ރައްޔިތުންގެ މަޖިލީހުގެ ރައީސް މުހައްމަަދު ނަޝީދަށް މަޖީދީ މަގުގެ މެދުގައި ދިން ނުރައްކާތެރި ބޮމުގެ ހަމަލާއަށް މިއަދާއި ހަމައަށްވެސް އިންސާފު ނުލިބިވާކަމަށާއި، އެމަނިކުފާނަށް އިންސާފު ހޯދާދޭނީ ދެން އުފެދޭ ޕީޕީއެމް/ޕީއެންސީގެ ސަރުކާރެއްގައި ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެއެވެ.
މާފަންނުގެ ރައްޔިތުންނާއި ބައްދަލު ކުރެއްވުމަށް ބޭއްވި ބައްދަލުވުމުގައި ވާހަަފުޅު ދައްކަވަމުން މުއިއްޒު ވިދާޅުވީ މިސަރުކާރުން ވަނީ އަދުލު އިންސާފުގެ ދާއިރާ ޚަރާބު ކޮށްލާފައިކަމަށެވެ.
އިންސާފަކީ ރައްޔިތުންނަށް މިއަދު އާދޭސްކޮށްގެންވެސް ނުލިބިފައި އޮތް އެއްޗެއްކަމަށް މުއިއްޒު ވިދާޅުވިއެވެ. ރައީސް ނަޝީދާއި، އަދި އެތައް ޢާންމު ރައްޔިތުންވެސް އިންސާފަށް އެދި އާދޭސް ކުރަމުންދާއިރު މިއިން އެއްވެސް ކަމަކަށް އިންސާފެއް ނުލިބޭކަމަށް މުއިއްޒު ވިދާޅުވިއެވެ.
ރައީސް ނަޝީދަށް މަޖިދީ މަހުގެ މެދުގައި ދިން ބޮމުގެ ހަމަލާއަށް މިސަރުކާރުން އިންސާފެއް ހޯދާ ނުދިން. އައެމަނިކުފާނަށް އިންސާފު ހޯދާދޭނީ އަޅުގަނޑުމެންގެ ސަރުކާރެއްގަ. އަޅުގަނޑު އިރާދަކުރެއްވިއްޔާ ރައީސް ނަޝީދަށް އިންސާފު ހޯދާ ދޭނަން.
މުއިއްޒު ވިދާޅުވީ މިސަރުކާރުގެ އަނިޔާވެރިކަން ރައީސް ނަޝީދަށް ދިން ހަމަލާއަށް އެކަނި ބަލާލުމުން ސާފުވާކަމަށެވެ. ރައީސް ނަޝީދަކީ އެމްޑީޕީގެ އޭރުގެ ރައީސް އަދި މަޖިލީހުގެ ރައީސަށް ވާއިރު އެމަނިކުފާނަށް މިހާ އަނިޔާވެރިކޮށް ބޭއިންސާފު ކަންކަން ކުރި ސަރުކާރަކުން އެހެން ރައްޔިތަކާއިމެދު ޢަމަލު ކޮށްފާނެ ގޮތަކާމެދު ރައްޔިތުން ފުންކޮށް ވިސްނާންލަން ޖެހޭކަމަށް މުއިއްޒު ވިދާޅުވިއެވެ.
މުއިއްޒު ވަނީ ބައްދަލުވުމުގައިވެސް މާލޭގެ ރައްޔިތުންނަށް ބޭނުންވާ ބޯހިޔާވަހިކަން ކަށަވަރު ކޮށްދެއްވާނެކަމަށް ވިދާޅުވެފައެވެ. އެއްވެސް ރައްޔިތަކު ބޯހިޔާ ވަހިކަމަށް ސަލާން ޖަހަން ނުޖެހޭ މިންވަރަށް ބޯހިޔާވަހިކަން ކަށަވަރު ކޮށްދެއްވާނެކަމަށް މުއިއްޒު ވިދާޅުވިއެވެ.