ގާނޫނުއަސާސީން ރައްޔިތުންނާ ކަށަވަރުކޮށް ދޭ ހައްގުތައް ލިބިދޭކަން ކަށަވަރު ކުރަން މުޅިން އާ މުއައްސަސާއެއް އުފައްދާނެ ކަމަށް ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕޭނަށް ރޭ ހުޅުދުއްފާރަށް ވަޑައިގެން ސަޕޯޓަރުންނާ ބައްދަލުކުރައްވައި މުއިއްޒު ވިދާޅުވީ މި ސަރުކާރުގެ ސިޔާސަތުތައް ހުރި ގޮތުގެ ސަބަބުން ޙަައްގުތައް ލިބިދޭކަން ކަށަވަރު ނުވާ ކަމަށާއި އޭނާގެ ސަރުކާރު ބިނާކުރާނީ އަދުލުވެރި އަދި އިންސާފުވެރި ސަރުކާރެއްގެ ގޮތުގައި ކަމަށް ވިދާޅުވި އެވެ.
“ސަރުކާރުގެ ހިންގުމުގެ ނިޒާމުގެ ތެރޭގައި ހައްގެއް ނުލިބޭ ކަމުގެ ޝަކުވާ ހުށަހެޅޭނެ ތަނެއް ހުންނާނެ، ސިވިލް ރައިޓްސް ޑިޕާޓްމަންޓް ބޭރު ބައެއް ގައުމުތަކުގައި ހުރޭ، އެ ފަދަ މުއައްސަސާއެއް، މީގައި މުހިންމީ ނަމެއް ނޫން، ކަންވުން” ޑރ މުއިއްޒު ވިދާޅުވި އެވެ.
އޭނާ ވިދާޅުވީ ރައީސުލްޖުމްހޫރިއްޔާގެ މަގާމަކީ އިއްޒަތެއް އަދި ޝަރަފެއްގެ ގޮތުގައި ދެކިވަޑައިނުގަންނަވާ ކަމަށާއި އެ މަގާމަކީ ރައްޔިތުން ހަވާލުކުރާ ބޮޑު ޒިންމާއެއް އަދި އަމާނާތެއް ކަމަށެވެ. އަދި އޭނާ ރައްޔިތުންގެ ގާތަށް ދަނީ އެ އަމާނާތާއި ޒިންމާ އޭގެ އެންމެ ފުރިހަމަ ގޮތުގައި ތެދުވެރިކަމާއެކު ކޮށްދެވޭނެކަމުގެ ޔަގީންކަން އޮތުމުން ކަމަށް ވެސް ރޭގެ ޖަލްސާ ގައި ވިދާޅުވި އެވެ.
ޑރ މުއިއްޒު ގެންދަވަނީ އިންތިހާބު ގެ ދެ ވަނަ ބުރުގައި ވެސް ރާއްޖޭގެ އެކި ސަރަހައްދުތަކަށް ޒިޔާރަތް ވަރަށް ހަލުވި ކެމްޕެއިނެއް ކުރައްވަމުން ކަން ފާހަގަ ކުރެވެއެވެ.