ރާއްޖޭގެ ސަލާމަތީ ޒިންމާ އަދާކުުރަމުންދާ ދިވެހި ސިފައިންނާއި ފުލުހުންގެ މުސާރަ މިހާރު ހުރި ވަރަށް ވުރެ ދެގުނަ ބޮޑުކޮށް ދެއްވާނެކަމަށް، ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
ރިޔާސީ އިންތިޚާބުގެ ދެވަނަ ބުރުގެ ކެމްޕޭންގައި އާރޓްފިޝަލް ބީޗުގައި ބޭއްވި ޖަލްސާގައި ވާހަކަ ދައްކަވަމުން މުއިއްޒު ވިދާޅުވީ ދިވެހިންގެ ފަޚުރުވެރި ޤައުމީ ދުވަހާއި މަދާމާ ބައްދަލު ކުރާއިރު ދިވެހިންގެ މިނިވަން ކަމާއި ސިޔާސަތު އޮތީ ވަރަށް ނާޒުކު ފައްތަރެއްގައި ކަމަށެވެ. މިނިވަންކަން އޮތް ހިސާބުން އެހެން ހިސާބަކަށް ގެންދެވޭނީ އެންމެން ގުޅިގެން ކަމަށާއި، މިމަސައްކަތުގައި އެންމެ އިސް ދައުރެއް އަދާކުރާނީ ސަލާމަތީ ބާރުތަކުން ކަމަށް މުއިއްޒު ވިދާޅުވިއެވެ.
މުއިއްޒު ވިދާޅުވީ ސިފައިންނާއި ފުލުންނަށް މިހާރު ލިބެމުންދާ މުސާރައަކީ އެންމެ ރަނގަޅު މުސާރަކަމަށް ގަބޫލު ނުކުރާކަމަށެވެ. މިހާރު ލިބޭ މުސާރަ ދެގުނަ ކުރުމަކީ ކުރައްވާނެ ކަމެއްކަމަށް މުއިއްޒު ވިދާޅުވިއެވެ.
އަޅުގަނޑަށް އެގޭ މުސާރައަށް ބަދަލު ގެންނަ ނަމަ އެއީ ވަރަށް ބޮޑު ވާހަކައެއްކަން. އެކަން ކުރާނެ ގޮތެއް ކުރެވޭނެ ގޮތެއް ނޭގި އަޅުގަނޑު އެއްވެސް ވައުދެއް ނުވާނަން. އަޅުގަނޑުވާ ކޮންމެ ވައުދަކީ އަޅުގަނޑު ފުއްދާނެ އަދި ކޮށްދޭނެ ކަންކަމުގެ ވައުދު. އިރާދަ ކުރެއްވިޔާ މިކަން ކޮށްދޭނަން.
މުއިއްޒު ވިދާޅުވީ ސިފައިންނާއި ފުލުހުންގެ ފްލެޓްތަކަކީ މިސަރުކާރުން ވެރިކަމާއި ހަވާލުވެ ފުރަތަމަ 100 ދުވަހުގެ ތެރޭގައި އެތަންތަން ނިންމާނެކަމަށް ބުނި ނަމަވެސް މިހާތަނަށްވެސް ނިންމިފައި ނުވާކަމަށެވެ. އަދި މިހާރު ނިމުމަކާއި ގާތްވުމުން ދައްކަންޖެހޭ ކުލި އެހާ ބޮޑުކަމަށެވެ. މުއިއްޒު ވިދާޅުވީ މި ފްލެލެޓްތަކުގެ ކުރި ފުރަތަމަ އެއް އަހަރު ނުނަގާ ފެލެޓްތަކުގައި ދިރިއުޅެވޭނެ ގޮތް ހަދާ ދޭނެކަމަށެވެ. އަދި ދައްކާ ކުލީގެ އަގުވެސް ކުޑަ ކޮށްދެއްވާނެކަމަށެވެ.
މުއިއްޒު ވަނީ ސިފައިންނާއި ފުލުހުންގެ ޤައުމީ ވާޖިބް އަދާކުުރުމުގައި ދޭންޖެހޭ ފުރިހަމަ އެއްބާރުލުން ދެއްވާނެކަމަށެވެ.