ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރުގައި ހުރި ހިސާބަށް ރާއްޖޭގެ ކްރެޑިޓް ރޭޓިންގ ގެންގޮސް އޭރު ރައީސް ޔާމީން އުފެއްދެވި ސޮވެރިން ޑިވެލޮޕްމެންޓް ފަންޑް (އެސްޑީއެފް) އަށް އަލުން ޑޮލަރު ޖަމާކުރަން ފަށައި، އެފަންޑަށް ގާނުނީ ރައްކާތެރިކަން ކަށަވަރު ކޮށްދެއްވާނެ ކަމަށް ޕީޕީއެމް/ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ ޕީޕީއެމް/ޕީއެންސީން ރޭ ބޭއްވި “އިކޮނޮމިކް ފޯރަމް” ގައި ވާހަކަދައްކަމުންނެވެ.
ދިވެހީންގެ އިގްތިސާދު މެނިފެސްޓޯ އާންމު ކުރައްވަމުން މުއިއްޒު ވިދާޅުވީ 2026 އާ ހަމަޔަށް ދާއިރަށް ރާއްޖޭގެ ދަރަނި އަދާކޮށް ނިމޭނެ ގޮތް ހޯދާފައިވާކަމަށް މުއިއްޒު ވަނީ ހާމަކުރައްވާފައެވެ. މުއިއްޒު ވިދާޅުވީ ދަރަނި އަދާކުރުމަށްޓަކައި ކްރެޑިޓް ރޭޓް މަތިކޮށް އިންވެސްޓަރ ކޮންފިޑެންސް އަނބުރާ ގެނެސް ލޯންތައް ރީ ފައިނޭންސް ކުރައްވާނެ ކަމަށެވެ. އޭރުން ލޯންތައް އަދާކުރުމުގައި މާބޮޑު އުނދަގުލެއް ނާންނާނެ ކަމަށް ވެސް މުއިއްޒު ވަނީ ވިދާޅުވެފައެވެ.
މި ސަރުކާރުގެ ވޭތުވެ ދިޔަ ފަސް އަހަރު ނިމޭއިރު ބަޖެޓް ޑެޕޮސިޓް މިހިރީ 15 އިންސައްތައިގައި ކަން ފާހަގަކުރައްވައި މުއިއްޒު ވިދާޅުވީ، އެމަނިކުފާނުގެ ސަރުކާރެއްގައި، މި އިގުތިސާދީ މަސައްކަތް ކުރިޔަށް ގެންގޮސް ނިންމާއިރު އެވްރެޖްކޮށް ބަޖެޓް އެފްސީޑީ ސިންގަލް ޑިޖިޓަށް ކުޑަކުރައްވާނެކަމަށެވެ.
ހަމައެހެންމެ ރާއްޖޭގައި ޑޮލަރުގެ އަގު -/18 ރުފިޔާއަށްވުރެ ކުޑަކޮށް އެއްހަމައެއްގައި ހިފަހައްޓާ ދިވެހި ފައިސާގެ އަގު ދަށްވިޔަ ނުދެއްވާނެކަމަށްވެސް މުއިއްޒު ވަނީ ވިދާޅުވެފައެވެ. އަދި ފަސް އަހަރުގެ ދައުރުގެ ތެރޭގައި މަރުކަޒީ ބޭންކް (އެމްއެމްއޭ)ގެ ރިޒާވް އިތުރުކޮށް ކުރިއަށްވުރެ މައްޗަށް ގެންދާނެ ކަމަށް ވެސް ވަނީ ވިދާޅުވެފައެވެ.
ގާނޫނީ ބާރުވެރިކަމާއެކު ސޮވެރިންގ ޑިވެލޮޕްމަންޓް ފަންޑަށް އަލުން ޑޮލަރު ޖަމާވާގޮތް ހައްދަވާ މަހުންމަހަށް އާމްދަނީ ވަންނަ ފަންޑަކަށް އެފަންޑު ހެދުމަށްވެސް ކަނޑައަޅުއްވާފައިވާކަމަށް މުއިއްޒު ވިދާޅުވިއެވެ. އަދި ބޭރު ދުނިޔޭގައި ރާއްޖޭގެ ކްރެޑިޓް ރޭޓިންގ ހުރި މިންވަރު 2016 ގައި ހުރި ހިސާބަށް ޖެއްސުމަށް އިންވެސްޓަރ ކޮންފިޑެންސް އަނބުރާ ގެނައުމަށް މަސައްކަތްކުރުމަށް ނިންމާފައިވާކަން ޑރ.މުޢިއްޒު ފާހަގަކުރެއްވިއެވެ.
މީގެއިތުރުން އެސްއީޒެޑްގެ ގާނޫނުގެ ދަށުން ވަކި ސަރަޙައްދުތަކެއް ކަނޑައަޅާ ރައްޔިތުންނަށް މާލީ މަންފާ ލިބޭނެ މަގު ފަހިކޮށްދެއްވާނެކަމަށް މުޢިއްޒު ވިދާޅުވިއެވެ. އަދި ރިސޯޓް ތަރައްގީ ކުރުން ފަދަ ބޮޑެތި އިންވެސްޓްމަންޓްތަކަށް ހާއްސަ ބޭންކެއް ތަރައްގީކުރުމާއި، އިންޓަރނޭޝަނަލް ޕޭމަންޓް ގޭޓްވޭ ތެރެއަށް ވަދެވޭނެ މަގުފަހިކޮށް ޒުވާނުންނަށް އަމިއްލަ ހުނަރު ވިއްކައިގެން ފުދުންތެރި ދިރިއުޅުމެއް އުޅެވޭނެ މަގު ފަހިކޮށްދިނުމަށް މަސައްކަތްކުރައްވާނެކަމަށް ޑރ. މުއިއްޒު ވިދާޅުވިއެވެ.
މި ސަރުކާރުން އާމްދަނީ ހޯދަން ޓީ ބިލާއި ސުކޫކު އަދި ބޮންޑު ރާއްޖެއިން ބޭރަށް ވިއްކާފައިވާކަން ފާހަގަކޮށް މުއިއްޒު ވިދާޅުވީ ފާއިތުވި 40 އަހަރުގެ ތެރޭގައި ރާއްޖޭގައި ޗާޕުކުރި ފައިސާގެ އަދަދު ހަ ބިލިއަން ރުފިޔާއަށް އަރާ ކަމަށެވެ. ނަމަވެސް 2018 ވަނަ އަހަރުން ފެށިގެން މިއަދުގެ ނިޔަލަށް މި ސަރުކާރުން އަށް ބިލިއަން ރުފިޔާ ޗާޕުކޮށްފައިވާ ކަމަށާއި އެކަމުގެ ސަބަބުން ތަކެތީގެ އަގުބޮޑުވެފައިވާ ކަމަށް ވިދާޅުވިއެވެ.