ކުރު މުއްދަތުގެ ސިޔާސީ މަންފާއެއް ހާސިލުކުރުމަށް ރިފަރެންޑަމެއް ބޭއްވިގެން ނުވާނެ ކަމަށް ޓްރާންސްޕޭރެންސީ މޯލްޑިވްސް އިން ބުނެފިއެވެ.
ދިވެހިރާއްޖޭގައި ވެރިކަން ހިންގުމުގެ ނިޒާމަށް ބަދަލު ގެނައުމާ ގުޅޭގޮތުން، 30 އޮކްޓޯބަރ 2023 ގެ ކުރިން އާންމު ރައްޔިތުންގެ ފެންނަ ނުފެންނަ ވޯޓެއް ނެގުމަށް އިލެކްޝަންސް ކޮމިޝަނަށް އެންގުމަށް މަޖިލީހުން ވަނީ ގަރާރެއް ފާސްކޮށްފައެވެ. އަދި އެ ގަރާރު އިލެކްޝަންސް ކޮމިނަށް ހުށަހެޅުމާ ގުޅިގެން، 29 އޮކްޓޯބަރ 2023 ގައި ވޯޓު ނެގުމަށް މަޝްވަރާކޮށްފައިވާކަން އިލެކްޝަންސް ކޮމިޝަނުން ވަނީ އިއުލާން ކޮށްފައެވެ.
މިކަމާއި ގުޅިގެން ޓްރާންސްޕޭރެންސީން ނެރުނު ބަޔާނެއްގައި ބުނީ، ރައްޔިތުންގެ ފެންނަ ނުފެންނަ ވޯޓު (ރިފަރެންޑަން) އަކީ ފުރިހަމަ ތައްޔާރީތަކާއެކު ވޯޓުލާ މީހުން އެކަށީގެންވާ މައުލޫމާތާއެކު ނިންމަންޖެހޭ ނިންމުމެއް ކަމަށެވެ. އަދި 30 ސެޕޓެމްބަރ 2023 ގައި ބާއްވާ ރިޔާސީ އިންތިހާބުގެ ދެވަނަ ބުރަށް ތައްޔާރުވުމުގެ މަސައްކަތް ސިޔާސީ ޕާޓީތަކާއި، މަދަނީ ޖަމިއްތަކާއި، މީޑިއާތަކުން ކުރަމުންދާ މި ދަނޑިވަޅުގައި، ނިޒާމް ބަދަލު ގެނައުމަށް ނަގާ މިފަދަ ވޯޓެއް ލުމަށް ވަގުތު ކުޑަތަންވެފައިވާ ކަމަށެވެ. ސަބަބަކީ ވޯޓުލާ މީހުންގެ މައުލޫމާތާއި ހެލުންތެރިކުރުމުގެ ޕްރޮގްރާމްތައް ރާވައި ހިންގުމަށް ވަގުތު ވަރަށް ކުޑަތަންވެފައިވުމެވެ.
މިހާ އަވަސް މުއްދަތެއްގެ ތެރޭގައި މިފަދަ ވޯޓެއް ނެގުމަށް ނިންމާފައިވާ މި ދަނޑިވަޅުގައި ވޯޓުލާ ފަރާތްތަށް ނިޒާމަށް ގެންނަ ބަދަލުތަކާއި ގުޅިގެން ހުށައެޅޭ މައުލޫމާތަށް ރިއާޔަތްކޮށް ގޮތް ނިންމުމަށް އެކަށިގެންވާ ވަގުތު ނުލިބޭކަންވެސް އެ ޖަމިއްޔާއިން ވަނީ ފާހަގަކޮށްފަ އެވެ.
މިއާއެކު އެ ޖަމިއްޔާ އިން ބުނީ ވެރިކަން ހިންގުމުގެ ނިޒާމު ބަދަލުކުރުމާ މޭ ގޮތުން ފެންނަ ނުފެންނަ ވޯޓު ނެގުމުގެ ކުރިން، ހުށަހަޅާ ނިޒާމުތަކަކީ ކޮބައިކަމާއި، އޭގެ ނަތީޖާއެއްގެ ގޮތުން ހިންގުމުގެ ނިޒާމުގެ މަސައްކަތްތަކަށް ކުރާނެ އަސަރުތަކާއި، ނިޒާމީ ބަދަލެއް އައުމުން ގާނޫނީ އޮނިގަނޑަށް ގެންނަންޖެހޭ ބަދަލުތަކުގެ ފުރިހަމަ މައުލޫމާތު ރައްޔިތުންނަށް ލިބޭނެގޮތް ކަށަވަރުކުރަންޖެހޭ ކަމަށެވެ.
