ރިޝްވަތަކީ ތިމާއަށް ހައްގުނޫން ކަމެއް ނުވަތަ ހައްގު ނޫން އެއްޗެއް ނުވަތަ ޙައްގު ނޫން މަންފާއެއް ލިބިގަތުމަށް، ނުވަތަ ތިމާ ކަމަކުން ބަރީއަވެ، ސަލާމަތްވުމަށް ފައިސާ ނުވަތަ އެ ނޫންވެސް އެއްޗެއް، މީހަކަށް ނުވަތަ ބަޔަކަށް ދިނުން ކަމަށާއި، އެގޮތުން ރިޝްވަތު ދޭމީހާއާއި ރިޝްވަތުގައި ހިފާމީހާއަށްވެސް މާތް ﷲ ލަޢުނަތްލައްވާފައިވާ ކަމަށް، މިއަދުގެ ޚުޠުބާގައި ބުނެފިއެވެ.
އެގޮތުން ރިޝްވަތުގެ އަމަލު ޙަރާމްކުރައްވާފައިވަނީ، އެ ކަމަކީ އޭގެ ސަބަބުން މުޖުތަމަޢުގައި ފަސާދަ އުފެއްދުމަށް މެދުވެރިވާ ވަސީލަތެއް ކަމުގައި ވާތީ ކަމަށާއި، އަދި، އެއީ ޙައްގާއި ދެކޮޅަށް ހަނގުރާމަކުރުމަށް ބޭނުންކުރެވެމުންދާ ހަތިޔާރެއްކަމަށްވެސް މިއަދުގެ ޚުޠުބާގައި ވަނީ ފާހަގަކޮށްފައެވެ.
މީގެ އިތުރުން، ރިޝްވަތުގެ އަމަލު އާންމުވެފައިވާ މުޖުތަމައުތަކުގައި ހަމަޖެހުމާއި އަމާންކަމާއި، ރުޅިވެރިކަން އިސްކުރެވި، އަދާވާތްތެރިންގެ ޝިކާރައަކަށް މުޖުތަމައުގެ ފަރުދުން ހުށަހެޅިގެން ދާނެ ކަމަށާއި، އެގޮޔުން، މުސްލިމުން މި އަމަލާއި ދުރުވުމަށް މިއަދުގެ ޚުޠުބާގައި ވަނީ ގޮވާލާފައެވެ.
އެގޮތުން ރިޝްވަތަކީ ހަދިޔާއެއްގެ ގޮތުގައި ހީވި، ގަބޫލުކުރެވުނު ނަމަވެސް އެއީ ހައްގާ ދެކޮލަށް ކުރެވޭ ހަނގުރާމައިގައި ބޭނުން ކުރެވޭ ޒަހަރެއް ކަމަށާއި، އަދި ދުނިޔަވީ ވަގުތީ ހިތްހަމަޖެހުމަށްޓަކައި ރިޝްވަތުގެ ބޭނުން ނުހިފުމަށްވެސް މި މުޖުތަމައުގެ މައްޗަށް މިއަދުގެ ޚުޠުބާގައިވަނީ ނަސޭހަތްތެރިވެފައެވެ.
މީގެ އިތުުރުން، އަހަރެމެން މުސްލިމުންގެ މައްޗަށް އެންމެ ހަލާލު އެއްޗަކީ، ހަލާލު މަސައްކަތްކޮށްގެން އިންސާނާ އަމިއްލައަށް އެއްޗެހި ކަމަށާއި، އަދި އެފަދައިން ހޯދާ ތަކެތީގައި ބަރަކާތް ލެއްވިގެން ވުމާއިއެކު، އެއިން ތިމާގެ ޙަޔާތުގައި ބާއްޖަވެރިކަން ލެއްވިގެންވާނެ ކަމަށްވެސް މިއަދުގެ ޚުޠުބާގައި ބުނިއެވެ.
އަދި ހަމައެހެންމެ ރަސޫލު ބޭކަލުންނަށްވެސް މާތްﷲ ސުބުހާނަހޫ ވަޠައާލާ އަންގަވާފައިވަނީ، ހަލާލު ތަކެތި ބޭނުންކުރެއްވުމަށް ކަމަށާއި، އަދި މުއުމިނުންނަށްވެސް އަންގަވާފައިވަނީ ހަމައެފަދައިން ކަމަށާއި، އެގޮތުން ހަރާމް ގޮތުގައި ހޯދާފައިވާ ތަކެތިން ކައިބޮއި، އުނުފޭރާން ލުމަކީ އެމީހެއްގެ އަމަލުތައް މާތް ﷲ ގަބޫލު ނުކުރައްވާނޭ ކަމެއް ކަމަށްވެސް ޚުޠުބާގައި ބުނެފައިވެއެވެ.
މީގެ އިތުރުން މުދަލަށް ރައްކާތެރިވެ ހެޔޮ ގޮތުގައި އެ މުދާ ހޭދަ ކުރުމަށް ހުޠުބާގައިވަނީ ވަރަށް ބޮަޑަށް ބާރުއަޅުއްވާފައެވެ.
އެގޮތުން ފައިސާ ހޯދި ގޮތާއި އެ ބޭނުންކުރެވުނު ގޮތާއިމެދު ގިޔާމަތްދުވަހުން ސުވާލުކުރެއްވޭނެ ކަމަށާއި، ވީމާ ހެޔޮ ގޮތުގައި މުދާ ބޭނުންކުރާ ބަޔަކަށްވުމަށް މިއަދުގެ ޚުޠުބާގައި ވަނީ އަހަރެމެންނަށް އިލްތިމާސްކޮށްފައެވެ.