމަ ރަނގަޅަށްވެސް މަޖިލިސް ރައީސްގެ އިތުބާރެއް ނެތްކަމަށެވެ.
އަޅުގަނޑުމެންގެ ބޮލުގައި އިލްޒާމް އަޅުވާއިރު އަޅުގަނޑުގެ އިތުބާރު ހަމަ ނެތިގެން، އަޅުގަނޑުމެން ރައީސްގެ އިތުބާރު ނެތްކަމަށް ސޮއިކޮށްފަ ހުށަހެޅީ. އެހެން ނަމަވެސް އޭގެ ނާޖައިޒް ފައިދާ ނަގާ ސުލްހަޔަށް ކަންތައް ކުރަން ދިމާ ކުރީމާ މަލާމާތާއި ފުރައްސާރައާއި ޖެއްސުން ކުރަން ފެށީމާ އަޅުގަނޑުގެ އިތުބާރު ހަމަ ނެތް.
ޝަރީފް ވިދާޅުވީ ޑިމޮކްރެޓުން ބޮޑާވާއިރު، ލިބުނީ ވަހީދަށް ލިބުނު އަދަދާއި ގާތްކުރާ ވަރުގެ ވޯޓު ކޮޅެއްކަމަށް ޝަރީފް ވިދާޅުވިއެވެ. ޝަރީފްގެ ވާހަކަތަކަށް ޑިމޮކްރެޓުންގެ ގިނަ މެމްބަރުން ވަނީ ރައްދު ދެއްވާފައެވެ.