އެހެންކަމުން ޓްރާންސްޕޭރަންސީ މޯލްޑިވްސް އިން ވަނީ ސަރުކާރު ހިންގުމަށް ހުށަހަޅާފައިވާ ނިޒާމުތައް ސާފުކޮށް ބަޔާންކޮށްފައިވާ ފުރިހަމަ އަދި ގައުމީ ފެންވަރުގެ ވޯޓާ އެޑިއުކޭޝަން އަދި ހޭލުންތެރިކުރުގެ ޕްރޮގްރާމެއް ހިންގުމަށް ރައްޔިތުންގެ މަޖިލީހަށާއި، އިލެކްޝަންސް ކޮމިޝަނާއި، ކަމާބެހޭ އެންމެހާ ފަރާތްތަކަށް ގޮވާލާފައެވެ.
ހަމައެހެންމެ ހުށަހަޅާފައިވާ ހިންގުމުގެ ނިޒާމުތަކާއި ބެހޭގޮތުން އާންމުންގެ ހިޔާލު ފާޅުކުރުމަށާއި، ބަހުސްތަކަށް އެކަށީގެންވާ ވަގުތު ދިނުމާއި ފެންނަ ނުފެންނަ ވޯޓެއް ނެގުމުގެ ކުރިން ހިންގުމުގެ، ނިޒާމަށް ބަދަލެއް އައުމުން ކުރާނެ އަސަރުތައް ދެނެގަނެވޭނެ ކަން، ކަށަވަރު ކުރަންވެސް ވަނީ ގޮވާލާފައެވެ.
ޓްރާންސްޕޭރެންސީން ވަނީ ވޯޓު ނެގުމަށް ތައްޔާރުވުމުގަ އާއި ވޯޓު ނެގުމަށްފަހު ނިންމާ ނިންމުންތަކުގެ މަރުހަލާތަކުގައި، ރައްޔިތުން، ވަކިން ހާއްސަކޮށް ޒުވާނުންނާއި ފުރަތަމަ ފަހަރަށް ވޯޓުލާ ފަރާތްތަކާއި އެކު، އެ ފަރާތްތަކުގެ މާނަހުރި ބައިވެރިވުން ކަށަވަރު ކުރަންވެސް ގޮވާލާފައެވެ.
މީގެ އިތުރުން އެ ޖަމިއްޔާ އިން ބުނީ، ރިފަރެންޑަމް ބޭއްވުމަކި ހަރަދު ބޮޑު މަސައްކަތެއްކަމަށެވެ. އެހެންކަމުން ނެގޭ ވޯޓަކީ ކުރު މުއްދަތުގެ ސިޔާސީ މަންފާއަށްވުރެ، ވޯޓުލާ ފަރާތްތަކުގެ ފުރިހަމަ މައުލޫމާތުގެ މައްޗައް ނެގޭ ވޯޓެއްކަން ކަށަވަރުކުރަންޖެހޭ ކަމަށެވެ.
އަދި ވޯޓާ ގުޅިގެން ފުރިހަމަ މައުލޫމާތު ފޯރުކޮށްދިނުމުގެ އިތުރުން، ވޯޓުލާ މީހުންގެ އިހްތިޔާރު ދައްކުވައިދޭ މާނަހުރި މަޝްވަރާއެއް ބޭއްވި، އެކަމަށް އެކަށީގެންވާ ވަގުތު ހާއްސަކުރެވި ކަނޑައެޅިފައިވާންޖެހޭ ކަމަށްވެސް ބުނެފައިވެއެވެ. ހަމަމިއާއެކު މުއައްސަސާތަކުން ދައުލަތުގެ ފައިސާ ޒިންމާދާރުކަމާއެކު ހޭދަކުރުމަށްވެސް އެޖަމިއްޔާއިން ވަނީ ގޮވާލާފައެވެ.