ތިލަދުންމަތީ އުތުރުބުރީ ކެލާގައި އަށާރަ ގަޑިއިރު ތެރޭ، ގައުމަށް އެކިކަހަލަ ހިދުމަތް ކޮށްދެއްވާފައިވާ ތިން ފަރާތެއް ނިޔާވެއްޖެއެވެ.
އިއްޔެ އިރުއޮއްސުނު ވަގުތުން ފެށިގެން މިއަދުގެ ހެނދުނާ ހަމައަށް ކެލާއަށް ނިސްބަތްވާ ތިން ފިރިހެނަކު ނިޔާވެފައިވާއިރު އޭގެ ތެރެއިން ދެބޭފުޅުން ނިޔާވީ ޑެންގޫގައި ފަރުވާދެމުން ދަނިކޮށެވެ. އަދި އެކަކު ނިޔާވެފައިވަނީ ކުއްލިގޮތަކަށެވެ.
ޑެންގޫ ހުންޖެހިގެން، ހުޅުމާލޭ ޓްރީޓޮޕް ހޮސްޕިޓަލުގައި ފަރުވާދެމުން ގެންދިޔަ ދެބޭފުޅުންނަކީވެސް ކެލާގެ ދެހިދުމަތްތެރިންނެވެ. ރޭފަތިހުގެ ވަގުތެގައި އެންމެ ފުރަމަ ނިޔާވެފައިވަނީ ގިނަ އަހަރުތަކެއް ވަންދެން ކެލާގެ ކުޑަކަތީބުކަން ކުރެއްވި (ކެލާ/ފަރިހިގެ) 69 އަހަރުގެ އިބްރާހީމް އަފީފު އާދަމެވެ. މާގިނައިރުތަކެއް ނުވަނީސް ހެނދުނުގެ ވަގުތުގައި އަވަހާރަވީ ކެލާ ސްކޫލުގެ ހެޑްމާސްޓަރުކަން ގިނަ އަހަރުތަކެއް ވާންދެން ކުރެއްވި (ކެލާ/އިސްތާނާ) 58 އަަހރުގެ އަހުމަދު ފައިސަލެވެ. ކެލާ ސްކޫލުގެ އިތުރުން އެހެން ބައެއް ރަށްރަށުގެ ސްކޫލުގެ ހެޑްމާސްޓަރުކަން ވެސްް ކުރެއްވި ފައިސަލް ފަހުން ވަޒީފާ އަދާކުރެއްވީ ޕަބްލިކް އެގްޒަމިނޭޝަން ޑިޕާޓްމެންޓްގެ އިސްވެރިއަކަށެވެ ފައިސަލް ވަނީ 36 އަހަރަށްވުރެ ގިނަ ދުވަހު ތައުލީމީ ދާއިރާއަށް ހިދުމަތް ކުރައްވާފައެވެ.
ކެލާ ކައުންސިލްގެ ރައީސް އަބްދުﷲ އިންފާޒު "ހުވަދޫމީޑިއާ"އަށް މައުލޫމާތު ދެއްވަމުން ވިދާޅުވީ، މީގެ ހަ ވަރަކަށް އަހަރު ކުރިން މަސައްކަތުން ރިޓަޔަރވުމަށްފަހު، އަފީފާއި ފައިސަލްވެސް ދިރިއުޅުއްވަމުން ގެންދެވީ ހުޅުމާލޭގައި ކަމަށެވެ. މީގެ ތެރެއިން އަފީފަކީ ފައިސަލްގެ ޅިޔަނެކެވެ.
އަފީފުގެ ކަށުނަމާދު މިއަދު މެންދުރު ނަމާދަށްފަހުގައި ހުޅުމާލެ ސަހަރާ މިސްކިތުގައި ކޮށްފައިވާއިރު، ފައިސަލްގެ ކަށުނަމާދު ކުރީ މިރޭގެ އިޝާ ނަމާދަށްފަހު ހުޅުމާލެ ސަހަރާ މިސްކިތުގައެވެ.
