ރިޔާސީ އިންތިޚާބުގެ ފުރަތަމަ ބުރުން 15 ހާސް ވޯޓު ލިބުމަކީ ދެވަނަ ބުރުގެ ކުރިން ނިޒާމީ ވޯޓު ނަގަންޖެހޭ ސަބަބެއްނޫން ކަމަށް އެމްޑީޕީގެ ކުރީގެ ޗެއާޕާސަން މޫސާ މަނިކު ވިދާޅުވެއްޖެއެވެ.
ރިޔާސީ އިންތިހާބުގައި ތިން ވަނަ އަށް އެންމެ ގިނަ ވޯޓު ލިބުނު ޑިމޮކްރެޓްސްގެ ހުށަހެޅުމަކީ އިންތިހާބުގެ ދެވަނަ ބުރުގެ ކުރިން މި މަހު 25 ގައި ނިޒާމީ ވޯޓަކަށް ދިޔުން ކަމަށް އެ ޕާޓީން ވަނީ ބުނެފައެވެ.
ރިޔާސީ އިންތިޚާބެއްގެ ފުރަތަމަބުރު ނިމި ދެވަނަބުރައް ގޮސް ވޯޓުލާންއޮއްވާ އެކަންހުއްޓާފަ އިލެކޝަނުން ނުކުމެ ނިޒާމީ ވޯޓެއް ނަގަން މިބުނަނީ ކެންޑިޑޭޓަކު ނެރެގެން 15ހާސްވޯޓުލިބުނީމަތޯ؟ ދެވަނަ ބުރުގައެ ވޯޓަކީ ކިހިނެއްވާ ވޯޓެއްކަން އެވެރިންނަށް ސާފުވެއްޖެހެން ހީވަނީ!
ޑިމޮކްރެޓްސްގެ މިވާހަތަކާއި ގުޅިގެން މޫސަ ވިދާޅުވީ ރިޔާސީ އިންތިޚާބުގެ ފުރަތަމަ ބުރު ދެވަނަ ބުރުގެ ވޯޓުލާން ކައިރިވެފައި އޮއްވާ އެންމެ 15،000 ވޯޓު ލިބުނު ބަޔަކު ބުނެގެން ދެވަނަ ބުރުގެ ކުރިން ނިޒާމީ ވޯޓު ނަގަން ޖެހޭކަމަށް ނުދެކޭ ކަމަށެވެ. ލިބުނު ވޯޓުކޮޅުގެ ދެވަނަ ބުރުގައި ދާނެ ގޮތް މިހާރު ސާފުވުމުން ނިޒާމީ ވޯޓެއް ނަގަން އުޅުމަކީ މާބޮޑު ތަރުހީބެއް ލިބޭނެ ކަމެއް ނޫންކަމަށްވެސް މޫސަ ވިދާޅުވިއެވެ.
ކޯލިޝަން މަޝްވަރާއާ ގުޅޭ ގޮތުން ޑިމޮކްރެޓްސް އިން އެންމެ ފަހުން ބޭއްވި އިންޓްރިމް ކައުންސިލްގައި ވާހަކަ ދެއްކެވި ގިނަ މެންބަރުންގެ ވިސްނުމަކީ ވެސް އެމްޑީޕީ ނުވަތަ ޕީޕީއެމްއާ މަޝްވަރާ ކުރާއިރު ސަރުކާރުގެ މަގާމްތަކާއި ސަރުކާރުން ވަކި ޕޯޝަނެއް ހޯދަން މަސައްކަތް ކުރުމުގެ ބަދަލުގައި ޑިމޮކްރެޓްސްގެ ސިޔާސަތުތައް ތަންފީޒުކުރާނެ ބަޔަކާއެކީ ކުރިޔަށް ދިޔުމެވެ.
އެ ޕާޓީ ގަބޫލުކުރާ އެންމެ މުހިންމު އެއް ސިޔާސަތެއް ކަމަށް މެންބަރުން ބުނަމުން އައީ ރާއްޖޭގެ ވެރިކަން ހިންގުމުގެ ނިޒާމް ބަރުލަމާނީ ނިޒާމަށް ބަދަލު ކުރުމެވެ