ރައްޔިތުންގެ މަޖިލީހުގެ ޖަލްސާތައް ކުރިއަށް ގެންދިއުމަށް އެމްޑީޕީގެ ޕާލިމަންޓްރީ ގްރޫޕްގެ މެމްބަރުން ގެންދަވަނީ ހުރަސް އަޅަމުން ކަމަށާއި، މަޖިލިސް ނުހުއްޓި ކުރިއަށް ގެންދިއުމަކީ ރައްޔިތުންނަށް ނުހަނު ބޭނުންތެރި ކަމެއްކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގެ އެޖެންޑާ އޮތްގޮތުން އެމްޑީޕީގެ މެމްބަރު މަޖިލީހަށް ހާޒިވި ނަމަވެސް ތަޅުމަށް ވަންނަން ވަނީ ދެކޮޅު ހަދާފައެވެ. މަޖިލީހުގެ މެޖޯރިޓީ ލީޑަރު މުހައްމަދު އަސްލަމާއި، އެމްޑީޕީގެ ޕާލިމަންޓްރީ ގްރޫޕްގެ ގިނަ މެމްބަރުން ތިއްބެވީ މަޖިލިސް ކުޑަ ދޮށުގައެވެ. މަޖިލިސް ރައީސް މުހައްމަދު ނަޝީދު ވަނީ ޖަލްސާ ގެންދިއުމަށް ތިން ފަހަރެއްގެ މަތީން މަސައްކަތް ކޮށްފައެވެ. ނަމަވެސް މެމްބަރުން ތަޅުމަށް ނުވަދެ ތިބުމުން ކޯރަމް ނުލިބި ޖަލްސާ ވަނީ ކުރިއަށް ގެންދެވޭ ގޮތް ނުވެފައެވެ.
މަޖިލިސް ރައީސް ވިދާޅުވީ މަޖިލިސްގެ ހާޒިރީގައި ސޮއިކޮށް ތަޅުމަށް ވަޑައި ނުގެންނެވުމަކީ މަޖިލިސް ހުއްޓުވުމަށް ކުރެވޭ މަސައްކަތެއް ކަމަށެވެ. މީގެ ކުރިންވެސް އެމްޑީޕީން ވަނީ މަޖިލީހުގެ ރައީސާއި ނައިބް ރައީސްގެ އިތުބާރު ނެތްކަމުގެ މައްސަލަ އެއްފަހަރާ ވެއްދުމަްފަހު މަޖިލިސް ހުއްޓުވުވާފައި ކަމަށާއި، ނަމަވެސް ފަހުން މައްސަލަތައް ގެންދިއުމަށްފަހު މިހާރު އަނެއްކާ ތަޅުމަށްވެސް ވަންނަން ދެކޮޅު ހަދާކަމަށެވެ.
މިއީ ޒިންމާދާރު މެމްބަރުން އަމަލު ކުރަންވާ ގޮތެއް ނޫންކަމަށާއި، މަޖިލީހުގެ އެޖެންޑާ ކަނޑައަޅަނީ ޤާނާއި ގަވާއިދުގެ ތެރެއިންކަމަށް މަޖިލިސް ރައީސް މުހައްމަދު ނަޝީދު ވިދާޅުވިއެވެ. ރައީސް ނަޝީދު ވިދާޅުވީ ކޮންމެ މެމްބަރަކުވެސް މާތް ރަސްކަލާންގެ ގަންދީ ހުވާކޮށްގެން ތިބެނީ ރައްޔިތުންނަށް މަސައްކަތް ކޮށް ދިނުމަށް ކަމަށެވެ. ނަމަވެސް ފެނިގެން ދަނީ މެމްބަރުން މަޖިލިސް ކުރިއަށް ގެންދިއުމަށް ހުރަސް އަޅުއްވާތަން ކަމަށް މަޖިލިސް ރައީސް ވިދާޅުވިއެވެ.