އިބްރާހިމް އަފީފް އާދަމް (ކ)އާއި އަހުމަދު ފައިސަލް(ވ)
ކެލާގެ ތާރީހުގައި މިއަދަކީ އިންތިހާއަށް ހިތާމަވެރި ދުވަހެކެވެ. ނުހަނު ކައިރިކައިރީގައި، އެންމެ 18 ގަޑިއިރު ތެރޭގައި ކެލާގެ ތިން މީހަކު ނިޔާވުމަކީ އެރަށުގެ ރައްޔިތުންގެ ހިތުން ފިލާނުދާނެ ހިތި ހަނދާނެކެވެ. ކެލާ ކައުންސިލްގެ ރައީސް އިންފާޒު ވިދާޅުވީ، އެންމެ ފުރަތަމަ ކުއްލި ގޮތަކަށް ނިޔާވީ ކެލާ ޕޮލިހަށް ކުރީން ކޭޓަރިންގެ ހިދުމަތް ކޮށްދޭން އުޅެފައި، ފަހުން ދަނޑުވެރިކަމުގައި އުޅެމުންދިޔަ (ކެލާ / އާރު) ފަންސާހަކަށް އަހަރުގެ އަހްމަދު ވަހީދު އާދަމް ކަަމަށެވެ.
އިންފާޒު ވިދާޅުވީ އިއްޔެ ހަވީރު ފަހެއް ޖެހިއިރުވެސް އަހުމަދު ވަހީދު އަތިރިމަތީގައި މީހުންނާ ވާހަކަ ދައްކައި، ސަކަރާތް ޖަހަން އުޅުނު ކަމަށެވެ. އިންފާޒު ވިދާޅުވީ އަހުމަދު ވަހީދަކީ ވަރަށް ސަކަ މިޒާޖެއްގެ މީހުންނާ ގުޅޭ މީހެއްކަމަށާއި އެހެންނަމަވެސް އިރުއޮއްސެން އުޅެނިކޮށް އަހްމަދު ވަހީދު ފެނުނީ ގޭތެރެއަށް ވެއްޓިފައި އޮއްވާ ކަމަށެވެ. ވެއްޓިފައި އޮތްތަން ފެނިގެން ފަރުވާ އަށް ގެންދިޔައިރު ވަހީދު އޮތީ ނިޔާވެފައެވެ. ވަހީދުގެ ޖަނާޒާ ބޭއްވީ ކެލާގައެވެ.
އެއް ރަށަކަށް ނިސްބަތްވާ ތިން މީހަކު، 18 ގަޑިއިރުގެ ތެރޭގައި ކުއްލި ގޮތަކަށް ވަކިވުމުން މުޅި ރަށަށް ވެސް ލިބިފައިވަނީ ބޮޑު ހިތާމައެއް ކަމަށް އިންފާޒު ވިދާޅުވިއެެވެ. އަދި އެންމެން ވެސް، ހައިރާންވެ، ދެރަވެގެން އެ ވާހަކަ ދައްކަމުން ދާ ކަމަށް އިންފާޒު ވަނީ ވިދާޅުވެފައެވެ.
ކެލާއިން ވާހަކަދެއްކި ދެބައި އުމުރުގެ އަންހެނަކު ބުނި ގޮތުގައި މުޅި ރަށަށް ވެސް މިހާދިސާގެ އަސަރުވަނީ ކޮށްފައެވެ. ރަށުގެ އެންމެންހެން ނުހަނު އިހުތިރާމްކުރާ ތިން ފަރާތެއް ކައިރިކައިރީގައި ވަކިވެ ދިއުމުން ކެލާގެ ކޮންމެ މީހެއްގެ ހިތަށްވެސް ފުން އަސަރުތަކެއް ކޮށްފައިވާކަމަށެވެ. އަދި މިއީ އަބަދަށް ދެމިހުންނާނެ ހިތާމަވެރި ހިތި ހަނދާނެކެވެ.