ވެރިކަމުގެ ފަސް އަހަރުތެރޭ 65،000 ރައްޔިތުންނަށް ގެދޮރުވެރިކަން ޔަޤީންކޮށްދެއްވާނެ ކަމަށް .އިންތިޚާބީ ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރިޔާސީ އިންތިޚާބު ކާމިޔާބުވުމާއި ގުޅިގެން ރައްޔިތުންނަށް ޝުކުރުއަދާކުރެއްވުމަށް މިރޭ ބޭއްވެވި ބައްދަލުވުމުގައި ވާހަކަފުޅުދައްކަވަމުންނެވެ.
ޑރ.މުހައްމަދު މުއިއްޒު ވިދާޅުވީ އެމަނިކުފާނުގެ ކެމްޕެއިންގައި ވެޑައިގެންނެވި އެންމެބޮޑު އެންމެ އިސް ވައުދުފުޅަކީ ރައްޔިތުންނަށް ގެދޮރުވެރިކަން ޔަގީންކޮށްދެއްވުން ކަމަށާއި މިފަސް އަހަރުތެރޭގައި މިވައުދު ފުއްދަވައިދެއްވާނެ ކަމަށެވެ. އެގޮތުން ގެދޮރުވެރިކަން ޔަގީންކޮށް ދެއްވުމަށް ހިންގަވާ ބިޔަ މަޝްރޫޢުގެ ބިންހިއްކުމުގެ މަސައްކަތް މިފެށޭ އަހަރު ނިމުމުގެ ކުރިން ނިންމަދެއްވާނެ ކަމަށް ވިދާޅުވިއެވެ.
އެމަނިކުފާނު ވިދާޅުވީ މާލެ ސަރަހައްދުން ފުށިދިއްގަރު ފަޅާއި، ގުޅީފަޅާއި ގިރާވަރު ފަޅުން 65000 ރައްޔިތުންނަށް، ވެރިކަމުގެ މި5 އަހަރުތެރޭ ގެދޮރުވެރިކަން ޔަގީންކޮށްދެއްވާނެ ކަމަށެވެ. ޑރ. މުއިއްޒު ވިދާޅުވީ ރާއްޖޭގެ ކޮންމެ ރަށެއްގައި ހުރި ކޮންމެ ރައްޔިތަކަށްވެސް ގެދޮރުވެރިކަމުގެ ހަމަހަމަކަން އޮންނާނެ ކަމަށާއި، އެއްވެސް ރައްޔިތަކު ބާކީ ނުވާނެ ކަމަށެވެ.
އިންތިހާބީ ރައީސް ޑރ. މުއިއްޒު ވިދާޅުވީ އުމްރާނީ ތަރައްގީގެ ބޮޑެތި މަޝްރޫއުތައްވެސް ކުރިއަށް ގެންދަވަނީ އާބާދީގެ ގޮތުން ބޮޑެތި ރަށްރަށަށް ބޮޑެތި މަޝްރޫއުތައް، ކުދި އާބާދީ ހުރި ރަށްރަށަށް އެރަށެއްގެ ނިސްބަތުން ކަމަށެވެ. އަދި މިކަންކަން ކުރެއްވުމަށް އެކުލަވާލައްވާނީ ހީވާގި ޓީމެއް ކަމަށްވެސް މުއިއްޒު ވިދާޅުވިއެވެ.