ރިޔާސީ އިންތިޚާބުގެ ދެވަނަ ބުރުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު އިންތިޚާބު ކޮށްދެއްވުމަށް ކޮންމެ ރައްޔިތަކަށްވެސް ކުރެވެން އޮތް މަސައްކަތެއްކޮށް ދެއްވުމަށް ޕީޕީއެމްގެ ރައީސް، ރައީސް ޔާމީން އިލްތިމާސް ކުރައްވައިފިއެވެ.
ރިޔާސީ އިންތިޚާބުގެ ދެވަނަ ބުރުގެ ވޯޓުލުމަށް ކައިރިވަމުންދާ ވަރަކަށް މުއިއްޒާއި ދެކޮޅަށް އެންޓި ކެމްޕޭން ގިނަ ހަރަކާތްތަކެއް ރާވައިގެން ގެންދަނީ ކުރަމުންނެވެ. މުއިއްޒާއި ދެކޮޅަށް ކުރަމުންދާ އެންޓި ކެމްޕޭންތަކުގެ ތެރެއިން ރައީސް ޔާމީން މިނިވަން ނުކުރާނެ ކަމަށް ބުނެ ދައުރު ކުރަމުންދާ ފޭކް އޯޑިއޯއާއި ގުޅިގެން ރައީސް ޔާމީންގެ ވަކީލް އާދަމް ޝަމީމް ވިދާޅުވީ މިއީ ސީދާ ކަނޑައެޅިގެން ބޮޑު އޮޅުވާލުމެއް ކަމަށެވެ.
ރައީސް ޔާމީން ހުންނެވީ ޑރ. މުއިއްޒު އިންތިޚާބު ކޮށްދެއްވުމަށް އިންތިހާއަށް ބޭނުން ވެފައި ކަމަށާއި، އެމަނިކުފާނު އެދިވަޑައި ގަންނަވަނީ ދިވެހި އެންމެހާ ރައްޔިތުންގެ ކިބައިންވެސް ކުރެވެން އޮތް ކަމެއް ކުރައްވައި، މުއިއްޒު އިންތިޚާބު ކޮށްދެއްވުމަށް ކަމަށް ޝަމީމް ވިދާޅުވިއެވެ.
ރިޔާސީ އިންތިޚާބުގެ ފުރަތަމަ ބުރުގައިވެސް އަދި ދެވަނަ ބުރުގައިވެސް ޑރ. މުއިއްޒު ބައިވެރިވާ ކޮންމެ އިވެންޓެއްގައިވެސް އެންމެ ބޮޑު ޔަގީންކަމެއް ދެއްވަނީ ވެރިކަމާއި ހަވާލުވެ ފުރަތަމަ ދުވަހު ރައީސް ޔާމީން ގެއަށް ބަދަލުކުރައްވާނެކަމުގެ ޔަގީންކަމެވެ. ހަމަ މިއާއިއެކު އެމަނިކުފާނަށް ނުހައްގުން ދެމުންދާ އަނިޔާތަކަށް އިންސާފު ހޯދައި އެމަނިކުފާނު މިނިވަން ކޮށްދެއްވާނެ ކަމުގެ ޔަގީންކަން މުއިއްޒު ގެންދަވަނީ ދެއްވަމުންނެވެ.
ރައީސް ޔާމީނަށް އަނިޔާ ދެމުންދަނީ ސީދާ ރައީސް އޮފީހުގެ ނުފޫޒު އެމަނިކުފާނުގެ ޝަރީއަތަށް ފޯރުވައި އިންތިހާއަށް ބޭއިންސާފުން ކަންކަން ކޮށްގެންކަމަށް މުއިއްޒު ވަނީ ވިދާޅުވިއެވެ. މިކަންކަމަށް ޖާގަ ނުދެއްވައި ޝަރުއީ ދާއިރާ މިނިވަންކޮށް އަދުލުވުރިކަން ގާއިމް ކުރައްވާނެ ކަމުގެ ޔަގީންކަން މުއިއްޒު ވަނީ ދެއްވާފައެވެ.